Yakob nga ana-oha noo he pemoko èni ta laa Mesiir
46
Èla mihère,a ta pemoko ke ri Yakob ne unu-oha noo he, j'e pekèd'i roo j'ane rai Kana'an. Ta d'ai la rae Barseba, ta tèb'u b'ada ke noo, j'e tao b'ara j'ula tuu Deo, do mejura ri ama noo Isak rai uru. 2 D'ai pa d'ara he rèmi ta nii ke noo. Pa d'ara lai nii noo, rènge ri noo ta do pedoe noo ri Deo, “Wo Yakob! Ked'i ko we èu, j'e d'èno!”
Ta b'ale ke ri noo, “Ta ngaa?”
3 Ta lii ke Muri, “Yaa ke ne Deo do mejura ri ama èu rai ti do uru. B'ole meda'u èu ta kako la Mesiir. Do ta tao ri Yaa ne kolo-loro èu ta pe'ae pa nii. 4 Ta kako ma Yaa penau hela'u nga èu la Mesiir hine. J'e do ta èbe ma ri Yaa peb'ale ne kolo-loro èu la rai Kana'an. Ki d'ai èu ta made hine, abo ko ma hengaa èu ri Yusuf.”
5 Èla minahère, Yakob nga ana-oha noo heb pekèd'i ke j'e j'ane rae Barseba. J'e peha'e ri roo noo nga ana-oha noo he, la d'ara kereta do moe ri duae Mesiir. 6-7 Ta èba ke ri roo hari-hari unu-oha roo, hari nga b'ada he harièle do unu roo pa rai Kana'an. D'ai ta kako he ke Yakob nga ana noo he, ie ta ana womone, ana wobèni, hari nga nuhi-kej'ako he la rai Mesiir.
Ana-oha Yakob do pedutu la Mesiir
8 Nahed'e ke ne ana-oha Yakob do pedutu la rai Mesiir:c
10 Simeon nga ana noo he: Yemuel, Yamin, Ohad, Yakin, nga Sohar. Nga Saul, do ana nga wobèni do Kana'an.
11 Lewi nga ana noo he: Gerson, Kehat, nga Merari.
12 Yehuda nga ana noo he: Sela, Peres, nga Sera. Ana noo do had'e he: Er nga Onan made pa rai Kana'an. Ègo lema ri noo ana-oha ri Peres: Hesron nga Hamul.
13 Isaskar nga ana noo he: Tola, Pua, Ayub, nga Simron.
14 Sebulon nga ana noo he: Sered, Elon nga Yahleel.
15 Harièle roo he, ana ri Yakob nga ihi èmu noo Lea awe do pa Mesopotamia he ko roo. Era lema roo nga ana wobèni ne ngara Dina. Hiku kolo-loro Yakob nga Lea hari-hari do tèlu nguru tèlu dèu.
16 Era lema ne ana-oha noo nga ihi èmu do hewala he. Gad nga ana-oha noo: Sifion, Hagi, Suni, Esbon, Eri, Arodi, nga Areli.
17 Aser nga ana noo he: Yimna, Yiswa, Yiswi, Beria nga nawèni roo, ne ngara ne Sera.
Era lema ne ana Beria he: Heber nga Malkiel.
18 Era do henguru èna dèu roo hari-hari. Nahère ke ne ana-èpu Yakob nga ihi èmu noo Silpa. Silpa ne, dèu j'èga do wie ri Laban pa ana noo Lea, ihi èmu ri Yakob do uru j'ara nee.
19 Era lema Yakob nga ihi èmu do hewala, ngara ne Rahel. Do d'ue ne ana noo, do tuu ta Yusuf ke nga Benyamin. 20 Awe do napone, do banga èmu pa Mesiir ke Yusuf nga Asnat. Ne ama matu noo, kètu agama pa kota On. Ne ngara noo Potifera. Ne ana Yusuf nga Asnat he Efraim nga Manase.
21 Pedutu lema Benyamin la Mesiir nga ana-oha noo. Ne ana he: Bela, Beker, Asibel, Gera, Naaman, Ehi, Ros, Mupim, Hupim, nga Ared.
22 D'ai ne kolo-loro Yakob nga ihi èmu noo Rahel ne, do he nguru èpa dèu.
23 J'e era riko he dèu ne ihi èmu Yakob, ne ngara Bilha. Ne ana roo, Dan nga Naftali.
Ana ri Dan ne ngara noo Husim.
24 Naftali nga ana noo he: Yasel, Guni, Yeser, nga Silem.
25 Kolo-loro Yakob nga ihi èmu noo Bilha, do pidu dèu. Bilha ne, dèu j'èga ri Rahel do wie ri ama noo Laban.
26 Hiku kolo-loro ri Yakob hari-hari do kako la Mesiir he, do èna nguru èna dèu. Reke ded'o hari nga ana matu he. 27 Taba ri ana Yusuf do metana pa Mesiir he, do d'ue dèu. Hiku Yakob nga ana-oha do pee pa Mesiir hari-hari do pidu nguru dèu.
Peabu wari Yakob nga ana noo Yusuf
28 Ta umu roo ta d'ai la Mesiir, pepue ri Yakob ana noo Yehuda ta kako uru, laa pedoe Yusuf maa peabu nga ama noo pa rai Gosen. Ta d'ai roo la Gosen, 29 ta ha'e ke Yusuf la kereta noo, tuu ta laa peabu nga ama noo la nii. Ta d'ai roo ta peabu, ta ked'ake ke ama noo ri Yusuf, j'e tangi do tui.
30 Ta lii ke Yakob pa Yusuf, “Ana yaa ee, Yusuf! Ngède ke èu ri yaa. J'e toi ke ri yaa ta do muri ko èu. Ri minahère, ta made lema yaa pa ra awe nad'ee, b'ule d'o ta ngaa-ngaa.”
31 D'ai ta pika ke Yusuf pa a'a-ari noo he hari-hari, “Kako ko yaa laa pika pa duae, ta do he ke ne a'a-ari yaa ti rai Kana'an. 32 Ta pika lema ri yaa ta do muu hed'e, dèu do peluja ki'i nga hapi. Ri minahère ke, hiku he do èba rowi muu ne b'ada muu nga unu-oha muu ngati rai Kana'an. 33 Ki pedoa muu ri duae hine, j'e keb'ali pa muu do tima ta j'èga ngaa muu, 34 owe, b'ale j'e ri muu ne lii pedai noo ta muu hari-hari mone b'ata b'ada rai ti naiki, mii ama-èpu muu he. Ki minahère, do ta lii noo pa muu hine ta pee pa rai Gosen.” Ne lii Yusuf minahère, rowi do Mesiir he do d'ai b'ege nga mone b'ata b'ada.