3 Tapulara ta b'ale ke ri Yehuda, “Ama ee! Do helod'o nee, do lii ke j'e ai g'ana ri duae pa j'ii, ta dod'o i'e j'ii ta pengèdi worèwu pa noo, ki dod'o ègo ri j'ii Benyamin do mone ari tèka d'ee! 4 Hiku do j'èma ta gole ri ama ari Benyamin j'e pedutu nga j'ii. Mij'e kako j'ii laa wèli nga'a wie ama. 5 Ki dod'o gole ri ama ta kako Benyamin, kako led'o ma j'ii. Do èla d'oke do Mesiir ne ta lii minahère ri!”

6 D'ai ta lii ke Yakob pa roo, “Ta ngaa ke muu Hiku ma pehedue yaa, nga peke pa noo ta do nee ko he dèu ne ari muu!”

7 Ta b'ale ke ri roo, “Ama ee! Ta mèri nga keb'ali tèj'i j'e dèu ne pa j'ii woke, ta kale toi we a'a-ari dii, lema kale toi j'ara j'ii woke ama. Ne lii keb'ali noo, ‘Minamii? Nèi ko ma ama muu? Era ko ma ke muu nga ari do hewala, we ad'o?’ D'ai j'e ta lii nga ri ke j'ii!? Ta pika mola he ke j'ii. Do toi j'e ri j'ii ne aa, ta do ta lii ta èbe laa nii ne ari j'ii ne, wae?”

8-9 Ta lii ri ke Yehuda, “Gole we naiki d'ee nga j'ii, ama ee! Jaji yaa, ta tago ma ri yaa ki jad'i lai nengaa-ngaa pa noo. Ki do d'o ègo noo ri yaa peb'ale ma ama, hane we ta d'ui-hape ri yaa ne hala. He ke j'ii ta kako, hiku gole we ri ama ne naiki d'ee. Ta kako ke j'ii hewèka mid'o era dii do made ri menganga. 10 Ki ta dod'o pemata he dii mii he d'ee ne worèwu tui, ne petuu nee, d'ue wari ke dii ne b'ale.”

11 D'ai ta lii ke ama roo, “Ki minahère, tao mihed'e we ri muu. Ègu we ri muu b'ara do woie ngati rae dii. Mii: èi oni, b'ara wèu mèngi, raa aj'u mèngi, ruaj'u pèd'a, kenari,^a nga keb'ui do hewala-wala. 12 Èba lema muu doi d'ue wari lipa, mij'e peb'ale ne doi do era pa d'ara karo muu he do helod'o nee. Ngita hala tèka mara dèu he do helod'o nee. 13 Ègo lewe ari muu, j'e hewèka ne b'ale la nii! 14 Henao ri yaa, mij'e Deo do Kerihi Higa, ie mud'e ta wie ai g'ana duae Mesiir lua ruba d'ara penaja nga muu. Tade wae ta peb'ale ri noo pa muu Benyamin nga Simeon, mij'e nara muu ta b'ale hela'u-la'u. Tapulara ki do ta ila ne ana yaa he, pee ke yaa nga hedui teruu.”

15 Èla pe nène, ta laa pekupu ke ri roo ne b'ara do woie nahère, lema doi, j'e ègu la Mesiir. Ègo lema ri roo hari nga Benyamin. D'ai la nii, ta kako ke roo laa peabu nga Yusuf. 16 Ta ngède ri Yusuf Benyamin hela'u nga a'a noo he, ta lii ke noo pa kètu do pemoko lai pa d'ara èmu nee, “Ne'e! Ègu we ne dèu nahed'e la èmu yaa! J'e laa tèb'u he ngi'u hapi j'e hogo pe'ena-ena, do ta nga'a èni lod'o nga yaa roo nèb'o.”

17 D'ai ta j'ège ke ri kètu do pemoko lai pa d'ara èmu pedute nga do lii Yusuf. Ta ègu ke roo laa pengèdu la èmu Yusuf ri noo.

18 D'ai pa ruj'ara la èmu Yusuf, made ri meda'u ne a'a noo he. Pa telora ruj'ara ta pedai ke roo, “Naa ee! Ta ngaa j'e hiku lii noo ta ègu dii ma d'ee? Jaga ta maa pehedui dii ri noo, ri doi do peb'ale ri roo pa dii pa d'ara karo do he wari ne. Ta uku he we roo ta maa pengèdu dii ma d'ee, d'ae nèb'o ta kèpa ke j'ee dii ri roo j'e j'adi ta noo. D'ai j'e raba ne keledai dii ri roo hari-hari.”

19 Ri do minahère, ta umu roo ta d'ai la èmu Yusuf, ta lii ke roo pa kètu do pemoko lai, 20 “B'ole b'ani j'oke, ama! Do ngèdi ke j'ii ta maa wèli nga'a ma d'ee do hewari ne. 21-22 D'ai pa telora ruj'ara ta b'ale la kapo, ta pengaha ihi ke j'ii pa ruj'ara, ta b'èji. D'ai ta buka karo ke j'ii ta penga'a b'ada he. Toi d'o ta minamii mèra, d'ai ne buka ri j'ii ne ub'a karo, era ke ne doi do wèli are he pa d'ara nee. Toi d'o ri j'ii ta tèka ri naduu pa nène. Tapulara he ke do ègu peb'ale ri j'ii ne doi nahère hari-hari. Hiku b'ole b'ani woke, ama oo! Mij'e toi ri ama, he lema j'ii do ègu doi do wala ta ma wèli b'ara nga'a do wiu.”

23 Ta b'ale ke ri kètu do pemoko lai pa d'ara èmu ne, “B'ole meda'u muu! Muri muu ke hino do wie ne mèngi pa d'ara karo he. Do hèmi ke ri yaa harièle ne doi muu do helod'o nee. B'ule d'oke muu nga kèlu!” D'ai ta pemèhu ke ri noo Simeon laa nga roo.

24 Ta maho ke roo hari-hari la èmu Yusuf. D'ai ta tèd'a èi ke kètu do pemoko lai pa d'ara èmu ne, mij'e nara roo ta lonye pemèu ne j'èla roo. Penga'a lema ri noo ne keledai roo he. 25 Ta pika ke noo, “Do ta nga'a nètu lod'o nga ai g'ana duae j'e muu nèb'o.” Pa ra ta mate ne dèka Yusuf ri roo, do peato d'ènge ke ne b'ara ègu do woie unu roo.

26 Ta d'ai Yusuf, ta lèku rutuu ke roo harièle pa hed'apa noo. J'e d'ai, ta j'ula ke ne b'ara ègu roo do woie he wie noo. 27 Ta keb'ali ke Yusuf pa roo, “Minamii? He do ie-ie ma muu, wod'o? Minamii ne ama muu do weka ne, nèi do ie-ie lema noo, we ad'o?”

28 Ta b'ale ke ri roo, “Ne ènu ama, do weka ne, ama j'ii, nèi ma do ie-ie.” Ta peru'u èni ri ke roo j'e j'unu-ru'u pa noo.

29 Èla pe nène, ta heleo pehero ke ri Yusuf, tade ngède ri noo ari noo Benyamin. Roo d'ue he d'ee, do ina-ama hela'u. Ta lii ke noo, “Oweee! Hiku nad'ee ke ne mone ari do ped'ire ri muu do hewari ne, wod'o?”

D'ai ta lii ke noo pa Benyamin, “Ari ee! Henao ri yaa, ie mud'e Deo ta wie ne ie-ae, ne mèngi ne pa èu.”

30 Ta ngède ri noo Benyamin, mèke d'oke ri Yusuf ne hengee, rowi do rihi haj'a tèra noo nga ari noo. Nara d'oke ri noo ta tahe ne hedui pa d'ara noo. Ta petala èni d'ènge ke noo, hani roo, j'e maho la d'ara kama noo. J'e tangi noo dod'o mèke-mèke pa nène. 31 Ta èla pe tangi, ta laa lèb'u èi ke noo. Ta peketèna èni ke noo, j'e mèhu èni laa peabu nga roo. Ta lii ke noo pa dèu pepuu he ta laa peato meja.

32 D'ai tao ke ri roo nga'a wie Yusuf pa meja miha. A'a nga ari noo he pa meja do hewala. Dèu j'èg'a noo, do Mesiir he pa meja do hewala, rowi do Mesiir he do b'ege nga roo, d'èi d'o roo ta mejèd'i hela'u nga do Ibrani he ta nga'a.^b 33 Do peato ke ri kètu do pemoko lai pa d'ara èmu ne ta pemejèd'i pehed'apa nga Yusuf ne a'a nga ari noo he. Peato ri noo he dèu-dèu ta mej'èdi pedutu ne tèu pemuri roo, j'ari rai ngati do mone a'a, hape la do mone ari tèka. B'ingu roo ta ngèdi ta do ato minahère. 34 D'ai ta peato ke ri Yusuf, ta ègu ri dèu pepuu he nga'a ngati meja noo miha, ta wie ne a'a nga ari noo he. Hèmi hela'u we roo ne ae. Tapulara ne wie Benyamin lèmi wari lipa ne ae ti do wie a'a he. D'ai ta nga'a ke roo tade bèhu.