Yakob d'ai la èmu makemone noo Laban
29
Èla pe nène, ta kako ke Yakob teruu la bara dimu. 2 D'ai helod'o, ta ngède ke ri noo he wue èi mada peumu nga he wue rae. Peumu pa nène era ki'i hawu-ki'i j'awa tèlu kewolo, era do mata ta nginu pa nène. Tapulara era he wue wowadu do worena do henèb'e ne èi mada nee. 3 Ne tima nee, kiri pekupu ko hari-hari ne ki'i hawu-ki'i j'awa he, j'e j'ari ta riho ne wowadu nee ri mone b'ata he mij'e tèd'a èi ta penginu b'ada he. Èla ta nginu, ta henèb'e rike ri roo keb'ali ne èi mada nee.4 D'ai ta laa keb'ali ke Yakob pa mone b'ata b'ada he, “Naa ee! Ngati mii he rae muu?”
Ta b'ale ke ri roo, “J'ii hed'e, ngati rae Haran.”
5 D'ai ta keb'ali rike Yakob, “Tade make ri muu ne makemone yaa Laban we ad'o? Noo ne, ana ri Nahor.”
Ta b'ale ke ri roo, “Tade ma ri j'ii.”
6 D'ai ta keb'ale rike ri Yakob teruu, “Nèi ma noo do ie-ie wod'o?”
Ta b'ale ke ri roo, “Dokepai ne nèi do ie-ie ma. Heleo ko. Oni na nii ne ana wobèni ri noo, ne ngara noo Rahel, nèi do nga kelau ne ki'i hawu-ki'i j'awa noo he ta maa penginu èi ma d'ee. Mate kowe ri èu.”
7 D'ai ta lii rike Yakob, “Nad'ee do d'ida lod'o ko. Hiku rihi ie b'ada namii do pekupu pa d'ee, rihi ie ta penginu we ri muu. D'ai j'e kelau ri muu la pad'a mij'e nara roo ta nga'a j'u'u rii.”
8 Tapulara ta pelawa ke roo, “Eee, jad'i d'o ta minahère! Mata kowe ri j'ii ta dèka hari-hari ne mone b'ata he nga ègu b'ada roo j'e pekupu pa d'ee, j'e riho ri j'ii ne wowadu ne j'e penginu ne b'ada he.” 9 Pa d'ara ta pedai lii ko Yakob nga dèu nahère, ta d'ai ke Rahel nga ki'i hawu-ki'i j'awa ama noo he. Noo do tima ta b'ata ne b'ada nahère.
10 D'ai ta ngède ri Yakob ta do dèka ke Rahel nga ki'i hawu-ki'i j'awa noo he, ta laa riho ke ri noo ne wowadu do henèb'e èi mada nee. D'ai j'e penginu ri noo ne b'ada makemone noo he. 11 D'ai ta laa ked'ake laa hengèd'o ke ri noo Rahel nga tangi. 12 D'ai ta ped'ire ke ri noo pa Rahel, “Nawèni ee! Yaa d'ee ana ta nawèni ri ama èu, ina Ribka.” Ta perai b'ale ke Rahel j'e laa pika pa ama noo.
13 Ta rènge ri Laban ne lii ped'iri Rahel j'ara Yakob, do ana ri nawèni noo Ribka, ta perai ke noo laa mate Yakob. D'ai ta peabu, ta ked'ake ta hengèd'o ke noo ri Laban, d'ai j'e ègo Yakob la èmu noo. D'ai ta ped'iri ke hari-hari ri Yakob pa Laban. 14a D'ai ta lii ke Laban, “Do tèra ma! Dii d'ue hed'e do petuèhu ko!”
Yakob banga èmu nga Lea nga Rahel
14b Ta d'ai Yakob ta he wèru ne pee nga roo, 15 ta lii ke Laban pa noo, “Yakob ee! Wae d'o yaa ta j'èga parahee hewe èu wie yaa, hala ri do petuèhu dii d'ue. Ami ta ma'e hengaa èu ri yaa?”
16 Ne Laban d'ee, do era nga ana wobèni do d'ue dèu. Do bèni a'a ne, ngara ta Lea. Do bèni ari ne, ngara ta Rahel. 17 Lea d'ee, ne namada noo do wo kere.a Tapulara worèwu Rahel d'ai bèni ie, nga d'ai petonga ne ngi'u ne. 18 Yakob do d'èi nga Rahel. Hiku ta b'ale ke ri noo pa Laban, “J'èga yaa wie makemone pidu b'ue tèu, had'i ta pebange èmu we yaa nga Rahel.”
19 Ta b'ale ke ri Laban, “Owe! Rihi ie tèra ta pebanga èmu we ri yaa Rahel nga èu, ri do tuèhu yaa miha! Tenge d'o noo ta banga èmu nga dèu do hewala. Hiku pee pa d'ee we èu, j'e j'èga wie yaa.” 20 D'ai ta j'èga ke Yakob pidu b'ue tèu, mij'e nara ta banga èmu nga Rahel. Ri do d'ai d'èi made noo nga Rahel. Hiku pidu b'ue tèu nène, era mii pèri lod'o hewe.
21 Liwa ngati pidu b'ue tèu do nène, ta pehengee ke Laban ri Yakob, “Makemone ee! Èla ke yaa ta j'èga wie makemone pidu b'ue tèu, hiku nad'ee pebange èmu we yaa nga Rahel.”
22 Ta tao lai peloko nga'a ke Laban, j'e pedoa hari-hari dèu pa rai nène. 23-27 Mèd'a do nène, wie d'o Rahel ri Laban, tapulara pemaho ri noo Lea la d'ara leo Yakob. Hiku Yakob bèj'i nga noo. D'ai ta j'èmi ae, j'e toi ri Yakob, ta do banga èmu nga Lea noo. Ta kèri ke Yakob j'e laa lii pa Laban, “Ta ngaa hiku pelue yaa ri makemone nee? Èla ke yaa ta j'èga hetenga made helama pidu b'ue tèu mij'e nara Rahel! Ta ngaa hiku pehure ri makemone ri Lea?”
D'ai ta b'ale ke ri Laban, “B'ole b'ani we èu minahère! Pedutu uku j'ii pa d'ee, ie d'o do bèni ari ta banga èmu uru ngati do bèni a'a. Hiku rihi ie mihed'e we! Mate kowe ri èu tade liwa ne pidu lod'o peloko nga'a do nad'ee. J'e nara ta ègo ri èu Rahel, had'i ta j'èga rii we èu wie yaa pidu b'ue tèu.” D'ai ta wie ke ri Laban ne ènu noo do wobèni, do ngara ta Silpa mij'e jad'i ta naènu ri Lea.
28 Ta o'o ke Yakob. Hiku ta moko ne awe peloko nga'a do pidu lod'o ne, ta pebange èmu ke ri Laban Rahel nga Yakob. 29 D'ai ta wie rike ri Laban he dèu ènu noo do wobèni, do ngara ta Bilha mij'e jad'i ta naènu ri Rahel. 30 D'ai ta bèj'i heke Yakob nga Rahel. Noo rihi haj'a nga Rahel ki penono nga Lea. Ta j'èga rike noo taba pidu b'ue tèu wie ama matu noo.
Ana ri Yakob he
31 Tapulara do toi ri MURI ta do rihi d'èi Yakob nga Rahel ki penono nga Lea. D'ai ta hane ke ri Noo Lea pe'era nga ana. Tapulara pi'a d'o Rahel nga ana. 32 D'ai ta tèni ae ke Lea, ta nara ke noo he dèu ana womone. Wie ngara ri noo naiki nène ta, Ruben (do ihi ne ‘heleo, era ana’),b rowi ane noo, “Do heleo tèra ri MURI ne hedui yaa. Ri minahère ke, hiku ihi èmu yaa wae lema ta heleo yaa.”
33 Èla pe nène, ta tèni ae rike Lea, ta nara ke noo he dèu ana womone. Wie ngara ri noo naiki nène ta, Simeon (kita pe'ere ne ihi nee ‘rèngi ke dèu’), rowi ane noo, “Do rènge ke ri MURI ta ihi èmu yaa ad'o do pehebeo nga yaa. Ri minahère ke hiku petabe ri Noo he dèu ana rii wie yaa.”
34 Èla pe nène, ta tèni ae rike Lea, ta nara ke noo he dèu ana womone. Wie ne ngara ri noo naiki nène ta Lewi,c rowi ane noo, “Nga naiki nad'ee, moko ke kewèlu yaa. Do too ke ihi èmu yaa ta he'uj'u nga yaa, rowi do èla ke yaa ta metana wie noo do tèlu dèu ana womone.”
35 Èla pe nène, ta tèni ae rike Lea, ta nara ke noo he dèu ana womone. Ta wie ngara ke ri noo naiki nène ta, Yahuda (kita pe'ere ne ihi nee ‘waje’), rowi ane noo, “Awe nad'ee, yaa d'èi ta wue waje MURI!” Èla pe nène, metana d'oke Lea ana.