Petada èni Yusuf, j'e ame ama noo ta pida la Mesiir
45
Ta rènge minahère, merèj'e ne ade Yusuf, mèke d'oke ri noo ta tahe pa hed'apa pegawe he. Hiku ta lii ke noo pa roo ta mèhu èni, mij'e nara noo ta pee nga a'a nga ari noo he. J'e pika ta naduu noo. 2 D'ai ta èla pe mèhu èni ne pegawe he, ta tangi do mèdu-mèdu ke Yusuf, tade rènge ri do Mesiir do era pa tele he, lema ri dèu do era pa èmu duae he.3 Ta pika mola ke Yusuf pa a'a nga ari noo he, “Naa ee! Yaa ke ne Yusuf, do mone ari ri muu! Nèi tèra ko ma ama do muri, aa?”
Rènge minahère, made ri meda'u ne a'a nga ari he, tade tada d'oke roo ta lii ngaa ri.
4 Ta pelangu ke roo ri Yusuf, “Naa ee! Peumu èni ko muu ma d'ee.”
Ta laa peumu èni ke roo nga Yusuf. D'ai ta lii rike noo, “Yusuf ke j'e yaa d'ee, do pewie ri muu ne la Mesiir. 5 Tèra ma, ta do èla ta pewie yaa ri muu. Tapulara b'ole meda'u muu, j'e b'ole pehala he dèu nga he dèu. Rowi Deo ma miha do ègo yaa pe'ure ma d'ee ngati muu. Nga minahère, pake yaa ri Noo ta pehelama dèu do lowe, mij'e dod'o made roo ri menganga.
6 Awe menganga d'èlu d'ue b'ue tèu kowe. Dae riko lèmi b'ue tèu. Awe nène, nara d'oke dèu ta para maa, nara d'oke ta k'uja maa, j'e nara d'o nga'a hab'a. 7 Nga ruj'ara dod'o tada ri dii d'ee, ègo yaa ri Deo uru ngati muu, mij'e era do helama ngati muu nga ana-èpu muu.
8 Hiku do petuu ne, ad'o j'e ri j'èga muu pa yaa hiku era pa d'ee, tapulara nad'ee kuaha nga j'èga Deo. Noo do tao yaa ta jad'i ai g'ana duae pa Mesiir. Lema jad'i yaa ta kètu j'èga pa èmu duae. Pi'a d'o dèu do hewala do rihi d'ida ngati yaa.
9 Owe, b'ale we muu hewèka, laa peke ne lii yaa pa ama, lii mihed'e: ‘Ana ri ama, Yusuf ne, nèi ko ma do muri! Do jad'i dèu do mone ketèu ke noo pa rai Mesiir. Ame lema ri noo ama ta mèriai laa Mesiir. 10 Pee ama hine peumu nga noo pa rai Gosen. Ne era nène d'ai woie j'e do keb'èla riko. Nara ama ta peara ki'i nga hapi ama he harièle. J'e ami lema ri noo ta ègu nga ana-èpu, nga harièle b'ara worèwu, puhaka j'e pee pa nii teruu. 11 Ki pa Gosen ama, nara ri noo ta heleo pa nii. Rowi ne awe menganga d'èlu d'ee dae ko lèmi b'ue tèu. Hiku do ta peato ri noo hine mij'e ama, a'a-ari he, nga b'ada ama he hedui d'o pa nengaa-ngaa.’”
12 Ta èla Yusuf pe pika, ta lii rike noo, “Ad'o do ngède ke ri muu ma miha, wod'o? Èu lema Benyamin. Yaa tèra ke Yusuf. 13 Hiku pika pa ama dii ta do kuaha yaa pa Mesiir d'ai mone ae. J'e ped'ire lema ne do ngède ri muu harièle pa ama. Èla pe minahère, j'e ègo ri muu ama mèriai ma d'ee.”
14 D'ai ta ked'ake ke ri noo Benyamin, j'e tangi roo hela'u. 15 Ked'ake lema ri noo ne a'a noo he, j'e hengèd'u ri noo he dèu-he dèu. Èla pe nène, j'e j'ari roo ta pedai lii nga noo.
Duae Mesiir hèmi a'a-ari ri Yusuf he
16 Èla pe nène, made ri mengèlu d'ara duae nga pegawe noo he ta rèngi ta do dèka a'a-ari ri Yusuf he. 17 Ta lii ke duae pa Yusuf, “Yusuf ee! Pika pa a'a nga ari èu he ta ue are pa keledai roo, j'e èba la Kana'an. 18 J'e lii pa roo ta ègo ama èu nga harièle ne a'a-ari èu he ta pida ma d'ee heke roo. Ta wie ma roo ri yaa worai do rihi woie pa Mesiir, mij'e nara roo muri-mada pa nee, nga nara nga'a hab'a la'a ngati worai nène. 19 Lii le pa roo ta ègu d'ènge pèri b'ue kereta ngati d'ee, mij'e nara ta ue naiki he nga ama èu hine. 20 B'ole pereke ne puhaka dod'o nara ta ègu ri roo, rowi harièle do woie pa Mesiir do dae ta unu roo ke hine.”
21 Rènge minahère, ta wie ke roo pèri b'ue kereta ri Yusuf nga b'ara nga'a tuu ta nga'a d'ai telora ruj'ara, pedute nga do pereda ri duae. Lema ne a'a nga ari noo hea ta pemoko èni ke pedute lii duae. 22 Wie lema roo ri Yusuf he dèu-he dèu he mawo b'ara do wiu. Tapulara wie ri noo Benyamin lèmi mawo b'ara do wiu, nga tèlu ngahu doi melaa pudi. 23 Moa lema noo b'ara-b'ara do rihi woie ngati Mesiir wie ama noo, j'e ue ri henguru ngi'u keledai mone. Wie ri noo taba, are, roti, nga b'ara nga'a do pewala-wala, pa dèni henguru keledai rena, mij'e nara ta nga'a ta nginu roo pa ruj'ara ki d'ae ri ta b'ale la Mesiir. 24 Èla pe na nène, ta peb'ale ke roo ri noo, j'e pehengee, “B'ole pehala-pelule j'e muu pa ruj'ara woke!”
Rèngi Yakob ta do muri ko Yusuf
25 D'ai ta b'ale ke roo laa nga ama roo la Kana'an. 26 D'ai la nii, ta pika ke roo pa ama roo, “Ama ee! Ne ko ma j'e Yusuf do muri woke. Nèi ke noo do jad'i ta mone ketèu j'e do pereda pa rai Mesiir!”
Ta rènge ri Yakob, ta dinga ke noo, parahaj'a d'o noo nga do lii roo. 27 Tapulara ta èla pepeke ri roo ne lii pedai Yusuf, nga ngède lema ne kereta do moa ri Yusuf ne ta ue noo la Mesiir, ta parahaj'a ke noo. 28 Ta lii ke noo, “B'otee! Nèi ko ma do muri ana yaa! Nad'ee ko do petuu! Ta laa heleo noo ko ri yaa, mij'e nara yaa ta made nga ie-ae.”