Yakob peabu nga a'a noo Esau
33
Lod'o nène, ta ngède ke ri Yakob, Esau do dèka nga kejie dèu unu noo do èpa ngahu dèu he. D'ai ta peb'agi ke ri noo ana noo he la nga ina roo he dèu-he dèu. 2 Ato ri noo, mij'e ne ihi èmu peluja do d'ue dèu he nga ana roo he kako pa hed'apa. D'ai Lea ri nga ana noo he, j'eitu Rahel rii nga ana noo Yusuf pedèka rahi. 3 Tapulara Yakob kako pa hed'apa ngati roo hari-hari. Dai ta umu nga a'a noo, ta lèku rutu ke noo j'e peru'u èni tade d'ai la worai, tade pidu wari.4 Tapulara d'ai ta ngède ri Esau ne ari noo, ta perai ke noo laa peabu nga Yakob, d'ai j'e ked'ake nga hengèd'o noo. Ta tangi roo d'ue. 5 D'ai ta ngèdi ri Esau ne wobèni nga naiki he, ta keb'ali ke noo, “J'e naduu ke hari-hari dèu nahed'e?”
D'ai ta b'ale ke ri Yakob, “Roo he, dèu do wie ri Deo Muri he pa yaa, naènu ri a'a.”
6 Èla pe nène, ne ihi èmu peluja noo lema, nga ana ri roo he, dèka laa mejura pa Esau. 7 D'ai j'e Lea rii nga ana noo he, dèka laa wie mejura pa Esau. D'ai do leto tèka Yusuf nga ina noo Rahel dèka laa waje Esau.
8 D'ai ta keb'ali ke Esau, “Oni ma ne kewolo b'ada do moa ri èu he ngine ne, nengaa ke ne pedèb'o nee?”
Ta b'ale ke ri Yakob, “Mihed'e a'a! Wie parahee ri yaa hari-hari pa a'a, mij'e hème yaa ri a'a nga mengèlu d'ara.”
9 Tapulara ta b'ale ke ri Esau, “Ari Yakob! Do ae lema j'e puhaka yaa. Hiku tenge d'o ri èu ta wie yaa nengaa-ngaa .”
10 D'ai ta b'ale ke ri Yakob, “B'ole minahère a'a! Do j'èma ri a'a ta hème, mij'e jad'i rutada ta do hème yaa ri a'a nga mengèlu d'ara. Rowi ta ngède ri yaa ne worèwu a'a ne, era lema mii heleo worèwu Deo Muri ri yaa. 11 Hiku ami yaa nga wawa ed'o-ed'o, mij'e hème ko ri a'a ne b'ara ègu yaa dod'o b'ule nga keb'ue nahed'ee. Rowi Deo Muri do rihi woie ke nga yaa, ri mihère ke hiku do wie yaa ri Noo harièle do paraluu ri yaa.” Ta ome teruu ke noo ri Yakob, ie nga d'o ie, ta hème heke ri Esau ne b'ara ègu nahère he.
12 Èla pe nène, ta lii ke Esau, “Ki do minahère, pemoko èni we muu mij'e kako we dii! Nèb'o do ta pengèdu ma muu ri yaa.”
13 Tapulara ta b'ale ke ri Yakob, “Tenge d'o a'a ee! Heleo ri a'a ma miha. Naiki hed'e do naiki koo, j'e nara d'o roo ta kako do laha. B'ada do èla ta metana ana he le do ae. Kiri pewike ke ri dii roo ta kako mèriai pa d'ara helod'o we, made ke hari-hari ne b'ada nahed'e nèb'o. 14 Hiku rihi ie, kako we a'a he uru. J'ii hine kako pelama-lama ngati kej'unga. Ta dèka ma yaa hine laa heleo a'a pa Seir.”
15 Èla pe nène, ta lii rike Esau, “Kiri do minahère, hani ri yaa had'e ne dèu j'èga yaa he nga èu, mij'e pej'uj'e ri roo ne ruj'ara pa muu.”
Tapulara ta lii ke Yakob, “Teo d'o a'a ta pelob'o èni! Had'i ta do toi ke ri yaa ta do hème nga woie ke yaa ri a'a.”
16 Rènge minahère, ta kako ke Esau hani roo j'e b'ale la Seir. 17 Tapulara ngati nène, Yakob kako la Sukot. Pa nène, ta tao naleo ke noo nga j'èga kada wie b'ada noo he hari-hari. Ri do minahère ke, ne era nène wie ngara ri roo ta, Sukot (ne do ihi ne ‘naleo’).
18 Pedèka rahi, Yakob he d'ai nga helama ngati Padan Aram la rae Sikem pa rai Kana'an. D'ai ta petitu naleo ke roo j'e pee peumu nga rae nène. 19 Ne worai do petitu naleo he ri Yakob, do wèle hèpo ke ri noo ngati Hemor ama ri Sikem. Ma'e ri noo nga hengahu doi melaa pudi. 20 Pa nène, peb'aja noo wowadu ta tao meja huu mejura. D'ai ta wie ngara ke ri noo era nène ta El-Elohe-Isra'el do ihi ne ‘Deo ne, do Deo ri Israel.’