2b Awe do napone, ana ri Yakob nga ihi èmu noo Rahel, ne ngara noo Yusuf. Pa awe ta he nguru pidu b'ue tèu ne pemuri noo, a'a noo he nga noo do tima ta laa b'ata ki'i hela'u-la'u. A'a noo he, ana ri Yakob nga ihi èmu noo, Bilha nga Silpa. J'e Yusuf d'ee, d'èi ta pewewe ub'a we ta ped'iri j'ara lua a'a noo he pa ama noo.

3 Do weka ke Yakob, d'ai ta metana Yusuf. Hiku d'èi haj'a noo nga Yusuf ki penono nga ana noo do had'e he. Pa d'ara he awe, ta tao ke Yakob he b'èla b'aj'u do medera do rihi woie wie Yusuf.^a 4 D'ai bubu d'ara ke roo nga Yusuf, ta heleo ama roo do rihi haj'a nga noo, tade dod'o wae ke roo ta pedai lii pe'ie nga noo.

5-7 Ta nii ke Yusuf pa d'ara he rèmi. Moko ta peke ke ne lai nii noo pa a'a noo he, “Naa ee! D'èno ko ri muu! Ne lai nii yaa, hari-hari dii era do uj'u ne wuri are dii pa d'ara maa. B'ale ne uj'u are yaa do titu mola. Ne uj'u are muu titu pekewero, j'e j'unu ta wie huu pa unu yaa.” Ta rènge minahère, ta taba bubu ke ne a'a noo he nga noo.

8 Moko ta lii ke roo pa Yusuf, “Nengaa ne èu? Hiku ne pereke ri èu ta jad'i dèu mone ae ke èu tuu ta pereda pa j'ii, wod'o?” Juu la'a ke roo ne bubu d'ara nga noo, ri do èla ta peke ne lai nii napone.

9 Ta èla minahère, ta nii wari ke Yusuf. Ta peke ke ri noo pa a'a noo he, “Naa ee! Èla ri ke yaa ta nii. Ngède ri yaa ne mada lod'o, wèru, nga he nguru he ue ne moto, dèka ma j'unu-ru'u pa yaa hari-hari.” 10 Ta èla Yusuf pe ped'iri ne lai nii napone pa ama noo nga a'a noo he, ta j'ege ke noo ri ama noo, “Lii nii nengaa ke napone?! Ne pengee ri èu yaa, ina èu, nga a'a nga ari èu he, do medae ta laa hengèd'o ne kab'a j'èla èu, wod'o? D'ai tèra èu ngalai ee!” 11 Moko a'a ri Yusuf he ta bubu d'ara ke nga noo. Tapulara èle d'o ne pengee ama noo j'ara lua nii do napone.

12 Pa d'ara he awe, èba ke ri a'a ri Yusuf he, ne ki'i ama roo he pe'umu nga rae Sikem. 13 Ta tui b'èle, lii ke ama noo, “Yusuf ee! Ne a'a èu he hèi ke laa b'ata ne ki'i pe'umu la Sikem. Pemoko ko èu èni laa heleo ko roo.”

Ta b'ale ke ri Yusuf, “O we, ama.”

14 Ta lii ke ama noo, “Kako ko èu laa heleo a'a èu he, lema nga ki'i yaa he. Era do minamii roo, j'e b'ale èu ma pika pa yaa.”

Moko ta kako ke Yusuf pèga pad'a Hebron, kako lohe la Sikem. 15 D'ai pe d'o d'ai, ta kale ke roo ri noo pekewero d'ara pad'a do napone. Moko ta pe'abu ke noo nga he dèu do keb'ali pa noo, “Kale nengaa j'e èu?”

16 Ta b'ale ke ri Yusuf, “Ama ee. Ne ta kale a'a yaa he ri yaa. He do lere ki'i roo ta kale j'u'u peumu pa d'ee. Ad'o ta ngède ri ama?”

17 Moko ta pika ke dèu do napone, “Pi'a d'oke roo pa d'ee. Roo ane do ta kako pe'umu èni la rae Dotan.”

Ta kako ke Yusuf laa pedutu ne a'a noo he, tade ngèdi roo pa Dotan. 18 Tapulara, ngati j'èu ko Yusuf do ngède ke noo ri roo. Moko ta heuj'u lii ke roo d'èi ta pemade noo. 19 Ta peubu ke roo he dèu nga he dèu, “Heleo ko ri muu. Nène ke ne mone nii nee! 20 Mai ma pemade noo ri dii. D'ai j'e nab'e noo ri dii la d'ara èi mada do kemangu. J'e peke ri dii pa ama hine ta do èla ke noo pe nga'e ri b'ada b'ani he! J'e heleo ri dii lohe la mii ne lai nii noo!”

21 Ta rènge minahère, ta kale ruj'ara ke a'a noo Ruben ta hib'o Yusuf. Moko ta lii ke noo pa ari noo he, “Naa ee! B'ole pemade noo ri dii! 22 Rihi ie ta nab'e la d'ara èi mada we noo ri dii. Era nad'ee do keliu-kejid'o, Hiku nara d'o ta toi ri dèu. Had'i ta b'ole ped'ute raa we noo.” Ne tuu noo ta lii minahère, ri do d'èi noo ta gole Yusuf, j'e lii pa noo ta b'ale.

23 Ta d'ai Yusuf nga roo, ta pekèpe ke noo ri a'a noo he, j'e b'age ri roo ne b'aj'u noo do woie nee. 24 Èla minahère, ta nune pera'o ke noo ri roo, j'e nyèke pemaho la d'ara èi mada do kemangu nee.

25 Ta èla minahère, ta b'ale ke roo laa nga'a. Pa d'ara ta nga'a roo, ta ngède ke ri roo hekewolo dèu do dèka. Hekewolo dèu do nga onta do nga ègu b'ara d'aga, he mii raa aj'u mèngi he, bumbu he, nga he worèwu-he worèwu ruaj'u. B'ale ma ne kewolo dèu nahère, do Isma'el do dèka rai ti rae Gilead do j'èu, nga pedèb'o ta laa rai Mesiir.

26 Ta èla minahère, ta lii ke Yehuda pa a'a nga ari noo he, “Wo naa! Rihi ie ma tao minahed'e we. B'ole pemade noo ri dii. Nengaa ne mèngi nee? Ta minamii lema, nara d'o ri dii ta pehune ne raa noo. 27 Rihi ie ri dii ta pewie we noo pa do Isma'el he. Ta tao minamii lema dii, ne pehed'apa nga noo, pe ma noo ta ari metana ri dii. Ri do minahère b'ole pepèd'e noo ri dii.” Moko ta pehela'u lii ke roo nga nengaa ne do lii noo.

28 D'ai huru hapo le ne dèu mone d'aga he ta lake,^b moko ta d'ede ke Yusuf ri a'a noo he ti d'ara èi mada nee. J'e pewie noo ri roo pa do Isma'el he nga keb'ue d'ue nguru doi wo pudi.^c Ta èla minahère, ta èbe ke Yusuf ri roo la Mesiir.

29 Pa awe ta pewie ne Yusuf ri roo, toi d'o ri Ruben. Hiku d'ai ta b'ale noo la èi mada nee, keb'èdi ane noo ri pe'e d'oke Yusuf. Ta hio b'age-b'age ke ri noo ne b'ara pa ue noo, rowi do rihi tèra noo ne hedui. 30 Ta b'ale ke noo laa pe'abu nga ari noo he nga lii, “B'otee! Hedui tèra! Pe'e d'oke ne naiki ne pa nii! Minamii ke ne tao yaa nad'ee?”

31 Moko ta lore ke ri roo he ngi'u naki'i, èbe ri roo b'aj'u Yusuf do woie ne, j'e pehèb'o la d'ara raa ki'i nee. 32 Moko ta èbe ke ri roo ne b'aj'u do nga raa ne j'e laa pengède pa ama roo, nga lii pika, “Ama ee! Mèhe ta pile ri j'ii baj'u nad'ee. Heleo kowe ri ama. Rata ngita b'aj'u Yusuf.”

33 Ta ngède ne b'aj'u ne, tade d'ènge ma ri Yakob. Ta lii d'ènge ke noo, “B'ote ke woto! Nad'ee b'aj'u ana yaa. Hio b'age pa mii mèra noo ri b'ada b'ani? Èla ke pe made ne ana yaa!”

34 Èla minahère, ta hio ke ri Yakob b'ara pa ue noo, j'e pake ri noo ne nakaro, rowi do rihi tèra noo ne hedui.^d J'e pee noo nga tangi penina noho tuu ana noo. 35 Ta dèka ke hari-hari ne ana noo he, ie ta ana womone lema ana wobèni, laa wie hale d'ara pa noo, tapulara nara d'o roo. Ta lii ke noo, “Ad'o ke oo! Titu ke yaa ta hedui tade made, nara d'o yaa ta bèlo ne ana yaa do he dèu nad'ee.” Minahère ke Yakob ne hedui do peloro, rowi hengee ne ana noo Yusuf do èla pe made nee.

36 Pa d'ara hedui ko Yakob, ta d'ai leke ne dèu d'aga he^e la Mesiir. Moko ta pewie ke ri roo Yusuf pa he dèu mone ae, ne ngara noo Potifar. Noo d'ee, kètu jaga unu duae Mesiir.