Wie worai ri duae ne a'a-ari ri Yusuf he
47
1-2 Ta kako ke Yusuf laa peabu nga duae nga do lèmi dèu ne a'a-ari noo. Ta petada ke ri Yusuf, “Muri mone! He ke do dèka ne ama yaa nga a'a-ari yaa he ti rai Kana'an. Dèka roo nga ègu ki'i, hapi roo nga b'ara unu-oha roo harièle. He ke roo hari-hari pa rai Gosen.” 3 Ta keb'ali ke duae, “J'èga ngaa ke muu?”
Ta b'ale ke ri roo pa duae, “J'ii hed'e mone b'ata b'ad'a he mii ama-èpu j'ii. 4 Pa rai Kana'an nad'ee awe kemangu rai, hiku b'ule d'oke nga'a nga j'u'u. Ri minahère ke hiku dèka j'ii ma pee pa rai nad'ee. He lema do ègu ri j'ii ne b'ada j'ii he. Ta ami ko j'ii pa muri mone, ta pee j'ii pa rai Gosen, mita nara ta peluja ne b'ad'a j'ii pa nii.”
5 D'ai ta peke ke ne lua d'èi duae pa Yusuf, “Do he make pa d'ee ama nga a'a-ari èu he. 6 Hiku ie ma roo ta tao rai nad'ee mii rai roo miha. Ne toi ri yaa, rai Gosen nee, rae do rihi woie pa rai nad'ee. Hiku rihi woie roo ta pee pa nii we. J'e ki era ti telora roo do i'a peluja b'ada nga woie, lii le pa roo ta heleo ne b'ada yaa pa nii.”
7 Ta petade ke ri Yusuf ama noo pa duae. Ta heb'aj'a ke Yakob pa Deo ta wie tèro ie menyèro mèngi tuu duae.
8 Ta keb'ali ke duae pa Yakob, “Pemuri hengaa ke ama?”
9 Ta b'ale ke ri Yakob, “Ne pemuri yaa he ngahu tèlu nguru b'ue tèu ke, j'e ad'o yaa do pee pa èhi era we. Minahère lema ne ama-èpu yaa. Ki ped'ahi, pemuri yaa rihi he'èta ti pemuri roo, tapulara do tobo ri hedui-herui.” 10 Ta pelangu ta b'ale ke Yakob nga duae. Nga dod'o kako dae noo, ta ami ri ke noo pa Muri tèro ie menyèro mèngi tuu duae.
11 Ta pedute ke ri Yusuf ne lii duae, ta pej'uj'e ke ri noo rai Gosen tuu roo. Ne rai do napone do rihi woie. (Do ta pehune ri roo ngara era nène hine ta ‘Rameses’.) D'ai ta pee heke teruu ama ri Yusuf nga a'a nga ari noo pa nii. 12 Ta pemoko nga'a-nginu ke Yusuf wie ama noo, nga tuu a'a nga ari noo he, nga ana-oha roo hari-hari, rai ti do kepai hape la do naiki.
Wèru menganga d'èlu pa rai Mesiir
13 Awe do napone, wèru menganga d'èlu keb'ake do rihi mejèni ke, b'ule d'oke ne b'ara nga'a pa mii-mii. Rai ti Mesiir hape la Kana'an, hari-hari dèu do meroe-meraj'u ke. Nara d'oke roo ta tao nengaa-nengaa, ri menganga d'èlu dod'o mèke. 14 Ta dèka ke hari-hari dèu do era pa Mesiir lema ti Kana'an, tuu laa wèli nga'a pa Yusuf. Ta pengèhi ke ri noo hari-hari ne doi he, j'e tèka la èmu duae. 15 Awe do napone, èla leke ne doi unu do Mesiir nga do Kana'an he. Hiku nara d'oke roo ta wèli nga'a. Moko ta dèka ke roo laa peabu nga Yusuf, nga ami, “Wo ama ee! Wie ko we j'ii nga'a mid'o made j'ii ri menganga d'èlu. Rowi do èla ke ne doi j'ii.”
16 Ta b'ale ke ri Yusuf, “Ki d'o pi'a ke muu nga doi, tao minahee we: wie ne b'ada muu j'e pehuru ri yaa ngara nga'a.” 17 D'ai ta wie ke ri roo ne b'ada roo pa Yusuf ta pehuru nga nga'a. Era jara, ki'i j'awa, ki'i hawu, hapi roo hari nga keledai, rowi tèu nène do petato ke ri Yusuf.
18 B'ale ma he wue tèu, dèka ri ke roo nga Yusuf nga lii ami, “Ama, ee! Pika mola j'ii, b'ule d'oke j'ii nga doi lema nga b'ada, do èla ke ne pehuru pa ama hari-hari. Pi'a d'oke j'ii nga nengaa-nengaa. Hiha ne ngi'u j'ii ke nga rai do unu ri j'ii. 19 B'ole j'ani we j'ii pe made. Ki made j'ii naduu ke do pemane ne rai do napone? Rihi ie èba we j'ii ta ènu ri ama, lema èba ri ama ne rai j'ii ta unu ama, j'e wie j'ii ne wini ta hab'a j'ii tuu ama. Moko ne lob'o j'ii, nga rai j'ii do napone pehuru ri ama nga nga'a. Had'i ta b'ole made we j'ii.”
20 Ri do taba ta juu we ne awe menganga d'èlu, Hiku ta pewie ke hari-hari ne worai dèu do Mesiir. Ta wèli ke ri Yusuf hari-hari worai pa Mesiir ta unu duae. 21 Nga tao minahère, hari-hari dèu rai do Mesiir jad'i ta ènu duae.a 22 Rai unu kètu agama he wèli d'o ri Yusuf, rowi do wie nga'a roo teruu ri duae. Hiku lob'o d'o ta pewie ne worai roo.
23 Awe nène, ta lii ke Yusuf pa dèu rai he, “Owe aa! He ke muu do jad'i ta naènu duae. Worai muu harièle, èla lema ke ri yaa ta wèli wie duae. Hiku mai maa ègu ne wini nahed'e ri muu, j'e laa kuj'a la worai nahère. 24 Ki d'ai ta g'ètu, ta peb'agi lèmi ke ri muu. Èhi ègu wie duae. J'ane èpa ta wini, nga had'e tuu ta nga'a muu nga ana-oha muu.”
25 D'ai ta b'ale ke ri roo, “Èla ke j'ii ta pehelama ri ama. Ri do minahère ami terima kasi ke j'ii. Hani we j'ii ta jad'i naènu ri duae.’
26 D'ai ta tao ke ri Yusuf ta èhi uku rai pa Mesiir ne had'a nène. Ngati hari-hari are do 'èta dèu rai, ta peb'agi lèmi ke ri roo. Èhi unu-pala duae, èpa unu-pala roo miha. Rai unu kètu agama we dod'o wèli ri duae. Uku rai nène, do pekako ko ma ri roo hape ma awe nad'ee.
Pejaji Yusuf ta pedane Yakob pa era pedana ama-èpu roo he
27 J'ari ti awe napone, ta pee teruu ke do Isra'el he pa Mesiir pa rai Gosen. Jad'i roo ta dèu do kaja, lema ne kolo-loro roo juu ta ae.
28 Pa Mesiir nara ko Yakob ta muri-mada he nguru pidu b'ue tèu, tade ne pemuri noo hari-hari lohe la hengahu èpa nguru pidu b'ue tèu. 29 D'ai pa awe ta umu ta made noo, ta pedoe ke ri noo Yusuf j'e lii noo, “Ana yaa ee, Yusuf! Ne pereke ri yaa, tui d'oke yaa j'e pedoe ri Deo. Hiku ne lii ami yaa ki do haj'a tèra èu nga yaa, pehupa ko èu ta dod'o pedane yaa pa ihi rai Mesiir. 30 Do j'èma èu ta ègo ne ngi'u yaa peb'ale, j'e laa pedane la era pedana ama-èpu dii. Na ène ne do d'èi yaa.”
Ta b'ale ke ri Yusuf, “Owe, ama! Ki do minahère ke ne d'èi ama, do ta pedute ma ri yaa.”
31 D'ai ta lii rike Yakob, “Owe, kido minahère, hupa ko èu ta do ta pedute ne d'èi ama èu.”
Ta hupa ke Yusuf pedutu nga lii Yakob. Moko ta lèku rutuu ke Yakob hed'apa la d'uru kètu era bèj'i noo, j'e heb'aj'a noo ami terima kasi pa Deo.