Ami menèngi Yakob wie Efraim nga Manase, ana ri Yusuf
48
Tui d'o, ta dèka ke dèu laa pika pa Yusuf, ta do mejèni ke pèd'a ama noo. Hiku ta ègu ke ri noo hari do d'ue ne ana noo he, Efraim nga Manase, ta laa heleo èpu roo Yakob. 2 Ta rèngi Yakob ta do dèka ke Yusuf, ta pewike ke ri noo ta mejèd'i pa era bèj'i nee.3 Ta pika ke noo pa Yusuf, “Ana Yusuf ee! Do hewari ne Deo Mone Rihi Higa pengèdi èni pa yaa pa rae Lus pa rai Kana'an. Pedara Noo nga yaa pa nii. 4 Ne lii Noo, ‘Do ta pe'ae ri Yaa ne kolo-loro èu, j'e ne kolo-loro èu hine do jad'i ta dèu rai do ae. Ta wie lema ri Yaa ne rai nad'ee pa kolo-loro èu he, ta jad'i puhaka unu roo tade pedèka rai-wawa.’
5 Owe, minahed'e ke ne higa ana èu Efraim nga Manase: era ke roo d'ue, d'ai ne dèka yaa ma Mesiir. Maji lema ta minahère, do heleo ta ana yaa ke roo d'ue, hela'u mii Ruben nga Simeon. 6 Tapulara kinga era ri èu nga ana hine, ne ana do nahère unu èu ke. Heleo d'o ke roo ta ana yaa. Hiku hani we roo hine ta hèmi puhaka ngati a'a roo we Efraim nga Manase. 7 Ne tao ri yaa minahère, ta hengee ri yaa ina èu Rahel. Pa ta b'ale j'ii ngati Mesopotamia la Kana'an, ina èu made metana ana pa ruj'ara kako umu nga rae Efrata pa rai Kana'an. D'ai hedui ne d'ara yaa awe nène! Ta pedane ke noo ri yaa pa ngidi ruj'ara ju laa rae Efrata.” (Awe nad'ee, ne rae napone pehune ri roo ta Betlehem).
8 Ta èla Yakoba pe pedai lii, ta dede ke tangamada noo, j'e heleo ri noo ne ana ri Yusuf he pa nène. Ta keb'ali ke noo pa Yusuf, “Ana naduu ke nahed'e?”
9 Ta b'ale ke ri Yusuf, “Roo hed'e, ana do wie rowi Deo pa yaa pa Mesiir.”
Ta èla minahère, ta lii ke Yakob, “Ki do minahère èba ko ri èu pe'umu nga yaa, ma heb'aj'a ko yaa ta ami menèngi pa Deo, ta ami tèro ie menyèro mèngi tuu roo.” 10 Do weka ke Yakob, j'e kerèba leke ne ela noo. Hiku nara d'oke noo ta heleo nga woie. Ta èba ke ri Yusuf ana noo hari do d'ue peumu nga Yakob, ta ked'aka j'e hengèd'u ke roo ri noo. 11 D'ai ta lii ke noo pa Yusuf, “Mihed'e ne worèwu tui pengee ri yaa, mud'e d'o ke yaa ta peabu wari nga èu. Tapulara ne haj'a nga woie Deo do kerihi, Hiku nara ko ri yaa ta heleo ne ana èu he.”
12 Ta pej'èu ke ri Yusuf ne ana noo ngati Yakob,b j'e lèku rutuu noo nga tangamada hape la worai pa hed'apa ama noo. 13 Ta èla pe minahère ta kèd'i ke Yusuf. J'e ègo ri noo ne ana noo j'e petitu peumu nga ama noo. Manase ana mone a'a petito ri noo pa heb'èka ked'anga Yakob; j'e Efraim do mone ari pa heb'èka keriu Yakob. 14 D'ai Yakob ta j'ari d'ede ruai ta ami tèro ie menyèro mèngi tuu roo d'ue, ta pepede ke ri noo ruai ked'anga ne la wokolo mone ari nee, j'e tao ri noo ruai keriu la wokolo mone a'a. 15 Ta menèngi ke noo ta ami tèro ie menyèro mèngi ti Deo tuu Yusuf,
“Nuhi èu, Abraham,
nga èpu èu miha Isak,
do pedute teruu ri roo d'ue lua d'èi Deo.
Deo lema ne do peare-peloje yaa rai ti do ngèru hape ma awe nad'ee.
16 Noo ke do pehele yaa ngati hari-hari hoe nga ha'i.c
Ri minahère, ami lema yaa mita wie tèro ie menyèro mèngi ri Noo pa naiki na he lema ne kolo-loro roo.
J'e ki heb'aj'a roo pa Deo,
bèlo d'o rowi roo kej'ako roo Abraham, nuhi roo Isak, lema ngara yaa.
Mij'e juu ta ae ne kolo-loro roo,
jad'i ta dèu do lowe pa rai-wawa do nad'ee.”
17 Tapulara d'ai ta ngède ri Yusuf ne ruai ked'anga ama noo do tèke pa wokolo Efraim do mone ari, ta ème ke ri noo kae ama noo j'e tèke la wokolo Manase mone a'a. 18 Ta pika ke noo pa ama noo, “Ama ee, b'ole tao minahère. Ana mone ari j'e noo, ad'o noo ana mone a'a. Do j'èma ke ri ama ta tèke ruai ked'anga ama pa wokolo mone a'a. Rowi nène ke unu-pala mone a'a!”
19 Tapulara wae d'o ama noo Yakob. Ta lii ke noo, “Ana yaa ee! Toi ma ri yaa, ta do dae Manase ta dèu do mone ae hine. J'e ne kolo-loro noo ta juu ae tade jad'i dèu do lowe. Tapulara ari noo Efraim hine rihi riko ngati noo ne ketutu, j'e ne kolo-loro noo hine do rihi ae ri ko tade jad'i dèu lowe do kerihi.”
20 D'ai ta pika ke noo pa naiki he hari do d'ue, “Kiri ami mèngi do Isra'el pa Deo tuu dèu, ngara muu d'ue ne do ta pale lema ri roo. Do ta ami roo, ‘Ie mud'e he Deo ta wie èu mèngi, he mii do wie ri Noo mèngi pa Efraim nga Manase.’”
Nga minahère, pale ri Yakob pe'ure ngara Efraim ngati ngara a'a noo Manase.
21 Moko ta pika ke Yakob pa Yusuf, “Ana yaa ee! Tui d'oke yaa j'e made. Tapulara era ma Deo do ta tulu-ruba nga muu hine. Do ta èba peb'ale muu la rai èhu-tewuni ama-èpu muu. 22 Wie pa èu ri yaa pekerihi ngati a'a-ari èu he. Petabe pa èu ri yaa ne kolo-lede pa rai Kana'an do èbe ri yaa uru he ngati dèu do Amori, pa awe pemuhu yaa nga roo.”