Yakob he perai laa Betel
35
Èla pe nène, ta pedai lii ke Deo Muri nga Yakob, “Yaa d'ee Deo do èla pe pengèdi èni pa èu, pa awe ta perai èu ngati a'a èu Esau. Awe do nad'ee pida we èu la Betel. D'ai la nii, petitu ri èu meja huu mejura wie Yaa. D'ai j'e pee heke èu pa nène.”2-3 Èla pe nène, ta pedai ke Yakob nga hari-hari dèu pa d'ara èmu noo, “Awe do nad'ee, dii hari-hari do ta pekèd'i la Betel. Do he wari ne, pa awe ta hedui yaa, Deo Muri do tulu nga yaa pa nène. Ta laa petitu meja huu mejura ko yaa pa nène. Hiku nad'ee èri j'e hora ne b'ara mejura unu muu hari-hari. Pemèu ne ngi'u muu, j'e gati b'ara, rowi dii do he ta laa mejura pa Muri.” 4 D'ai ta j'ula ke ri roo hari-hari ne b'ara mejura nga ate-ate unu rooa hari-hari. D'ai ta pedana ke ri Yakob hari-hari ne b'ara nahère pa d'ai he kepue aj'u do mone ae peumu nga rae Sikem. 5 Pa d'ara ta pekèd'i ne kejie ri Yakob he ngati Sikem, ta pemeda'u ke ri Deo Muri hari-hari ne dèu pehero pa rai nène, tade dod'o b'ani roo ta tao lai woapa pa Yakob he.
6 D'ai Yakob he nga unu-oha noo hari-hari, nga helama la Betel (do uru ne ngara ta Lus), pa rai Kana'an. 7 Pa nène petitu Yakob meja huu mejura ngati wowadu. D'ai j'e pale ngara ri noo era nène ta El Betel, (ne do ihi ne ‘Deo ri Betel’), rowi Deo Muri do pengèdi èni pa Yakob pa era nène uru ne, pa awe ta perai noo ngati a'a noo.
8 Peumu nga rae Betel, era he kepue aj'u do mone ae do wie ngara ri dèu ta Alon Bakut. Ne ihi nee ‘na'aj'u penina noho’. Ne nara noo ngara nène, rowi pa awe ta made ne ina do pemoke Ribka rai ta naiki, do ngara ta Debora nee, pedane ri roo noo pa kepue aj'u napone.
9 Pa awe ta b'ale Yakob ngati Padan Aram, ta pengèdi èni rike Deo Muri j'e wie mèngi pa noo. 10 Ta lii ke Muri, “J'ari rai awe nad'ee, ad'o ke ngara èu Yakob rii. Tapulara ta wie ngara do wiu èu ri Yaa ta Israel.b 11 Yaa d'ee, Deo do Rihi Higa. Hiku era we èu nga ana-èpu do lowe! Ae rai hine do dèka ngati kolo-loro èu. J'e ngati èu he hine do ta metana do lowe duae. 12 Rai do wie pa èpu èu Abraham nga ama èu Isak ne ri Yaa, awe do nad'ee wie pa èu ri Yaa nga kolo-loro èu he.”
13-14 Ta èla Deo Muri ne lii mihère, ta petitu ke Yakob helaa gerii wowadu pa nène, mij'e jad'i ta rutada do pehengee ne lii jaji Muri. D'ai ta b'ue ri èi ago ke nga èi mènyi ri noo pa d'ida wowadu ne, j'e mejura pa Muri. 15 Era nène pale ngara ri noo ta Betel.
Ihi èmu ri Yakob, Rahel made metana ana
16 Èla pe nène, ta kako ke Yakob he j'e hane rai Betel. Do j'èu b'èle ko roo hudi ngati Efrata (do Betlehem ne), d'ai ke pa awe Rahel ta metana ana. Tapulara do hedui noo ne metana ana. 17 Pa d'ara nga hetenga made ta pèngo ri noo, ta peke ke ri dèu do batu ta metana ana nee, “Ina Rahel! Perui èni b'oke, rowi do nara ana womone rike ina!” 18 Ta umu Rahel ta hèpo hengaa, ta wie ngara ke ri noo naiki nène ta, Ben-Oni, (ne do ihi ne ‘ana ngati hedui-herui yaa’). Èla pe napone, j'e made noo. Tapulara wie ngara ri Yakob naiki nène ta Benyamin, (ne do ihi ne ‘ana ai d'anga’).
19 D'ai ta pedane ke ri roo Rahel pa ngidi ruj'ara do ta la Efrata, (awe do nad'ee, ne ngara nee Betlehem). 20 Ta petitu ke Yakob he wue wowadu rai dare pa nène. Tade ma lod'o do nad'ee, ne wowadu rai dare Rahel ne nèi ko ma.
Ana ri Yakob he
21 Èla pe nène, Yakobc ta pida-pida era ke teruu. He wari, ta petitu naleo ke noo pa heb'èka manara Eder. 22 Pa awe ta era roo pa nène, ta bèj'i ke Ruben nga Bilha do ihi èmu peluja ri ama noo. Tuu ta toi ma ri Yakob ne lai do napone.
Ana womone ri Yakob do henguru d'ue dèu.
23 Ana ri Lea he: Ruben (ana mone a'a ri Yakob), Simeon, Lewi, Yahuda, Isaskar, nga Sebulon.
24 Ana ri Rahel he: Yusuf nga Benyamin.
25 Ana ri Bilha he do naènu ri Rahel: Dan nga Naftali.
26 D'ai ana ri Silpa he do naènu ri Lea: Gad nga Aser
Ne naiki do nahère he metana pa Padan Aram.
Made Isak ama ri Yakob