Sikem menya'e ana wobèni ri Yakob do ngara ta Dina
34
Pa d'ara he wari, Yakob nga ana wobèni ri Lea, do ngara ta Dina, ta kako ke laa pe'ahu nga ana wobèni ngati rai nène. 2 Ne duae ngati rai nène ngara ta Hemor, ngati udu do Hewi. Ana womone ri noo ngara ta Sikem. Pa d'ara he wari, ngède ke Dina ri Sikem, ta ègo mena'o ke noo j'e laa menya'e nga hewuke. 3 Ta d'èi ke Sikem nga Dina nga rihi haj'a nga no. Hiku d'ai lumu lii pedai j'e Sikem nga Dina mij'e b'ale le ri Dina ne lua d'èi noo. 4 D'ai ta pika ke Sikem pa ama noo, “Ama! Tulu kowe ta laa mèho ami pa Dina, mij'e nara yaa ta banga èmu nga noo.”5 Rèngi Yakob ta do era dèu do èla pe menya'e ana noo do wobèni, tapulara ta pehèngo èni he we noo, nga dod'o tao nengaa-ngaa. Rowi awe nène, ne ana womone ri noo he do laa b'ata b'ada pa pad'a. Hiku mata ri noo tade b'ale roo hari-hari.
6 Awe nène, ta dèka ke ama ri Sikem, Hemor la nga Yakob ta laa maho ami pa Dina. 7 Pa d'ara nga pedai lii roo d'ue, ta b'ale ke ne ana ri Yakob he ngati pad'a. Ta rèngi ke roo ta do èla ke pe menya'e ri Sikem ne nawèni roo, ta pèd'a ade ke roo, j'e bubu d'ara dod'o mèke. Ta lii ke roo, “Ne lai do minahère, j'èma d'o ta era pa Israel. Hiku ie d'o ri dii ta hèmi kiri tao dèu lai do woapa minahère.”
8 D'ai ta ome ke Yakob he ri Hemor, “Tuèhu Yakob! D'ai d'èi tèra-tèra ke ana yaa Sikem nga ana wobèni ri tuèhu. Hiku ne ami yaa mij'e o'o ko tuèhu ta banga èmu ana yaa nga noo. 9 Kiri jad'i he, ta pe'ègu we ana dii. Ne ana womone ri muu banga èmu nga ana wobèni ri j'ii. J'e d'ai ne ana womone ri j'ii he banga èmu nga ana wobèni ri muu. 10 Mij'e pee muu pekupu hela'u nga j'ii pa d'ee. E'e ri muu we ne j'uj'u d'èi ta pee pa mii we pa d'ee. J'e ped'aga nga nara puhaka pa d'ee.”
11-12 Èla pe nène, ta lii ke Sikem pa ama ri Dina, nga namone noo he, “D'èi ta ami nengaa we muu ta pedute ma rii yaa. Ki d'èi muu ta ami doi ma'i henèb'i mekae nga keb'ue ne, hengaa we ta ma'i ma ri yaa. Had'i ta o'o we muu ta banga èmu yaa nga bèni ari ri muu.”
13 Tapulara do toi ke ri ana ri Yakob he ta do èla ke ta menya'e ri Sikem ne nawèni roo Dina. Hiku ta b'ale ke ri roo nga pepote pa Sikem nga ama noo Hemor. 14 D'ai ta b'ale ke ri roo, “Nara d'o ri j'ii ta pebanga èmu nawèni j'ii nga dèu dod'o sunat! Na nène ta pemekae d'ara j'ii we! 15 Tapulara ne loro j'ara ne mihed'e: hari-hari muu ne womone hed'e, ie ta naiki ta do kepai do j'èma ta sunat mii j'ii. 16 Kiri tao muu minahère, j'e nara dii ta pe'ègu. J'e j'ii lema nara ta pee hela'u-la'u nga muu pa d'ee, mij'e nara dii ta jad'i he wue rai. 17 Tapulara kiri dod'o pedute ri muu ne do d'èi j'ii, nga dod'o wae ta sunat, ta ègo peb'ale ri j'ii hine nawèni j'ii, d'ai j'e lènga ngati era nad'ee.”
18 Hème nga woie ri Hemor nga Sikem ne do lii roo he. 19 Tapulara mèka taha d'oke Sikem, rowi do rihi d'ai d'èi made ke noo nga Dina. Hari-hari dèu pa rai nène do pekeb'ue Sikem. 20 Hiku ta kako ke Hemor nga Sikem laa era pedai kewèlu pa ub'a kelae ta maho la rae ne, d'ai ta pelii ke roo nga hari-hari dèu pa rai nène. Lii roo, 21 “A'a-ari harièle! Ne do Israel he d'èi ta muri-mada nga woie nga dii. Hiku hani kowe roo ta pee hela'u-la'u nga dii pa rai nad'ee. Ne rai nad'ee waji bèla tuu dii hari-hari. Nara dii ta pe'ègu nga ana wobèni ri roo. J'e roo lema nara ta pebanga èmu nga ana wobèni unu dii. 22 Ne ami roo wata ke he èhi lai do naiki we ngati dii. Dii hari-hari ne womone hed'e do j'èma ta sunat mii roo. 23 Kiri do pee ke dii pekupu, ne b'ada nga hari-hari puhaka roo lema jad'i ta puhaka unu dii hine, too? Hiku rihi ie ta hème we rii dii ne do d'èi roo. Mai we dii hari-hari ma sunat hela'u-la'u! O'o muu we ad'o?”
24 D'ai hari-hari dèu do pekupu pa nène, ta o'o ke nga do lii Hemor nga Sikem. Ta sunat ke hela'u-la'u hari-hari womone pa rai nène.
25 D'ai ta lod'o ketèlu, do pa d'ara nga pèd'a ko hari-hari ne no'e do sunat he, d'ai a'a ri Dina, Simeon nga Lewi, ta d'ede kelewa ke, d'ai j'e maho roo mena'o la d'ara rae. J'e pemade ri roo hari-hari ne womone he. 26 Hemor lema nga Sikem lèka le ta pemade. D'ai j'e ègo ri roo pemèhu èni Dina ngati èmu Sikem j'e b'ale roo.
27 Èla pe nène, ta maho ke ne ana ri Yakob do hewala he la rai nène, j'e laa mena'o ne b'ara ngati rai nène. B'ani roo, rowi do èla ke ta menya'e ri dèu ne nawèni roo pa nène. 28 Raba ri roo hari-hari unu-oha dèu ngati d'ara èmu, j'e kelau ne b'ada dèu he hari-hari ngati pad'a. 29 Èba ri roo hari-hari wobèni, nga naiki he, nga raba lema ri roo hari-hari ne b'ara do maha unu rai nène.
30 Ta toi ri Yakob ne lai nène, ta lii ke noo pa Simeon nga Lewi, “Èla pe j'èga lai b'od'o nengaa ke muu nahed'e? Pehedue yaa we! Dae ne do Kana'an he, do Peris, nga hari-hari dèu pa rai nad'ee, bubu made nga dii. Do ae j'e ne dèu roo. Tapulara ne dèu dii hed'ee hudi we. Kiri dèka maa muhu roo nga dii, owe ta mae d'ènge hema we j'e dii.”
31 Tapulara ta b'ale ke ri roo nga b'ani, “Ama! Ne pereke ri ama, do ta hani we roo ri j'ii ta tao nawèni j'ii, ta jad'i wobèni dod'o petuu wod'o?”