3 Èla pe nène, ta lii ke MURI pa Yakob, “Nad'ee d'ai ke pa awe nee. Hiku do j'èma èu ta b'ale laa nga ina-ama èu he. Do ta era ma Yaa hine hela'u-la'u nga èu.”

4 Èla pe nène, pepuu ri Yakob laa pedoa Rahel nga Lea, mij'e dèka la peabu nga noo pa era b'ata b'ada he. 5 D'ai ta pika ke noo pa roo, “Pèri lod'o do nahed'e, heleo ri yaa ne worèwu ama muu ta pehedudu èni we nga yaa. Woie led'o make noo nga yaa mii do uru nee. Tapulara Deo Muri do mejura ri ama yaa nee, do era hela'u nga yaa. 6 Do toi ri muu ma d'ue, mihed'e ne worèwu tui, èla ke yaa pe j'èga la'a rui hetenga made wie ama muu! 7 Ta minahère lema, tapulara j'èj'i wari noo ne pepote pa yaa. Gate ri noo ne kehiwa yaa tade henguru wari. Ta minahère lema, tapulara do jage-menege teruu yaa ri Deo Muri. 8 Pa awe ta lii ama muu, ‘Ne b'ada do dèta he, jad'i ta b'ada kehiwa èu,’ d'ai ne b'ada nahère metana ana do dèta harièle. D'ai ri pa awe do hewala, ta lii rike noo, ‘Awe nad'ee b'ada do huri he jad'i ta kehiwa èu,’ ta metana ke ne b'ada nahère ana do huri harièle. 9 Ne tao ri Deo Muri minahère, mij'e ègu ri Noo ne b'ada ama muu, j'e wie pa yaa.

10 He wari, d'ai pa awe ta kawi ne b'ada he, ngède ri yaa pa d'ara lai nii, hari-hari b'ada mone do hèi do kawi ne, era do dèta, nga do huri. 11 D'ai ne dèu pejuu Muri ngati sorga pedoe yaa pa d'ara lai nii nga pali, ‘Wo Yakob!’

D'ai ta b'ale ke ri yaa, ‘Ta era ngaa Muri?’

12 D'ai ta peke ke ri noo, ‘Heleo ko! Hari-hari ne b'ada mone do kawi he, waa ke do dèta, nga do huri. Nahère hari-hari do ato ri Yaa, rowi do ngède ke ri Yaa nengaa ne do tao ri Laban pa èu. 13 Yaa d'ee, Deo Muri do pengèdi èni pa èu pa Betel. Pa nii èu do petitu wowadu, d'ai j'e hale ri èu ri èi mènyi j'e mejura pa Yaa. D'ai j'e pedara èu nga Yaa pa era nène. Awe nad'ee, do j'èma èu ta kèd'i j'e hane rai nad'ee, j'e b'ale laa rai ina-ama èu ne.’”

14 D'ai ta b'ale ke ri Rahel nga Lea, “Owe! Pedutu hewe j'ii! Rowi b'ule led'o ma ke j'ii nga puhaka nengaa-ngaa rii ngati ama Laban. 15 Mihed'e ne worèwu tui, do reke ke j'ii ta hela'u mii dèu tele hewe ri ama. Èla ke j'ii ta pewie ri noo. J'e nga'a ri noo ne doi do ma'i keb'ue j'ii he. 16 Harièle puhaka do ègu ri Deo Muri he ngati ama Laban ne, nad'ee do jad'i ta puhaka j'ii ke nga ana-oha j'ii. Hiku kinga do lii ke Muri ta minamii ta pedute heke!”

17-18 Èla pe nène, j'ari ke Yakob ta pemoko ne unu-oha noo he. D'ai ta peha'e ke ri noo ne ana-ihi èmu noo he hari-hari la d'ida onta ne, nga kelau ne b'ada noo hari-hari, nga unu-oha noo do nara pa Padan Aram he, j'e b'ale roo laa rai Kana'an.

19 Awe nène, Laban do lènga laa g'uti ne rèu ki'i j'awa noo he. D'ai ta mena'o ke ri Rahel ne b'ara mejura unu ama noo he. 20 Pekèd'i mena'o we Yakob he, nga dod'o pika pa ama matu noo. 21 Ègu ri noo ne puhaka noo hari-hari, d'ai j'e kako roo mèriai lake d'ai loko Efrat, j'e hed'apa roo la lede Gilead.

22 Ta liwa tèlu lod'o, ta rèngi ke Laban ta do Yakob he èla ke ta perai. 23 D'ai ta pekupu ke ri Laban ne dèu noo he, j'e laa perage ne ana matu noo. Perage ri roo tade pidu lod'o, j'e'itu abu roo pa lede Gilead.

24 D'ai ta mèd'a, ta pengèdi èni ke Muri pa Laban pa d'ara lai nii. Lii Noo, “Laban! Kiri pedai lii èu nga Yakob hine, jage pe'ie ne ub'a èu.”

25 Mèd'a nène, do petitu naleo ke Yakob pa lede Gilead. D'ai Laban he do petitu lema naleo ad'o do j'èu ngati era nène.

26 Èla pe nene, ta dèka ke Laban laa peabu nga Yakob. Ta lii ke noo, “Heh, Yakob! Ta ngaa ke hiku ègu mena'o mihed'e ri èu ne ana yaa do d'ue dèu he? Hela'u mii ègu dèu do kèpa ri èu ngati era pemuhu he. 27 B'ani ma èu ta perai mena'o ri, j'e dod'o pelangu le nga yaa! Kiri do pika mola èu pa yaa, do tatu ke yaa ta tao lai mengèlu d'ara, j'e pengèdu muu nga j'uka lii lod'o,^a j'e golo muu ta pekèd'i. 28 Ne hala èu rii èhi, wie d'o yaa ri èu awe ta hengèd'u ne ana-èpu yaa he, j'e golo roo. D'ai ngali j'e ne j'èga èu! 29 Do gapa hewe ri yaa ta peihilaka èu! Tapulara mèd'a ne, Deo Muri, do mejura ri ama èu ne, do lii ke pa yaa, kinga pedai lii yaa nga èu, do j'èma yaa ta jage pewoie ne kolo lii pedai yaa. 30 Do toi ke ri yaa ne tuu èu ta pekèd'i rowi do rihi d'èi ke èu ta b'ale. Tapulara ta ngaa ke hiku mena'o ri èu ne b'ara mejura unu yaa he?”

31 D'ai ta b'ale ke ri Yakob, “B'ole b'ani makemone nga yaa! Ne tuu yaa ta pekèd'i mena'o ne, rowi ta meda'u yaa, bole d'ai ta taha ri makemone ne naiki hed'e, ta minamii ke?” 32 Tapulara toi d'o ri Yakob, ta do mena'o ri ihi èmu noo Rahel ne b'ara mejura he. Hiku ta lii ke noo, “Makemone! J'ara b'ara mejura he, pereha we! Kiri abo pa naduu we, wole noo pemade. Keleda we hari-hari! Kiri abo ne b'ara puhaka unu makemone do hewala he, ègu peb'ale. Mij'e hakahii ri dèu nahed'e hari-hari.”

33 D'ai ta laa keleda ke ri Laban ne naleo roo he dèu-he dèu. J'ari ngati naleo unu Yakob. D'ai j'e kako ri noo la naleo unu Lea. J'e teruu la naleo naènu wobèni do d'ue dèu he. Tapulara ngède d'o ri noo ne b'ara mejura he. Pedèka rahi ta maho ke noo la naleo unu Rahel. 34 Tapulara do èla ke ri Rahel ta hune ne b'ara mejura he pa rudèni onta ne. D'ai ta mejèd'i ke noo pa rudèni onta ne. Keleda ri Laban pa naleo Rahel tapulara ngède d'o.

35 Ta lii ke Rahel pa ama noo, “B'ole b'ani b'oke ama. Nara d'o yaa ta titu, rowi ne do nara do ra'i yaa.” D'ai ta kale-kale rike ri Laban, tapulara ngède d'o ne b'ara mejura do napone.

36 D'ai ta ha'e raa ke Yakob, ta j'ege ke ri noo Laban, “Èla pe tao hala nga j'e yaa pa makemone? Tade maa perage yaa ri makemone, a'i d'o yaa mii dèu do jaha he! 37 Èla ke ri makemone ta keleda hari-hari ne b'ara-worèwu unu yaa. Hiku nara ngaa makemone? Hèku ko ta ped'elo pa d'ee mij'e ngèdi ri j'ii hari-hari! Mij'e pehèpo ri dèu nahed'e ta b'ara unu naduu nahère. 38 D'ue nguru b'ue tèu ke yaa ne jad'i ta dèu j'èga wie makemone. Pa d'ara nga jaga ri yaa ne b'ada makemone he, b'ule d'o he ngi'u he do hare ana. J'e he ngi'u he le nga'a d'o yaa! 39 Kiri era b'ada b'ani do pemade b'ada makemone, peke d'o ri yaa pa makemone, tapulara ta gate hewe ri yaa. Lema kinga mena'o ri dèu ne b'ada ama, lii makemone ta gati pa yaa, maji le ta ad'o hala yaa. 40 Nètu lod'o rai wadu, kèpu j'e yaa ri pana lod'o. Kiri mèd'a made j'e yaa ne kerègu ri meringi. Mete j'e yaa tade dod'o luu ta bèj'i ri pejaga nga b'ada makemone. 41 Tèra ke ne do d'ue nguru b'ue tèu ne do petuu! J'èga yaa he nguru èpa b'ue tèu, j'e nara ne ana wobèni ri makemone he hari do d'ue. Èla pe nène, j'èga rii yaa taba èna b'ue tèu, j'e'itu ta nara ne b'ada yaa he. J'èga do minahère ne worèwu tui, tapulara pee nga gate teruu ri makemone ne kehiwa yaa tade henguru wari. 42 Mèngi ta era Deo Muri, do mejura ri èpu Abraham nga ama Isak. Kiri ta d'o jage he yaa ri Noo, do too ke yaa ta hud'e peb'ale nga ai ue ri makemone. Tapulara Deo Muri ad'o do pebèj'i namada pa lai hedui yaa, nga do heleo ri Noo hari-hari ne j'èga yaa. Ri minahère ke, hiku tuu ta dèka Noo mèd'a ne maa pehengee makemone.”

43 Ta èla pe rènge ne lii Yakob minahère, ta b'ale ke ri Laban, “Mihed'e! Ne wobèni do d'ue dèu nahère, ana yaa. J'e ne ana do metana ri roo he, èpu yaa hari-hari. J'e ne b'ada nahed'e hari-hari unu yaa. Hari-hari do heleo ri èu pa d'ee do unu yaa ma. Tapulara ta tao ngaa ke ri yaa? Nara d'o ri yaa ta taha roo. 44 Hiku rihi ie dii d'ue ta pejaji we. J'e do j'èma dii ta muri-mada pedute lii pejaji nène.”

45 Èla pe nène, ta ègu ke Yakob he wue wowadu do worena, j'e petito pa nène jad'i ta rutada. 46 D'ai ta pepuu ke ri Yakob ne dèu noo he laa pekupu wowadu j'e ude. D'ai ta mejèd'i ke roo hari-hari ta nga'a peumu nga wowadu nahère. 47 D'ai ta pengare ke ri Laban ne wowadu do peudu nahère ta, Yegar Sahaduta. Tapulara wie ngara ri Yakob ta, Galeed.^b

48 D'ai ta lii ke Laban, “Ne wowadu do peudu nahed'e, jad'i ta hakahii tuu dii d'ue.” Ri minahère ke era nène ngara ta, Galeed. 49 Wie ngara lema ri Laban era nène ta, Mispa (do lii ne mègi ta hela'u mii lii do hewala do ihi ne ‘era jaga do d'ida’) rowi do lii noo, “MURI ma miha hine do ta heleo dii d'ue, hiku ta do pej'èu lema dii, b'ole pège ri dii ne lii pejaji nad'ee. 50 Kiri tao èu woapa pa ana yaa, j'e laa banga èmu nga wobèni do hewala, nara d'oke ri yaa ta toi. Tapulara hengee j'e ri èu! Deo Muri do jad'i ta hakahii pa èu nga yaa. 51-52 Hèko ko ri èu ta heleo ne wowadu do petito nga wowadu do peudu he. Hengee j'e, rowi ne wowadu nahed'e lema ke do jad'i ta pewata. Ie d'o èu ta liwa ngati wowadu nahed'e j'e maa tao woapa pa yaa. J'e yaa lema ie d'o ta liwa ngati wowadu nahed'e j'e laa tao woapa pa èu. 53 Ne pejaji dii hed'e, pake ngara Deo Muri ri ama-èpu dii. Do Deo ri ba'i èu Abraham, nga ba'i yaa Nahor. Noo miha hine do jad'i ta mone hèpo kewèlu mij'e pehèpo ne kewèlu unu dii.”

Ta èla pe rènge mihère, ta pehupa ke Yakob pake ngara Deo Muri do mejura ri ama noo Isak.

54 Èla pe nène, ta tèb'u b'ada ke Yakob, ta ègu ke ri noo ta jad'i b'ara tunu menahu wie Muri pa d' ida lede nène. D'ai j'e pedoa ri noo ne dèu he hari-hari ta nga'a hela'u-la'u, j'e mete roo tade j'èmi ae pa era nène.

55 D'ai ta do b'èrirai ne rai j'èmi ae he, ta laa ked'aka-hengèd'u ke ri Laban ne ana-èpu noo he hari-hari. D'ai ta wie mèngi ke roo ri noo, j'e b'ale noo la rai noo.