Yusuf nga ihi èmu ri dokepai Potifar
39
1-2 Awe nène, do ègo ke Yusuf la Mesiir ri do Isma'el he. Pa nène era he dèu dokepai, ne ngara noo Potifar. Noo kètu horod'ad'u pa èmu duae Mesiir. Ta wèle ke Yusuf ri Potifar ngati mone d'aga he ta jadí naènu pa èmu noo. Pa nee do era Deo Muri hela'u nga Yusuf, hiku nengaa ne do j'ège ri noo d'ai woie. 3 Ta ngède ri dokepai Potifar ta do rihi woie ne j'èga Yusuf, do toi petuu ke ri noo ta do era DEO do penau hela'u nga Yusuf. 4 Ri do minahère d'ai d'èi dokepai ne nga Yusuf nga parahaj'a nga noo. D'ai ta d'ede ke Yusuf ri noo ta kètu pa èmu noo. Wie lema ri noo kuaha pa Yusuf ta heleo ne èmu-kemali nga unu-oha noo he. 5 Rai ta j'ari Yusuf ta jad'i kètu pa nee, wie lema ne mèngi pa dokepai unu noo nène ri DEO. Èmu-kemali noo, unu-oha noo, d'oka noo, nga nengaa ne do j'ège ri noo do jad'i nga woie. 6 D'ai ta ngède Yusuf ri Potifar ta do pemoko hari-hari j'èga nga woie, b'ule d'oke noo nga pereke nengaa-ngaa, wata ke noo tada ta nga'a hewe.Awe nène, d'ai mone ie Yusuf. 7 Tui ded'o noo ne pee pa nii, tapulara ta d'èi ke ihi èmu Potifar nga noo. Lema ta ube-ube ke ri noo Yusuf ta bèj'i hela'u nga noo.
8 Tapulara wae d'o Yusuf. Ta lii ke noo, “B'ole tao minahère, ina ee! Do wie kuaha ke pa yaa ri dokepai Potifar ta heleo harièle ne j'ège unu noo. 9 Pa d'ara èmu nad'ee, b'ule d'o dèu do nga kuaha do rihi ngati yaa. Wata ina we, dod'o b'ule yaa nga higa ta heleo. Ta minamii ke yaa ne tao woapa minahère! J'e nène lema dod'o mèd'i pa do d'èi Deo Muri!”
10 Ta minahère lema, helod'o-lod'o ne ame ri ihi èmu dokepai d'ee, tapulara mèta d'ara led'o Yusuf.
11 D'ai pa d'ara he awe, ta maho ke Yusuf laa pehod'o ne j'èga noo pa d'ara èmu ne. Lod'o na punène, pi'a d'o dèu do hewala pa d'ara èmu ne. 12 Ta d'èka ke ne ihi èmu dokepai ne laa ème b'aj'u Yusuf, j'e lii noo, “Mai we! Mai we dii laa bèj'i, he dii ked'ue pa d'ee.”
Tapulara wae d'o Yusuf. D'ai ta wèju èni ke noo tade mèhu ne b'aju nee, j'e perai la tele. Tapulara do ème koma ne b'aju ne, ri wobèni nee.
13 Ta heleo ke ri ihi èmu Potifar ta do perai la tele ne Yusuf nga hane ne b'aj'u ne, 14-15 ta pedoa ke ri noo ne dèu do j'èga he, j'e pika, “Wo naa! Mai ko ma heleo ri muu! Womone do Ibrani ne maho ma d'ara kama yaa ngine. Ta maa tao keriu noo pa yaa, ta pekaa ke yaa do mèdu-mèdu. Uni nad'ee ne b'aj'u nee, ne hane ri noo j'e perai la tele. Ihi èmu yaa d'ee ègu dèu dod'o b'ule nga had'a ma pemekae d'ara dii we!”
16 Do ème ko ma ne b'aj'u ne ri ihi èmu Potifar tade b'ale ihi èmu noo. 17 Ta d'ai ta dèka ihi èmu noo, ta ped'iri ke noo, “Ama noo ee! Womone Ibrani do ègo ri èu ma d'ee ne we, ngine ne maho noo ma d'ara kama yaa, ta ma tao apa kerewe pa yaa! 18 Ta pekaa ke yaa do mèdu-mèdu pelangu dèu, ta perai ke noo j'e j'ane ne b'aj'u d'ee.”
19 Ta rènge ne lii ped'iri ihi èmu noo do minahère, bubu d'ara dod'o mèke ke Potifar. 20 Ta lii d'ènge ke noo pa dèu he ta laa kèpe Yusuf. D'ai ta pemaho ke ri roo Yusuf la d'ara èmu b'èdo duae.
21 Maji le ta minahère bèlo d'o noo ri DEO, do lere-hed'èhe ma noo ri DEO, tade kètu èmu b'èdo ne le d'ai d'èi nga Yusuf. 22 Ta parahaj'a ri ke noo nga Yusuf, ta heleo-hed'èhi ne dèu pa d'ara èmu b'èdo he, nga hari-hari j'èga pa nee. 23 Hiku kètu èmu b'èdo d'ee bule d'oke nga pereke ta j'èga nengaa-ngaa. Do ruba d'ara peloro ma DEO nga Yusuf, hiku harièle j'èga pa èmu b'èdo d'ee do moko nga ie nga ae.