Yesus pe'ie dèu pa lod'o pengaha ihi
(Mateo 12:9-14; Luka 6:6-11)
3
Èla pe na ène, ta maho rike Yesus la d'ara èmu heb'aj'a. Pa ène, ta ngède ke ri Noo, he dèu do made ne kae-nga'a helaa.
Ma'u 3:1-19
2 Pa ène lema, era do pèri dèu do kale lai ta pehale Yesus. Ta pehod'e hudi-hudi ke Noo ri roo, ngee-ngee ta pe'ie ri Noo ne dèu do pèd'a na ène pa lod'o pengaha ihi nee.
3 Ta pedoe ke ri Yesus ne dèu do made ne kae-nga'a helaa nee, j'e lii, mihe ane, “Mai ma titu ma hed'apa d'ee.”
4 Ta keb'ali ke Yesus pa roo harièle, ane Noo, “Ki pedutu lua petèka agama dii, nengaa leke do ie ta tao pa lod'o pengaha ihi? Tao ie, we tao apa? Ta pe'ie dèu dii, we ta pemade dèu?” B'ule d'o he dèu he do boka ub'a.
5 Pèd'a ne ade Yesus, heleo roo do rihi pekeb'ue lua petèka agama, nga dèu do made ne kae-nga'a helaa. Ta bubu d'ara ke Yesus, j'e kewèle ela heleo roo hari-hari. Ta lii ke Noo pa dèu do pèd'a nee, “Pemole ne kae-nga'a èu do made ne!” Ta pemole ke ne kae noo, ta ie d'ènge ke. 6 Ta mèhu èni ke harièle ne do Parisi he ti d'ara èmu heb'aj'a nee. Ta la pelii ke roo nga dèu ti paratei Herode, ta kale ruj'ara ta pemade Yesus.
Ae ne dèu do pèd'a do pe'ie ri Yesus pa ngidi èi lobo
7-8 Pa d'ara he wari, ta lari èni ke Yesus nga ana aj'a Noo la ngidi èi lobo Galilea. Pelai ta do toi ke, ri dèu lowe nengaa ne do èla petao ri Noo, ri minahère ae ne dèu do dèka ngati harièle rae-kowa, la pedute Noo. Era do dèka ti propensi Galilea, propensi Yudea, nga ti propensi Idumea. Era lema had'e do dèka ngati kota Yerusalem, kota Sidon, nga ti kota Tirus. Era lema do wala, do dèka ti bara dimu loko Yarden. Harièle roo dèka ta la pe'abu nga Noo. 9 Pelai ta rihi ae ne dèu, ta lii ke Noo pa ana aj'a Noo, ta pemoke hewue kowa natuu Noo. Ne d'èi Noo ta pedai lii ti ra kowa, mij'e ta rèngi roo, lema mij'e ta ngèd'e Noo ri harièle dèu.
10 Do uru, ae dèu pèd'a do pe'ie ri Noo. Ri minahère ke, ae ne dèu pèd'a do dèka la perub'i ta tade d'ae ta b'uje Noo.a 11 Ta ngède Yesus ri dèu do maho ri wango he, ta dèka ke roo la mejura pa hed'apa Yesus. J'e pekaa roo, mihe ane, “Tèra-tèra Èu ke, ne Ana Deo nee!”
12 Tapulara ta lara made ke ri Noo pa roo, mihe ane, “B'ole pedai muu nga dèu, ta naduu Yaa nad'ee!”
Yesus pij'i do henguru do d'ue ta jad'i ana aj'a Noo
(Mateo 10:1-4; Luka 6:12-16)
13 Ta èla pe na ène, ta ha'e ke Yesus la hewue lede. Ta pedoa ri Noo do pèri dèu do mèd'i pa Noo. Ta dèka ke roo nga Noo. 14 Ta pij'i ke ri Noo, do henguru do d'ue. J'e lii Noo pa roo, “Ne pij'i muu, mij'e ta pedute loro-loro Yaa. Ta pejuu muu ri Yaa, ta la pepeke ne Lii Hag'a D'ara ngati Deo pa hari-hari dèu. 15 Ta wie ri Yaa pa muu ne kuaha, ta hud'i wango ti d'ara dèu he.”
16-19 Ne do henguru do d'ue he, ne ngara roo nahee:
Himo (do pehune ne ngara ri Yesus, ta Petu),
J'ako,
Johani, (J'ako nga ari noo Johani, hela'u ta ana ri Sebedeu. Ne ngara roo d'ue do pehune ri Yesus, ‘Boanerge’, pa d'ara lii rai dii ‘mii d'oro’.)b
Anderia,
Pelipu,
Bartolomeo,
Mateo,
Toma,
J'ako (ana ri Alpiu),
Tadiu,
Himo (ti paratei Selot),c
nga Juda Iskario (do mone pewie Yesus).
Guru agama pehale Yesus nga lii ta Yesus do hèmi kuaha ngati kètu wango
(Mateo 12:22-32; Luka 11:14-23, 12:10)
20 Ta èla pe na ène, ta puru ke Yesus nga ana aj'a Noo ti lede nee. J'e b'ale la d'ara èmu. Ta dèka rike ne dèu do rihi ae la pewore Noo, tade dod'o b'ule Yesus he nga awe kehoo ta nga'a.
Ma'u 3:20-35
21 Ta toi ri roo minahère, ta lii ke roo, “Heleo ko ri muu Yesus. Toi tala d'oke ne ngi'u Noo.” Ta rèngi ri tuèhu Noo ta do minahère, ta dèka ke roo la èbe Noo.
22 Pa ène, era lema guru agama do dèka ti Yerusalem, la pedai nga dèu pa ène, mihe ane, “We! Muu he b'ole pedute Yesus. Ne i'a Noo hud'i wango, ri èla penara kuaha ti kètu wango, do tima ta pale ta Balsebuu.”d
23 Ta rèngi ri Yesus ne lii pedai roo, ta pedoa ke roo hari-hari, j'e lii, “Maho d'o la d'ara pengee dèu! Minamii ne jad'i kètu wango ne hud'e ngi'u noo miha! 24 Kiri pa d'ara hewue rai pereda, dèu rai do pana ta pemuhu, minamii rai pereda na ène ne nara ta kako nga woie! 25 Minahère lema pa d'ara hewue èmu, kiri harièle dèu pa d'ara èmu ne petadi ta pehala, minamii d'ara èmu na ène ne nara ta titu nga woie. 26 Minahère lema ke wango, kiri pemuhu roo nga roo, tatu ta menyèla kebali-bali!
27 Kiri era dèu do la boka èmu he dèu do rui, uj'e uru ko ne dèu na ène. Èla pe minahère, memud'e ke noo ne èba b'ara dèu nee.e
28 Ta pika d'ènge Yaa pa muu: Deo do moko ke ta lonye ne hala-ludu dèu. Ki lua pe'apa ngara dèu he, Deo do ta pehuba ko ma ne hala-ludu roo. 29 Tapulara ki era dèu do b'ani ta pedai woapa j'ara lua Hengaa Megala Deo, nara d'o ta pehuba ri Deo ne hala noo, hape la lod'o namii-mii.”f
30 Ne pedai Yesus minahère, ri èla ke roo pelii ta Yesus do èla pemaho ri wango.
Dèu do j'ège ne lua do d'èi Deo, roo tèra ke ne tuèhu Yesus
(Mateo 12:46-50; Luka 8:19-21)
31 Ta dèka ke ina ri Yesus nga ari Noo he la èmu na ène, ta la pe'abu nga Noo. Ta titu ke roo pa tele, j'e pejuu dèu la pedoe Noo. 32 Pa awe na ène, Yesus do mejèd'i pedai lii nga dèu lowe he. Ta la pika ke ne dèu pa Noo, mihe ane, “Ama ee. Ina Èu nga ari Èu he, hei pa tele nee. Ne dèka roo ta ma pehapo nga Ama.”
33 Tapulara ta b'ale ke ri Yesus, mihe ane, “Naduu ke, ne ina Yaa nga tuèhu Yaa do petuu ne?”