Yehuda nga ana matu noo Tamar
38
Èla pe nène, ta j'ani ke ri Yehuda ne a'a nga ari noo he, j'e kako laa pee pa rae Adulam nga hianga noo Hira. 2 Era he dèu ama pa ène, do Kana'an, ne ngara noo Sua. Ta d'èi ke Yehuda nga ana ri Sua, ta banga èmu ke roo d'ue. Èla pe nène, ta era ke roo nga do pèri dèu ana womone do pelere. 3 Do mone a'a ne wie ngara ta Er. 4 D'ai do mone ked'ue ne, ngara ne Onan. 5 D'ai do mone ketèlu ne, ngara Sela. Ta pida ke roo la rae do hewala pa d'ara metana Sela, ne ngara rae nee Kesib.6 Ta d'ai ta kepai ne ana mone a'a ne, do ngara ta Er, ta laa maho ami ke wie noo Yehuda hedèu wobèni ne ngara ne Tamar. Ta banga èmu ke roo d'ue. 7 Tapulara d'ai woapa had'a Er. Ri do minahère, wole noo pemade ri Muri. Hiku made Er nga dod'o era ana.
8 Èla pe na ène, ta lii ke Yehuda pa ana noo do nome ked'ue ne, “Onan! Èla ke a'a èu ta made, tapulara b'ule d'o nga ana. Ri do minahère, pa uku do kepai, do j'èma èu ta gate a'a èu ta banga èmu nga ihi èmu noo, mij'e nara ta wie kolo-loro tuu a'a èu.”
9 Do toi ke ri Onan ne uku nène. Tapulara wae d'o noo ta pe'era nga ana tu kolo-loro a'a noo Er. Hiku kinga bèj'i noo nga Tamar, tao apa noo, mij'e dod'o era ana nga Tamar. Ri do medae ta ad'o kolo-loro noo hine, Hiku wae d'o noo ta pe'era ana ta wie rukolo, ta natuu a'a noo. 10 B'ani d'ai Muri ngaa nengaa do j'èga Onan. Ri do minahère hiku wole noo pemade ri Muri.
11 Ta ngèdi ri Yehuda hari do d'ue ana noo do banga èmu nga Tamar ta made, made noo ri meda'u. Ta pereke ke ri noo, b'ole d'ai ri ana noo Sela do mone ari ne ta banga èmu nga Tamar, ki ad'o made rike noo. Ta laa lii ke noo pa ana matu noo Tamar, “Ana yaa ee. Rihi ie, ta b'ale kowe èu laa nga ina-ama èu. Kinga kepai ana yaa Sela hine, j'e b'ale èu ma banga èmu nga noo.” Èla pe nanee, ta b'ale ke Tamar.
12 Ta d'ai ta pèri b'ue tèu, ta made lema ke ihi èmu Yehuda. Hiku d'ai hedui noo, tade èle ne awe hedui nee.a Ta tene ke ri noo hianga noo Hira, mij'e kako roo d'ue la rae Timna. Pa tima pa nène, do ae dèu do pekupu ta luhu reù ki'i j'awa ta pewie.
13 Ta pika ke dèu pa Tamar, “Nèi ke ama matu èu la Timna laa kale dèu mij'e nara ta luhu ne rèu ki'i j'awa noo he.”
14 Awe nène, do kepai ke Sela ana mone ari tèka ri Yehuda. Tapulara do toi ke ri Tamar ta dod'o wae ama matu noo ta pebanga èmu Sela nga noo. Ta kale ruj'ara ke Tamar, tuu ta hème ne higa noo. Ta ma'i ke ne b'ara wobèni ue noo, j'e gati ri b'ara do woie. Ta pake ke noo heleda ta henèb'e ne kètu noo nga tangamada noo. D'ai, ta laa mejèd'i ke noo la toka rae Enaim pa ruj'ara do ta la Timna. 15 Ta lake ke Yehuda d'ai toka rae napone. Ta ngède ke ri noo he dèu wobèni. Ènye ri noo ta mobeni do manga-mèd'a, rowi do nga pake b'ara do d'ai kele'e, j'e do henèb'e riko ne tangamada nee. 16 Toi d'o ri Yehuda ta ana matu noo ne wobèni nène. Ta laa peumu èni ke noo nga wobèni napone, j'e keb'ali, “Ina! Ki nga yaa, d'èi ta ma'i hengaa èu we?”
Ta b'ale ke ri Tamar, “Owe, e'e ri ama wee.”
17 Ta tawe ke ri Yehuda, “Minamii ki wie èu ri yaa he ngi'u ki'i hawu?”
Ta b'ale ke ri Tamar, “Ie lema, ama. Had'i ta wie we ri ama ne b'ara ta èmi ri yaa, tade dèka ne ki'i do ta wie ri ama hine. Ki d'ai j'e moe ri ama ne ki'i hawu ne leto.”
18-19 Ta keb'ali rike Yehuda, “B'ara nengaa ke do j'èma ta wie pa èu ri yaa?”
Ta b'ale ke ri Tamar, “Hane we ri ama ne cap do perète napone, nga dari do pa lakoko ama ne. J'e hane le ne kèji napone.” Rènge minahère, ta wie ke b'ara nahère pa noo ri Yehuda.
Ta bèj'i hela'u ke roo d'ue, j'e era nga ihi. Èle pe napone, ta b'ale ke Tamar. Ta ma'i ke ne b'ara pake noo do kele'e he nga heleda noo, j'e pake ri ne b'ara wobèni wue noo.
20 Ta tui b'èle, ta ami tulu ke Yehuda pa hianga noo Hira, “Ègu ko ri èu ne ki'i nad'ee laa wie pa wobèni do manga-mèd'a pa Enaim nee, j'e hèmi keb'ali ne b'ara unu yaa do èmi ri noo he.” Ta d'ai Hira la nii, ta keb'ale ke ri noo pa dèu pa nène, tapulara pi'a d'o do peabu nga wobèni nène. 21 Ta keb'ale-b'ale ke ri noo pa dèu pa nee, “Naa ee! Ngède ri muu ne wobèni do manga-mèd'a do tima ta mejèd'i pa toka rae pa d'ee, we ad'o? Nèi pa mii noo, ee?”
Ta b'ale ke ri roo, “Ama, pi'a d'o pa d'ee wobèni do manga-mèd'a.”
22 Hiku ta b'ale ke Hira la nga Yehuda. Ta peke ke ri noo, “Ngède d'o ri yaa ne wobèni nène. Kale-kale make ri yaa tapulara ane dèu pa nii, pa era nène pi'a d'o wobèni do manga-mèd'a.”
23 Ta b'ale ke ri Yehuda, “Hani we ta ègu ri noo ne b'ara nahère! Ha'i ta b'ole pemekae d'ara we dii ri dèu! Do d'èi d'o ma yaa ta ma'i ri, tapulara ngède d'o noo rowi dii.”
24 Ta liwa ti tèlu wèru, ta dèka ke dèu laa pika pa Yehuda, “Ana matu èu Tamar èla ke ta laa b'èji nga dèu. Nèi ke noo do tèni ae.”
B'ani d'ai ke Yehuda ta rènge nène. Ta pereda ke noo pa dèu nee, “Laa ègo ko ri èu ne wobèni nène, mij'e ma tune ko noo bolo-bolo!”
25 D'ai ta laa ègo ke ri roo Tamar. Ta pemèhu ke ri Tamar ne cap nga kèji nee. Ta pepuu ke roo ri noo laa pika pa ama matu noo, “Ama, pereha kowe ne b'ara nahed'e. Dèu do unu cap nga kèji na he ke, ne do petèni ae yaa.”
26 Ta heleo b'ara nahère, tada d'ènge ke ri Yehuda, ta b'ara noo. Ta peke ke ri noo, “Tèra! Hala d'o wobèni nène. Do hala ne yaa. Do petuu noo. Pedutu uku, do j'èma noo ta pebanga èmu nga Sela ana yaa. Tapulara wae d'o yaa. Gole we noo!” Èla pe minahère b'èj'i d'oke Yehuda nga Tamar.
27 D'ai ke pa awe ta kehoo d'ara Tamar, ta kehoo d'ara ke noo do kedue. 28 Pa awe ta mengèlu d'ara noo, hèu ke ne ruai do he dèu d'ee. Ta 'èke ke ri lua wèngu do wo mea pa ruai ne, ri dèu do batu Tamar ta metana ana ne. Ta lii ke noo, “Nad'ee do mone a'a.” 29 Tapulara hèpe keb'ali ne ruai noo. D'ai pa pedèka metana uru ne do ked'ue ngati noo. Ta lii ke ne dèu do tulu nga Tamar ta metana ana ne pa naiki ne, “B'otee! D'ai rui d'ènge èu, oo! Ri minahère Hiku uru j'ara èu ne mèhu èni!” Ta pehune ngara ke ri roo naiki nee ta Peres (ne do ihi ne, ‘pe'uru èni!’). 30 Èla pe nène, j'e mèhu èni ne ari noo do nga 'èke ri lua wèngu do mea nee. Ta wie ngara ke ri roo ta Sera, (ne arti noo ane, ‘do mea gèu-gèu’).