3 Ta pemoko èni ke hari do henguru dèu a'a ri Yusuf he, ta laa wèli nga'a la Mesiir. 4 Tapulara gole d'o ri Yakob mone ari ri Yusuf, Benyamin, ta kako hela'u nga roo. Do nga pereke ke ri noo, “B'ole d'ai naiki nène ta nara hilaka wari!” 5 Rowi pa mii-mii do rèngi ke dèu ta do era nga'a-nginu pa Mesiir, Hiku ae ne dèu do kako laa wèli la nii. Ne awe menganga d'èlu ne, d'ai lema ke lohe la rai Kana'an. D'ai ne ana ri Yakob he^a ta kako leke laa wèli la nii.

6 Awe nène, do jad'i ta ai g'ana duae ke Yusuf pa Mesiir. Kinga dèka dèu laa wèli are ti mii-mii, Yusuf ke ne dèu do pewie d'ee pa roo. Ri do minahère, ta d'ai ta dèka ne a'a noo he, laa lèku rutuu ke roo, j'e j'unu ru'u huma pa noo, tade lèka pa worai ne tangamada roo he. 7-8 Ta ngèdi roo ri noo, ta tada d'ènge ke ri noo. Tapulara ta pe'awu èni ke Yusuf mii dèu do Mesiir, hiku tade d'o noo ri roo. Dai ta keb'ali ke noo nga keja pa roo, “Dèu ngati mii muu hed'e?”

Ta b'ale ke ri roo, “Ngati Kana'an j'ii. Ne dèka j'ii ta maa ami ta wèli nga'a pa ama, wake duae.”

9 Ta hengee ke ri Yusuf ne lai nii noo do uru nee. Ta pemeda'u ke roo ri noo, “Parahaj'a d'o yaa! Muu hed'e ta maa here-here dèu. Dèka muu hed'e ta maa kale toi lai nga lua pa ihi rai Mesiir, j'e d'ai ta b'ale ke muu j'e ma muhu nga j'ii!”

10 Tapulara ta b'ale ke ri roo, “Ad'o, ama ee! J'ii hed'e dèu pepuu pejuu ri ama hewe. Dèka ta ma wèli nga'a he we j'ii. 11 J'ii hed'e ana he ama. Ad'o j'ii ta ma here-here, ama ee! Dèu do mola-do mira j'ii.”

12 Tapulara taba ta mèdu we lii Yusuf, “Weh! Mukoho! B'ole pote kewèru muu pa yaa! Muu he d'ee ta ma here-here dèu tèra ma rii. Tèra ri muu ta ma kale toi lua nga lai pa rai nad'ee!”

13 D'ai ta peb'ale lii ke roo, “Ad'o, ama ee! Dèu pepuu ri ama j'ii hewe j'ii he d'ee! J'ii dèka ngati rai Kana'an. He dèu ama we j'ii harièle. Ne do mone ari tèka ne nèi do hane nga ama j'ii. J'e he dèu ne ari j'ii, pe'e d'oke.”

14 D'ai ta b'ale ke ri Yusuf, “Ad'o! Do petuu ke nengaa ne do lii yaa ngine nee! Ta ma here-here dèu tèra muu he d'ee. 15 Owe aa! Pengède ko ri muu ne tada nee, mij'e toi ri yaa ta do petuu we ad'o ne lii pedai muu ngine. Hupa yaa! Nara d'o muu ta mèhu èni ngati rai nad'ee, kiri dod'o dèka ne mone ari tèka ri muu ne ma d'ee! 16 Hiku pij'e ko ri muu he dèu laa ègo ne mone ari tèka ne ma d'ee. Taha ri yaa ne do had'e he d'ee. Ta heleo ko ri yaa, do petuu we ad'o ne lii pedai muu. Kiri ad'o, do tèra muu ta ma here-here dèu.” 17 Ta pereda ke Yusuf ta b'èdo roo helama tèlu lod'o.

18 Ta d'ai pa lod'o do ketèlu nee, ta kako ke Yusuf laa pedai lii nga roo la d'ara èmu b'èdo ne, “Yaa d'ee, dèu do med'au ri Muri. J'e do d'ai pedute ri yaa ne do d'èi Noo. Do ta golo muu ri yaa, mij'e nara muu ta muri-mada. Tapulara ne he èhi lai. 19 Ki do petuu tèra ne lii pedai muu nène, ped'elo ko ri muu ne tada ne pa yaa. Mihed'e ne loro j'ara nee: tahe ri yaa pa d'ara èmu b'èdo d'ee he dèu. B'ale do had'e hed'e nga ègu nga'a wie ina-ama muu. Rowi hèi ke roo do mata muu nga ègu nga'a-nginu. 20 J'e d'ai b'ale muu nga ègu ari muu nee, he mii tada ta muu hed'e dèu do mola do mira. Mij'e dod'o wolo muu ri yaa pemade.”

Rènge minahère, ta pedute ke ri roo. 21 D'ai ta pedai ke roo he dèu nga he dèu, “Owe aa! Lèka ke dii ta hape ne hala do tao ri dii do uru nee, do èle pe tao rowi dii pa ari dii. Do ngède ke ri dii ne hedui-herui noo, tade ami-huba noo, tapulara ped'èno d'o dii nga noo. Ri minahère ke, Hiku hedui-herui dii minahed'e.”

22 Ta pehengee ke roo ri Ruben, “Wo ari yaa! Do lii ke yaa pa muu uru ne, ta b'ole tao ngaa-ngaa pa naiki nène! Tapulara wae d'o muu ta d'èno ne lii pedai yaa. Ri minahère ke j'e, hiku hape ri dii ne raa Yusuf.” 23 Pedai roo minahère, tapulara toi d'o ri roo ta do tada ma Yusuf ne lii pedai roo. Rowi pa d'ara pedai lii Yusuf nga roo, do pake lii Mesiir noo, j'e peb'ale ri mone peb'ale lii ne la lii Ibrani.

24 Ta rènge ne lii pedai roo do minahère, ta kèd'i ke Yusuf j'e hani roo, j'e kako noo laa tangi miha pa era do hewala. Ta èla noo pe tangi, ta b'ale wari ke noo laa nga roo. D'ai ta lii ke noo pa dèu ta 'èke Simeon pa hed'apa tuèhu-tuèhu noo.

25 Èla mihère, ta pereda ke Yusuf pa dèu j'èga noo, ta ihi are pa karo a'a noo he. J'e ihi peb'ale ne doi roo he dèu-he dèu la d'ara karo he. Wie lema ri noo nga'a tuu pa ruj'ara kako. Ta pedute ke ri dèu j'èga he ne do lii Yusuf. 26 Èla pe minahère, ta peha'e ke ri a'a ri Yusuf he, hari-hari ne are he la rudèni keledai roo. Èla pe minahère ta kèd'i ke roo j'e b'ale.

27 Ta pengaha keloe ke roo d'èi telora ruj'ara. D'ai, he dèu ngati roo ta ma'e ke ne dari 'èki uba karo unu noo, tuu ta penga'e ne keledai noo. Tapulara ta ngède ke ri noo doi noo pa d'ida are ne. 28 Made noo ne keb'èdi! Ta pekaa ke noo pa a'a noo he, “B'otee! Mai ko ri muu ma heleo! Paj'a ke dii nad'ee! Ne ke do peb'ale ri roo doi yaa pa d'ara karo d'ee.”

Ta ngède minahère, lila nèd'a roo j'e meda'u hetenga made. D'ai ta pedai ke roo he dèu nga he dèu, “Tao nengaa ri ke Deo penaja nga dii hed'e?”

29 Ta kako ke roo teruu. Ta d'ai la Kana'an, ta ped'iri ke ri roo hari-hari ne lai do jad'i pa ama roo. 30 Ta peke ke ri roo, “Ama ee! D'ai tèra ee, ne ai g'ana ri duae Mesiir. D'ai kèji d'ènge ne lii pedai noo. Pe'ènyi j'ii ri noo, ta do j'ii he d'ee ta laa here-here rai noo. 31 Ta b'ale ke ri j'ii, ‘Ad'o oo! Ta pika mola j'ii. Ad'o j'e j'ii he d'ee ta ma here-here. 32 Dèu do ie-do ae j'e j'ii. Do petuèhu he nguru do d'ue dèu j'ii hari-hari, j'e ana he dèu ama we. Tapulara pe'e d'oke he dèu, j'e ne mone ari tèka ne nèi do hane pa Kana'an nga ama.’

33 D'ai ane ai g'ana duae, ‘Ta hèku muu ko ri yaa, do mola muu, we ad'o! He dèu ngati muu do j'èma ta pee pa d'ee. B'ale do had'e he, nga ègu are wie ina-ama muu, mij'e dod'o made roo ri menganga d'èlu. 34 Do j'èma ri muu ta ègo ne ari muu nee. Nga minahère ko, j'e toi muu ri yaa ta ad'o ta ma here-here, tapulara muu he d'ee dèu do mola-do mira ma. Mij'e nara ri yaa ta gole ne tuèhu muu do tahe ri yaa ne. Èla minahère, wie muu ri yaa kehoo, ta lèpa la mii we pa rai nad'ee.’”

35 Ta èle pe ped'iri, ta ma'i ke ri roo ne dari 'èki karo roo. D'ae ne ngèdi ri roo era ko ma ne doi he pa d'ara karo roo. Made Yakob nga ana noo he ri meda'u ta ngède minahère.

36 Ta èla pe minahère, ta lii ke Yakob pa roo, “Èla ke ri muu he d'ee ta peila ne ana yaa he. Pe'e d'oke Yusuf. Mihère lema Simeon. J'e ne rike ri muu ta ègo Benyamin, wod'o? D'ai tèra-tèra muu he d'ee ta pehedue yaa we!”

37 D'ai ta lii ke Ruben pa ama noo, “Ama ee, gole we Benyamin nga yaa. Ta d'ue-hape ma ri yaa hari-hari. Nga jaji yaa, ta peb'ale ma ri yaa noo pa ama. J'e kiri dod'o ègo ri yaa peb'ale, ta pemade we ri ama ne ana yaa womone do d'ue dèu he.”

38 Tapulara ta b'ale ke ri Yakob, “Jad'i d'o! Ie d'o ri muu ta ègo Benyamin. Nee noo ke miha rowi a'a noo Yusuf do èla ke ta made. J'e kiri hilaka ri noo pa telora ruj'ara, ta taba ta pepèd'e we kewadu kètu yaa ri muu tade made yaa.”^b