Yesus pe'ie he dèu do red'o
(Mateo 9:1-8; Luka 5:17-26)
2
Ta ludu pèri lod'o, ta b'ale rike Yesus la Kapernaum. Ta menyèla ke ne lii pa rai na ène, ta nèi ke Noo pa èmu.
Ma'u 2:1-12
2 Ta dèka ke ne dèu do rihi ae ti mii-mii. Bèra huke-huke ne d'ara èmu ne hape la tele. Ta pika ke ri Yesus pa roo ne lua do d'èi Deo.
3 Pa d'ara nga pedai lii ko Yesus, ta dèka ke do èpa dèu nga meree he dèu do red'o ta èbe nga Yesus. 4 Ri do bèra huke-huke ke ne dèu, d'ai d'o ke roo ta ègo ne dèu ne nga Yesus. Ta ha'e ke roo la dèni èmu, j'e lebo ne dèni èmu pemira nga Yesus. Ta boo ne dèni èmu nee, ped'ule ke ri roo ne do red'o ne pa d'ara dèpi merèi noo.a 5 Ta ngède ri Yesus ne j'èga roo, ta toi ke ta do parahaj'a tèra roo pa Noo. Ta lii ke Yesus pa do red'o nee, mihe ane, “Ana Yaa ee! Èla ke ri Yaa pe pehuba ne hala-ludu èu.”
6 Pa ène era lema do mejèd'i do pèri dèu guru agama Jahudi. Ta d'ai ri roo ne rènge ne lii pedai Yesus, mèd'i d'o pa d'ara roo. 7 Ta pedai ke roo, mihe ane, “B'ani tèra Noo ta pedai minahii! Deo we miha do nara ta pehuba hala-ludu dèu. Lii pedai Noo d'ee, ta paha èni Noo ta hela'u nga Deo. Èla ke ri Noo pekare Deo!”
8 Tapulara toi ri Yesus nengaa ne do pa d'ara pengee roo. Ta lii ke Noo pa roo, “Ta ngaa ke muu ne pengee minahère? 9-10 Na mii do rihi memud'e pedute pengee muu? Ki pali Yaa, pa do red'o na ène, ‘Èla ke ri Yaa pe pehuba ne hala-ludu èu,’ toi d'o ri muu ta do tajad'i, we ad'o. Tapulara ki pali Yaa, ‘Kèd'i we! Lule ne dèpi èu, j'e b'ale.’ Ki kèd'i d'ènge noo, toi tèra ke ri muu, ta Yaa do nga kuaha nga higa ta pehuba hala-ludu dèu. Ri Yaa d'ee, Dèu Rai-wawa do Petuu-Petuu.”
Ta lii ke Yesus pa dèu do red'o nee, mihe ane, 11 “D'èno ee! Ie ke èu! Kèd'i we, lule ne dèpi èu, j'e b'ale.”
12 Ta rènge ri noo ne lii Yesus, ta kèd'i d'ènge ke noo. Èbe ne dèpi noo, j'e pekèd'e. Ngède ri namada hari-hari dèu do era pa ène. Ta madalae ke roo harièle. J'e lii, “Wee! Ngèdi ded'o di ta pehapo nga lai do minahee. Tèra-tèra ne kuaha Deo!”
Yesus pedoe Lewi ta pedute Noo
(Mateo 9:9-13; Luka 5:27-32)
13 Èla pe minahère, ta b'ale rike Yesus la ngidi èi lobo Galilea. Ae ne dèu do dèka la pe'abu nga Noo, j'e pepeke ri Noo ne lua d'èi Deo pa roo.
Ma'u 2:13-28
14 Pa ène, era he dèu ne ngara noo Lewi, ana ri Alpeu. Noo, do j'èga pa era ma'i b'ea unu do pereda Roma. Pa d'ara nga nèru Yesus j'ara ène, ta ngède ke ri Noo Lewi. Ta lii ke Yesus pa noo, “Ama ee! Mai ma pedute Yaa!”
Ta rènge ne lii pedoa Yesus, ta kèd'i d'ènge ke Lewi, j'e pedute Noo.
15 Èla pe na ène, Yesus he mejèd'i ta nga'a pa èmu Lewi, hela'u nga ihianga Lewi do mone hèmi doi b'ea he. Pedutu petèka pengee do Jahudi, ae kera'a dèu do muri-mada pa d'ara apa, do mejèd'i ta nga'a hela'u nga Yesus. Ae ti telora roo do mejèd'i ta nga'a hela'u, do d'èi ta d'èno ne lii pedai Yesus.
16 Pa awe na ène, era do pèri dèu guru agama ti kejie Parisi he, do ngède Yesus mejèd'i ta nga'a hela'u nga mone hèmi doi b'ea, nga dèu do muri-mada pa d'ara apa he. Ta keb'ali ke roo pa ana aj'a Yesus, mihe ane, “Ta ngaa Guru muu ne nga'a hela'u nga mone hèmi doi b'ea he, nga dèu do muri-mada pa d'ara apa he?”
17 Do rènge ri Yesus ne lii keb'ali roo, ta b'ale ke ri Noo, mihe ane, “Dèu do pèd'a do paraluu dote, tapulara dèu do kehèdu, ad'o do paraluu. Ne dèka Yaa ta ma hewewe ne dèu do muri-mada pa d'ara apa he. Ad'o dèka ta ma hewewe dèu do pengee ne muri-mada noo ta do petuu.”
Lii aj'a Yesus wala ngati lii aj'a do Parisi he
(Mateo 9:14-17; Luka 5:33-39)
18 Pa d'ara he wari, dèu ti kejie agama Parisi pa d'ara puasa. Ngèdi ri roo, ana aj'a Johani, mone peherani dèu, do puasa lema. Tapulara ngèdi d'o ri roo ne ana aj'a Yesus he ta do puasa mii roo le. Ta kako ke roo la pe'abu nga Yesus, j'e keb'ali, mihe ane, “Ama. J'ii he pa d'ara puasa. Minahère lema, ana aj'a Johani he. Ta ngaa ke ne ana aj'a Èu ku dod'o puasa?”
19 Ta b'ale ke ri Yesus pa roo, mihe ane, “Toi ri muu, ki era rame peloko nga'a, do pedoa he puasa d'o, tapulara nga'a tade b'èhu. Kiri mone peloko nga'a ne do era ko, nga'a-nginu mengèlu d'ara hela'u roo harièle. 20 Ki jad'i he ne lai, ne mone peloko nga'a nee, mahido ri dèu, j'e èbe perai, pa awe na ène ke, ne ihianga noo ne hedui pengee, j'e'itu puasa.”
21 Ta wie rike ri Yesus he èhi ne lii pehèku, mihe ane, “B'ule d'o dèu do kelapu b'ara do mèje ri b'èla do wiu. Ki d'ai ne b'ahe, kepud'u ne b'èla do wiu nee, juu mehiu ne b'ara na ène. 22 Minahère lema, b'ule d'o dèu do hali due la d'ara haba wo mèje. Tatu ta boo ne haba nee, j'e huti harièle ne due la rai. Hiku, due do wiu, do tatu ta hali pa d'ara haba do wiu.”b (Minahère ke, lii aj'a Yesus do wowiu, b'ole pekiwo nga lii aj'a do dui do unu do Parisi).
Ana aj'a Yesus he g'ètu are-gandum pa lod'o pengaha ihi
(Mateo 12:1-8; Luka 6:1-5)
23 Pa d'ara he wari, pa lod'o heb'aj'a do Jahudi, ta lake ke Yesus j'ara ngidi maa gandum. Ta g'ètu hidu ke ne wuri gandum ri ana aj'a Noo, j'e nga'a.c 24 Do ngèdi ne tao roo ri do Parisi he, moko ta lii ke roo pa Yesus, mihe ane, “Ta ngaa ne ana aj'a Èu ne pèga lua petèka pa d'ara agama dii? Roo he, do g'ètu are-gandum pa lod'o pengaha ihi. Ad'o muu do j'èma ta tao minahère!”
25-26 Ta b'ale ke ri Yesus, mihe ane, “Minamii, we? Hewina d'oke muu nengaa ne do tao ri Dau? Pa awe na ène, Abyata ne do jad'i Kètu Mone Ae agama. Ta d'ai Dau nga harièle dèu lere noo, hèpo èle ri menganga. Ta maho ke roo la d'ara Leo Heb'aj'a pa Deo, la èbe ne roti do èla pe petale ri kètu agama he tuu Deo, j'e nga'e ri roo. Ne petuu he, roti na ène, nga'e ri kètu agama he we, ie d'o ta nga'e ri dèu do hewala. Maji lema ta nga'e ri Dau he, b'ule d'o he dèu he do lii ta do hala.”d
27 Ta lii rike Yesus pa roo, “B'ole bèlo ri muu, ne pe'era ri Deo ne lod'o pengaha ihi natuu ta wie ne mèngi pa dii, dèu rai-wawa. Tao d'o dii dèu rai-wawa ri Deo, tuu ta ma pedute lua petèka-kewèhu lod'o pengaha ihi we. 28 Yaa ke nad'ee, Dèu Rai-wawa do Petuu-Petuu. Yaa ke nad'ee, do nga higa ta lii pa dèu ta j'èga, ki ad'o b'ole j'èga, pa lod'o pengaha ihi.”