3 D'ai, ta era wari ke pidu ngi'u hapi do mèhu èni ngati d'ara loko na punène. Ne ngi'u roo do melaka teku-teku. J'e titu roo pe'umu èni nga hapi do keb'èb'u he. 4 Èla pe nène, ne pidu ngi'u hapi do keb'èb'u he ta dèla bolo ke ri pidu ngi'u hapi do melaka he. Ta kebèdi ke duae j'e kèd'i.

5 Tui d'o, ta luu ri ke noo j'e nii wari. Ngèdi ri noo pidu wuri are do kehèb'a do nga ihi ngati he kepue do mengèru. 6 D'ai ta ngèdi wari ke ri noo pidu wuri are do woapa, do meraj'u lèka ri ngèlu pana. 7 J'e hari èle ne pidu wuri are do nga ihi he, ta dèle bolo ke ri pidu wuri are do woapa he. D'ai, ta kebèd'i ke duae j'e kèd'i. Itu ta toi rike ri noo, ta do nii wari noo.

8 D'ai ta j'èmi ae, ta pengee hedui ke duae. Ta pereda ke duae pa dèu he la pedoa hari-hari mone uri kerèi nga dèu do mèu d'ara pa Mesiir. D'ai ta ped'ire ke ne lai nii noo pa roo, tapulara b'ule d'o he dèu-dèu he do nara ta pika ne ihi lai nii do napone.

9 D'ai, mone pemoko nginu tuu duae ne, itu ta henge ko ri noo Yusuf. Ta kako ke noo laa pika ke pa duae, “Muri mone. Ne ta kelolo hala ko yaa. 10 Ta bubu d'ara ama nga yaa nga hianga yaa, j'e pemaho b'èdo uru ne, 11 pa d'ara he rèmi ta nii ke j'ii d'ue. Nga lai nii miha-miha lema ne ihi lai nii j'ii he do pewala-wala. 12 Pa d'ara èmu b'èdo nène era he dèu do ngèru do Ibrani. Do ngèdi noo ta jad'i ènu ti kètu èmu b'èdo duae. Ta ped'ire ke ri j'ii pa noo ne lai nii j'ii he. Ta peke ke ri noo ne ihi lai nii he. 13 Ri mihère ke Hiku tuu yaa ta d'ede keb'ali ri duae. Tapulara hianga yaa ne wole pemade. Hiku hari-hari nahère, hela'u we nga lii do Ibrani nee!”

14 Ta rènge minahère, ta pepuu ke duae dèu laa èbe Yusuf ti d'ara èmu b'èdo nga hewèka. D'ai ta pemèu èni ke Yusuf, luhu ruu ub'a ruu wii, hèu b'ara pa ue noo, j'e laa peabu nga duae. 15 Ta d'ai noo, ta lii ke duae, “Ana do ngèru, ee! Era nga lai nii yaa, tapulara b'ule d'o he dèu he do nara ta toi ne ihi lai nii nee. J'e era dèu do pika pa yaa ta do i'a èu ane.”

16 Ta b'ale ke ri Yusuf, “Muri mone. Tada led'o ma yaa ngaa-ngaa. Wata Deo Muri we do nara ta toi nga petuu ne ihi lai nii nee. B'ara tatu ta peke pa muri mone ri Noo lai do petuu.”

17 D'ai ta ped'ire ke ri duae, “Pa d'ara lai nii yaa do napone, era do titu yaa pa ngidi loko Nil. 18 Moko ta era pidu ngi'u hapi do hemob'o-hemob'o. Mèhu èni ke roo ngati d'ara loko, j'e laa nga'a j'u'u pa ngidi loko nee. 19 D'ai ta era wari ke pidu ngi'u hapi do hewala ne dèka. Tapulara ne hapi nahère do melaka teku-teku. Pa rai Mesiir d'ee, ngèdi dae d'o yaa hapi do melaka teku-teku minahère! 20 B'ara hera yaa! J'e keb'èdi, ne pidu ngi'u hapi do melaka he, ta dèla bolo ke ne pidu hapi do hemob'o-hemob'o he. 21 Ta èla ri roo pe dèla bolo, pee ma roo nga melaka. D'ai ta keb'èdi ke yaa j'e kèd'i.

22 Èla pe napone, ta luu rike yaa, j'e nii wari. Ta ngèdi rike ri yaa pidu wuri are do nga ihi, do kehèb'a ngati he kepue do mangèru. 23 D'ai ta ngèdi wari ke ri yaa pidu wuri are do woapa, do meraj'u lèka ri ngèlu pana. 24 Lema hari-hari ne wuri are do apa he, dèla bolo ne pidu wuri are do nga ihi he. D'ai ta kèd'i ke yaa. J'e ped'ire ri yaa ne lai nii pa dèu do mèu d'ara he. B'ule d'o he dèu he do nara ta toi ne ihi lai nii nee.”

25 D'ai ta peke ke ri Yusuf, “Muri mone. Ne d'ue ihi lai nii nahère, he èhi we. Deo do èla pepeke d'ènge pa muri mone nengaa ne do ta tao ri Noo. 26 Ne ihi lai nii ne mihed'e: ne pidu ngi'u hapi do hemob'o-hemob'o he nga pidu wuri are do nga ihi he, na ène pidu b'ue tèu awe b'èhu d'èlu. Ne ihi noo èhi we. 27 J'e, ne pidu ngi'u hapi do melaka teku-teku he nga pidu wuri are do woapa he, nène pidu b'ue tèu awe menganga d'èlu.

28 Hiku do pika d'ènge ke ri Deo nengaa ne do d'èi ta j'èga ri Noo. Napone hela'u nga do lii yaa ngine. 29 Do dae dii ta nara awe b'èhu d'èlu pa d'ara pidu b'ue tèu pa hari-hari era pa rai Mesiir. 30-31 Èla pe napone, j'e itu abo ri dii awe menganga d'èlu pidu b'ue tèu. J'e d'ai ne awe menganga d'èlu do rihi hedui! Tade dod'o b'ule nga'a-nginu pa rai nad'ee. Hari-hari dèu menganga d'èlu keb'ake, tade dod'o hengee wari rowi roo ne awe b'èhu d'èlu nee.

32 Owe! Ne lai nii muri mone tade d'ue wari napone, ne ihi ne, do peato d'ènge ke ri Deo. Tui d'oke ne awe, nengaa ne do peato rowi Noo, do dae ta peteleo.

33 Rowi napone ke, ne lii yaa mihed'e: rihi ie muri mone ta kale he dèu do mèu d'ara, do nara ta peato nga woie. D'ai j'e d'ede noo tuu ta pemane nga woie ne rai nad'ee. 34 Awe b'èhu d'èlu do pidu b'ue tau ne, rihi ie ta d'ede ri muri mone dèu do hewala ri, tuu ta pekupe ne nga'a hab'a doke rihi he ri roo. J'e nga'a hab'a do napone, peb'age lèmi pala ri roo j'e tèke he pala. 35 Do j'èma ri roo ta pedute ne lii pereda muri mone, tuu ta ègu are ngati hari-hari kejob'o pa Mesiir. D'ai j'e tèka rowi roo ne are nahère pa hoka-hoka j'e heleo pe'ie. 36 Kiri d'ae ne awe menganga d'èlu do pidu b'ue tèu nee, era ko dii nga nga'a hab'a. Ki do peato minahère, b'ule d'oke dèu do made ri menganga d'èlu.”

37 Ta rènge lii pedai Yusuf minahère, ta pedute ke ri duae nga pegawe do d'ida he nengaa ne doo pale ri Yusuf ne. 38 D'ai ta lii ke duae, “Kuaha ngati Hengaa Deo do era d'ènge ke pa Yusuf. Ri do minahère, mud'e d'o ke dii ta nara dèu do hewala wari, do rihi ngati noo.”

39 Ta pedai lii ke duae nga Yusuf, “Do èla ke pepeke ri Deo harièle ne lai nahee pa èu. Itu ta toi ko we ri j'ii ta dèu do mèu d'ara èu. J'e ne mèu d'ara èu d'ee do rihi ngati hari-hari dèu. 40 Ri minahère ke, d'ede èu ri yaa ta jad'i ai g'ana yaa, j'è jad'i èu ta kètu pa èmu yaa. J'e d'ae ne dèu pa rai pereda yaa hine do ta pedute ne lii pereda èu. Titu-wata yaa we miha do rihi ngati èu.”

41-42 Èla pe mihère, ta mèhu ke ri duae ne teru'u cap noo, j'e pepake pa kolo ku'u Yusuf, ta lii ke noo, “Mihed'e ke, ne d'ede èu ri yaa ta jad'i ai g'ana yaa pa harièle rai Mesiir.” J'e pepake lema ri noo he b'èla b'aj'u madera do lumu pa Yusuf, nga pepake rate melaa pa lakoko noo.

43 Èla pe nène, ta wie ke ne kereta jara do nome d'ue ne ta ha'e ri Yusuf. J'e era dèu do perai pa hed'apa kereta ne nga pekaa mèri, “Naa ee! Wie ko ruj'ara! Pej'unu èni!^a Ne do kepai do ta lake!” Ne tao mihère, èla ke Yusuf ta d'ede ri duae ta jad'i ai g'ana noo pa rai Mesiir.

44 Èla pe minahère, ta lii ke duae pa Yusuf, “Mihed'e. Do toi ma ke ri èu ta yaa d'ee duae. J'e do èla ke ri yaa pepeke pa harièle dèu pa rai Mesiir, ki d'o wie lua ri èu, nara d'o roo ta tao ngaa-ngaa.”

45 D'ai ta pehune ngara ke Yusuf ri duae ta, Safnat Panea, pedutu ngara do Mesiir. Pebange èmu lema ri noo Yusuf nga he dèu wobèni do ngara ta Asnat. Ama matu ri Yusuf, ne ngara Potifera. Noo hedèu kètu agama pa rae On.^b Nga mihère, Yusuf jad'i ta mone ketèu pa rai Mesiir.

46 Awe ta d'ede ri roo Yusuf ne pemuri noo tèlu nguru b'ue tèu. Èla pe napuhère, ta kako ke noo laa pehero hari he wue rai Mesiir. 47 Pa awe b'èhu d'èlu pidu b'ue tèu nee, d'ai ae ne nga'a hab'a he. 48 D'ai ta laa pekupu ke ne nga'a hab'a do rihi he ri Yusuf, j'e tèka ri noo. Nga'a hab'a pa era napone, pekupe j'e tèke pa era nène lema. 49 D'ai ne nga'a hab'a do pekupu ri noo nahère, d'ai ae, mii wolahalae pa tèbi dahi, tade dod'o nara ta reke ri dèu.

50 Nga dod'o d'ai dae pa awe menganga d'èlu, ihi èmu ri Yusuf Asnat èla ke pekehoo d'ara do d'ue dèu ana womone. 51 Ta lii ke Yusuf, “Èla ke ri Deo ta pebèlo ne lai hedui-herui yaa para ta mèhu èni yaa ngati èmu ama yaa.” Ri do minahère ke, Hiku pehune ri noo ne ngara ana noo do mone a'a nee ta, Manase (ne ngara ne do ègi ta hela'u nga lii, ne ihi ne, lii ta ‘bèlo’).

52 Awe ta nara ana do ked'ue, ta lii ke noo, “Do nara hedui-herui do rihi ae yaa pa era nad'ee. Tapulara Deo do èla ke pewie mèngi ta era nga ana yaa pa d'ee.” Ta pehune ke ri noo ngara naiki ne, ta Efraim.^c

53 D'ai ta èle ke pidu b'ue tèu awe b'èhu d'èlu ne. 54 Moko ta d'ai ke pa awe pidu b'ue tèu menganga d'èlu, he minamii nga do pale ri Yusuf do uru nee. Pa rai do hewala he, dèu do menganga d'èlu ke. Tapulara pa harièle rae pa Mesiir era ko ma nga'a-nginu, rowi do tèka-tèka ko pa hoka he. 55 Ta tui ne awe, ta menganga d'èlu lema ke do Mesiir he. Ta laa ami nga'a ke roo pa duae. Ta pepuu ke roo ri duae laa nga Yusuf, mij'e pedute nengaa ne do pereda ri Yusuf.

56 Tapulara ne awe menganga d'èlu ne taba mejèni we, tade hari he wue rae pa Mesiir lèka lewe. Ta buka ke ri Yusuf harièle hoka he, j'e pewie are tuu dèu do Mesiir he. 57 Èla pe napone, ta dèka ke dèu ti mii-mii laa wèli nga'a ti Yusuf pa rae Mesiir, rowi awe menganga d'èlu keb'ake do d'ai tèra ne hedui.