2 Ta j'ege ke noo ri Yakob, “Ènye ri èu yaa d'ee Muri wod'o, j'e nara ta wie èu ana!?”

3 D'ai ta lii ke Rahel, “Mihed'e! Rihi ie ri ama ta ègo ne naènu yaa Bilha. Kako we laa bèj'i nga noo, mij'e era noo ana tuu yaa.”

4 D'ai ta wie ke ri noo Bilha pa ihi èmu noo. Ta bèj'i ke Yakob nga noo. 5 D'ai ta tèni ae ke Bilha, ta metana ke noo he dèu ana womone. 6 Ta lii ke Rahel, “Rènge ke ri Deo ne lii heb'aj'a yaa. Ri mihère ke èla ke ri Noo pe wie yaa he dèu ana womone. Èla ke ta pehèpo kewèlu yaa ri Muri nga mola-mira.” Ta wie ngara ke ri noo naiki nène ta, Dan (ne do ihi ne ‘hèpo kewèlu’).

7 Èla pe nène, ta tèni ae rike Bilha, ta nara ke noo he dèu ana womone. 8 D'ai ta lii ke Rahel, “Èla ke yaa ta peuji nga a'a yaa, d'ai j'e ne do nara nee yaa.” Ri minahère ke hiku wie ngara ri noo naiki nène ta, Naftali (do ihi ne ‘peuji’, ki ad'o ‘peluru’).

9 Ta toi ri Lea ta dod'o nara ana rii noo, ta wie ke ri noo naènu noo Silpa pa ihi èmu noo, mij'e banga èmu nga noo. 10 D'ai ta metana ke Silpa he dèu ana womone. 11 Ta lii ke Lea, “Ie ke ne kelue muri-mada yaa.” Nga wie ngara ri noo naiki nène ta Gad (ne do ihi ne ‘kelue do woie’).

12 D'ai ta metana rike Silpa he dèu ana womone. 13 D'ai ta lii ke Lea, “Owe! Nad'ee ko j'e'itu mengèlu ne d'ara yaa! Heleo we hine hari-hari wobèni do ta pedae, ta yaa d'ee do rihi mèngi.” Ri minahère ke hiku wie ngara ri noo naiki nène ta Aser (do ihi ne ‘mengèlu d'ara’).

14 He wari, pa awe wègi are, ta kako ke Ruben laa j'ami, ta ngède ke ri noo na'aj'u do nara ta pe'era dèu nga ana. Ta ègo ke ri noo wie ina noo Lea. Ta ngède minahère, ta ami le ke Rahel pa Lea, “A'a ee! Wie kowe yaa hudi ruaj'u do ègu Ruben ne.”

15 Tapulara ta b'ale ke ri Lea, “We! Èu d'ee do rihi tèra j'o! Èla ke ri èu ta rabe ne ihi èmu yaa. J'e ne rike ri èu ta rabe ne ruaj'u ngati ana yaa rii? Èu d'ee, i'a d'o mekae d'ara!”

Tapulara ta lii ke Rahel, “Mihed'e a'a. Kiri nara yaa ne ruaj'u nène, mèd'a d'ee ie ma èu ta bèj'i nga Yakob.” Ta o'o ke Lea.

16 D'ai ta do mèd'a lod'o he, b'ale ke Yakob ngati d'oka. Ta kako ke Lea laa peabu nga noo, j'ee lii, “Yakob! Èu do j'ema ta b'èji nga yaa mèd'a nad'ee! Rowi do èla d'ènge ke pe ma'e èu ri yaa nga ruaj'u unu ana yaa.” D'ai mèd'a do nène ta bèj'i ke Yakob nga Lea.

17 D'ai ta d'èno ke ri Muri ne lii heb'aj'a Lea. Ri mihère ke hiku ta tèni ae ke noo, ta metana ke noo ana womone do kelèmi. 18 D'ai ta wie ngara ke ri Lea naiki nène ta Isaskar (do ihi ne ‘ma'i keloe’), rowi ane noo, “Do èla ke ri Deo Muri pe ma'e ne keloe yaa, j'e do èla ke ri yaa pe wie Silpa pebèj'i nga ihi èmu yaa.”

19 Èla pe nène, ta tèni ae rike Lea, ta metana ke noo he dèu ana womone do ke'èna. 20 Ta lii ke noo, “Èla ke Deo Muri pe wie yaa hadia do rihi woie. Hiku awe nad'ee ihi èmu yaa do j'èma ta pekeb'ue pa yaa, rowi do èla ke yaa pe metana wie noo do èna dèu ana womone.” Ri mihère ke hiku wie ngara ri noo naiki nène ta Sebulon (do ihi ne ‘ta pekeb'ue’).

21 Èla pe nène, ta metana rike Lea he dèu ana wobèni, ta pengare ke ri noo ta Dina.

22 D'ai ta hengee ke Rahel ri Deo Muri, ta d'è no ke ri Noo lii heb'aj'a Rahel. Ri mihère ke hiku ta buka ke ri Noo ne pai ana Rahel. 23 Èla pe nène, tèni ae ke Rahel, ta metana ke noo he dèu ana womone. Ane noo, “Èla ke pe d'ede ri Deo Muri ne mekae d'ara yaa.” 24 Ta wie ngara ke ri noo naiki nène, ta Yusuf (do ihi ne ki pe'ere ‘hane mij'e petabe ri noo’), rowi ane noo, “Ami yaa mij'e wie ri Deo Muri taba pa yaa he dèu ana womone rii.”

25 Awe ta èla Rahel pe metana Yusuf, ta pedai ke Yakob nga Laban, “Ama! Kiri ie he, yaa d'èi ta b'ale la rai yaa ko. 26 Mij'e b'ale yaa nga ègu ana-ihi èmu yaa. Do toi make ri ama, ta do èla ke yaa ta j'èga la'a rui wie ama, hiku do wèle hèpo ke roo ri yaa. Ri minahère ke, nad'ee roo do pa d'ara higa yaa ke.”

27 D'ai ta b'ale ke ri ama matu noo, “Ana yaa ee! D'èno ko ri èu. Do èla ke ri yaa peowe, j'e do toi ke ta, èla ke pewie yaa mèngi ri Muri rowi èu. 28 Hiku nad'ee ta ami hengaa we èu, ta ma'e ma ri yaa! Had'i ta pee we èu pa d'ee, j'e j'èga teruu wie yaa.”

29 D'ai ta b'ale ke ri Yakob, “Do ngède ri ama ma miha, ne la'a-rui yaa. Ri mihère ke hiku juu ae teruu ne b'ada ama he. 30 Pa awe dod'o dèka dae yaa ne, rihi d'o ae ne puhaka ama. Tapulara nad'ee kaja ke ama. Èla ke pewie ri Muri nee mèngi pa ama, rowi j'èga yaa. Nad'ee d'ai ke pa awe ne, yaa d'èi ta j'èga wie ana nga ihi èmu yaa he riko.”

31 D'ai ta keb'ali ke Laban, “Hiku ta ma'e minamii ke èu ri yaa?” Ta b'ale ke ri Yakob, “Tenge d'o ta wie yaa nengaa-ngaa ri ama. Do ta peluja ma ri yaa teruu ne b'ada ama he, had'i ta ie we yaa ta tao he èhi lai.

32 Hane kowe yaa, mij'e kako d'ènge yaa lod'o d'ee la nga b'ada ama he, laa pij'i ne ki'i hawu nga ki'i j'awa. Dod'o b'ule nga dèta, nga dod'o b'ule nga huri he hani ta unu ama. Tapulara kiri do dèta nga do era huri he, hani we ta unu yaa. Nga ègu lema ri yaa hari-hari ne ki'i j'awa do mèdi he. Mij'e hari-hari nahère nara ta ma'e ne keloe yaa.^a 33 He awe hine, ta toi ma ri ama ta do mola ngee yaa we ad'o. Pèri we, ie ma ama ta dèka maa pereha ne b'ada yaa he. Kiri ngèdi ki'i hawu dod'o dèta, ki ad'o do huri, ki ad'o ki'i j'awa do pudi, ta toi d'ènge ma ri ama ta do pe'angu ri yaa b'ada ama.”

34 D'ai ta o'o ke Laban nga pali, “Ie lema! Mihère we.” 35 Tapulara lod'o nène d'ènge ta petala ke ri Laban hari-hari ne b'ada do dèta, do huri, nga ki'i j'awa do mèdi. D'ai ta lii ke noo pa ana noo he mij'e ta pemane ne b'ada nahère. 36 D'ai ta ègu ke ri roo ne b'ada nahère la he èhi era do j'eu, ne j'èu noo tèlu lod'o ne kako b'eb'o ngati Yakob. D'ai do peluja ko ri Yakob ne ki'i hawu-ki'i jawa ama matu noo do hiha he.

37 Èla pe nène, ta èta ke ri Yakob tèlu kelai aj'u ngati aj'u do pewala, j'e hio ri noo pe gari-gari. 38 Tao ri noo ne aj'u do gari-gari he pa kerab'a nginu b'ada he. Ne b'ada he d'èi ta kawi pa era nginu nène. 39 Hiku kiri pa d'ara ta kawi pa hed'apa aj'u do gari-gari he, kiri metana ne ana roo he hine, ne rèu roo he lema do dèta nga era do huri.

40 D'ai pa awe ta kawi ne b'ada Laban he, pehed'apa roo ri Yakob la nga b'ada do dèta nga do huri he. D'ai ne ana roo he hèu le ta do dèta nga do huri. Nga minahère, ne b'ada noo miha juu la'a ae. D'ai ta petala ke roo ri noo ngati b'ada unu Laban he. 41 Pa d'ara nga kawi ne b'ada do rui he, tèke ri Yakob ne aj'u do gari-gari he pa hed'apa roo, pa kerab'a nginu roo. 42 Tapulara kiri do ngèdi b'ada do kelad'u do kawi, tèka d'o ri noo ri aj'u he. Hiku nara Laban hari-hari b'ada do kelad'u he. Tapulara Yakob nara b'ada do rui-do kedii he hari-hari. 43 Nga mihère, jad'i Yakob ta do kaja kete'e. Ki'i hawu noo, ki'i j'awa, onta, keledai, nga naènu he do d'ai ae.