Kolo-loro ri Esau he
36
Nahed'e ne kolo-loro ri Esau he. Ne ngara noo do hewala, ta Edom. 2 Esau banga èmu nga do d'ue dèu ana wobèni do Kana'an. He dèu, dèu do Het, do ana ri Elon do ngara ta Ada. Dèu do ked'ue, do Hewi, ngara ta Oholibama. Ama noo ngara ta Anah, nga èpu noo ngara ta Sibeon. 3 Esau lema banga èmu nga ana ri Isma'el ngara ta Basmat. Namone ri Basmat, ngara ta Nebayot.4 Ihi èmu Esau do ngara ta Ada ne, metana Elifas. Basmat metana Rehuel. 5 D'ai Oholibama metana Yeus, Yalam nga Kora. Hari-hari ana Esau he metana pa rai Kana'an.
6 Pa d'ara he wari, Esau he pida la he èhi rai do hewala, do j'èu ngati Yakob. Ègu ri noo ana-ihi èmu noo, dèu j'èga, b'ada, nga hari-hari puhaka noo he. 7 Ta petala ke Esau nga Yakob, rowi ne b'ada nga puhaka roo do rihi ae. Hiku do pee pekehèhi roo pa rai nène. 8 D'ai Esau (do Edom ne), ta kako ke laa pee pa rai do b'ojo pa Seir.
9 Nahed'e ne kolo-loro ri Esau, do lii roo ta ‘do Edom’. Pee roo pa rae do b'ojo pa Seir.
10-13 Ihi èmu ri Esau Ada, metana he dèu ana womone, ngara ta Elifas. Ana womone ri Elifas do lèmi dèu. Era, Teman, Omar, Sefo, Gatam nga Kenas. Ihi èmu peluja ri Elifas ngara ta Timna. Noo metana he dèu ana womone ngara ta Amalek.
Ihi èmu ri Esau Basmat, metana he dèu ana womone, ngara ta Rehuel. Rehuel nara do èpa dèu ana womone. Era, Nahat, Seram, Syama, nga Misa.
14 Ihi èmu ri Esau Oholibama, do ana ri Anah, do èpu ri Sibeon ne, metana do tèlu dèu ana womone. Era, Yeus, Yalam nga Kora.
15-16 Ana-èpu ri Esau he pemenyèla jad'i ta do ae udu. Miha-miha nga kètu udu unu roo. Ana ri Esau do mone a'a ne, Elifas, ne ana noo he, jad'i ta kètu udu do Teman, kètu udu do Omar, kètu udu do Sefo, kètu udu do Kenas, kètu udu do Kora, kètu udu do Gatam, nga kètu udu do Amalek. Roo hari-hari, kolo-loro ri Esau nga ihi èmu noo Ada.
17 Epu ri Esau do ana ri Rehuel he, jad'i ta kètu udu do Nahat, kètu udu do Sera, kètu udu do Syama, nga kètu udu do Misa. Roo hari-hari, kolo-loro ri Esau nga ihi èmu noo Basmat.
18 Ana he ri Esau nga ihi èmu noo Oholibama ne, jad'i ta kètu udu do Yeus, kètu udu do Yalam, nga kètu udu do Kora.
19 Ne udu nahère hari-hari, kolo-loro ri Esau.
Kolo-loro ri Seir
20-21 Pa era nène, era he dèu do Hori ngara ta Seir. Ne ana ri noo he do pemenyèla jad'i ta do ae udu. Miha-miha nga kètu udu unu roo. D'ai ne ana noo jad'i ta kètu udu do Lotan, kètu udu do Sobal, kètu udu do Sibeon, kètu udu do Anah, kètu udu do Dison, kètu udu do Eser, nga kètu udu do Disan.
22 Ana ri Lotan, Hori nga Heman. (Nawèni ri Lotan ngara ta Timna).
23 Ana ri Sobal he, Alwan, Manahat, Ebal, Sefo, nga Onam.
24 Ana ri Sibeon, Aya nga Anah. Anah ne, do ngède ne mada wètu èi pana pa pad'a lahalae, pa awe ta b'ata ne keledai ama noo he ri noo.
25-26 Ana wobèni ri Anah, ngara ta Oholibama. Nga ana womone, do ngara Dison. Ana ri Dison he: Hemda, Esban, Yitran, nga Keran.
27 Ana ri Eser he, Bilhan, Sa'awan nga Akan.
28 Ana ri Disan he, Us nga Aran.
29-30 Hiku kètu-kètu udu do Hori he, Lotan, Sobal, Sibeon, Anah, Dison, Eser nga Disan. Hari-hari roo do pee pa rai Seir.
Duae ri do Edom he
31 Nga dod'o pi'a dae duae pa rai Israel, do era ke duae pa rai Edom. Ngara roo do pelere:
32 D'ede ri roo ana ri Beor, ngara ta Bela ta jad'i duae pa rai Dinhaba.
33 Ta made Bela, ta gate ke ri Yobab ta jad'i duae. Ama noo ngara ta Sera ngati rae Bosra.
34 Ta made Yobab, ta gate ke ri Husam ta jad'i duae. Husam ne, ngati rai dèu do Teman he.
35 Ta made Husam, ta gate ri Hadad ke ta duae. Ama noo ngara ta Bedad ngati rae Awit. (Noo ne, do pej'èra do Midian pa awe ta pemuhu roo pa Moab.)
36 Ta made Hadad, ta gate ri Samla ke ta jad'i duae. Samla ne, ngati rae Masreka.
37 Ta made Samla, Saul jad'i ta duae j'e gate noo. Saul ne, ngati rae Rehobot pa ngidi loko.
38 Ta made Saul, Ba'al-Hanan jad'i ta duae gate noo. Ama noo ngara ta Akbor.
39 Ta made Ba'al-Hanan, Hadar jad'i ta duae gate noo. Hadar ne ngati rae Pau. Ihi èmu noo ngara ta Mehetabel. Ama ri Mehetabel ngara ta Matret. Nga èpu noo ngara ta Mesahab.
40-43 Hiku ne kètu-kètu udu do puru ngati Esau he: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel, nga Iram. Roo miha-miha wie ngara ne rai roo pedutu nga ngara roo ma miha.
Hiku nahère hari-hari, lii ped'iri j'ara kolo-loro Esau, do Edom he.