Pika Yusuf j'ara lua ihi lai nii do d'ue dèu pa èmu b'èdo ne
40
1-3 Pa d'ara èmu b'èdo do napone, era do d'ue dèu do jad'i ta kètu pemane pa èmu pee duae Mesiir. He dèu pemane nginu tuu duae. J'e do he dèu ne wari pemane roti tuu duae. Ta tao hala ke roo d'ue penaja nga duae. Hiku ta b'ani ke duae, tade pemaho roo ri noo la èmu b'èdo. Hiku do pee hela'u era roo d'ue nga Yusuf. 4 Ta èla do napone, ta pereda ke kètu èmu b'èdo ne pa Yusuf tuu ta peato do d'ue dèu nahère. Pee roo pa nène tade he ue d'ue b'ue tèu.5 Pa d'ara he rèmi, ta nii ke do d'ue dèu pegawe nahère nga lai nii miha-miha. J'e ne ihi lai nii he lema do wala-wala. 6 D'ai ta do b'èrirai ne, ta dèka ke Yusuf, j'e ngèdi roo ta do hedui pengee. 7 Ta keb'ali ke noo pa roo, “J'e ta peheb'uru èni minahed'e ke muu ri, ta ngaa j'e muu lod'o d'ee ne?”
8 Ta b'ale ke ri roo, “Nii j'ii mèd'a ne, j'e toi d'o ri j'ii ne ihi lai nii d'ee.”
Ta lii ke Yusuf, “B'ule d'o he dèu he dèu pa rai-wawa do toi j'ara ihi lua lai nii, wata ke Muri dii we Deo. Hèko ko ri muu ta ped'ire, ta kale toi ko ri yaa ne ihi lai nii ne ngati Muri.”
9 Ta èla do napone, dèu do pemoko nginu tuu duae nee, ta ped'iri ke, “Mihed'e, lai nii yaa d'ee ngède ri yaa he kepue ago, 10 do kejanga tèlu. J'e na'aj'u napone era d'ènge do muri ri rèu, j'e wila, j'e wue noo do kerago-rago do ihi. 11 D'ai ta ngède ke ri yaa, do nga pèro ri yaa ne kab'a nginu duae. Ta ègo ke ri yaa wue ago ne j'e pehèle la d'ara kab'a nginu duae. Ta èla napone, ta j'ole ke ri yaa pa duae ta ngino.”
12 Rènge minahère, ta peke ke ri Yusuf, “Ama. Ne ihi lai nii do napone minahed'e: ne pedèb'o ti kejanga tèlu napone, tèlu lod'o. 13 Pa d'ara tèlu lod'o do nad'ee, do madae ta pemèhu ama ngati èmu bèdo d'ee ri duae. J'e d'ede keb'ali ama ri noo, ta mone pemoko nginu tuu duae, he mii do uru nee. 14 Kinga ie ne muri-mada ama minahère, b'ole bèlo j'e yaa woke! Kiri do haj'a ama nga yaa, tulu le ta peke pa duae, mij'e pekelua le yaa ngati d'ee ri noo. 15 Kiri do petuu ne, ta ègo mena'o we yaa ri roo ngati telora rae do Ibrani he. Ad'o j'e yaa d'ee do tao lai apa kerewe. Tapulara toi d'o ta minamii mèra, ta era we yaa ta pemaho èmu b'èdo ri roo. Mii d'èu do tao apa kerewe he yaa.”
16 Ta rènge ne ihi lai nii napone ta do woie minahère, ta ped'iri leke ne dèu do pemoko roti ne pa Yusuf, “Ari ee, mii nahee ne lii nii yaa: era do tèd'u tèlu hope do peb'aja yaa. 17 Hope do pa d'ida ne, era do ihi hekera'a-hekera'a koki unu duae. Ta dèka ke ne dolila ma tute pe'èla ne koki he hari-hari ngati wokolo yaa.”
18 Rènge mihère, ta lii ke Yusuf, “Ne ihi lai nii ama ne minahed'e: ne pedèb'o tèlu b'ue hope napone, tèlu lod'o lema. 19 Pa d'ara awe tèlu lod'o d'ee, do medae ta pepuu ri duae dèu ta laa 'ète kètu ama. Ta ketoe ngi'u ama ri roo pa aj'u ketoe. J'e dèka ne dolila ma tute pe èle ne keb'ue-kedèli ama.”
20 Rihi ngati tèlu lod'o, pemèhi pa lod'o metana duae, ta tao lai do mone ae ke duae tuu harièle pegawe noo. Ta pereda ke noo ta laa pemèhu ngati dara èmu b'èdo ne do d'ue dèu pegawe he. 21 Ta d'ede ke ri duae keb'ali dèu mone pemoko nginu tuu noo, la tenge noo do uru nee, tuu ta pemoke keb'ali ri noo nginu tuu duae.
22 Tapulara, ne dèu j'èga do pemoko roti unu duae nee, ta ketoe ke noo ri roo tade made, pehela'u nga do lii Yusuf ne.
23 J'e mone pemoko nginu ne, hengee d'oke ri noo Yusuf. Bèlo luu-luu ke ri noo Yusuf.