28
D'ai ta pedoe ke Yakob ri Isak, ta wie ke ri noo mèngi nga lii jaji, “D'èno pe'ie! B'ole banga èmu j'e èu nga ana wobèni do Kana'an. 2 Tapulara kako èu la Padan Aram, la èmu ba'i Betuel. Kako èu laa banga èmu nga he dèu ana wobèni ri makemone èu Laban.a 3 Hane we Deo Muri do Rihi Higa ta wie mèngi pa èu, mij'e ana-oha èu juu ta lowe, nga kolo-loro èu jad'i ta rai do ketutu. 4 Hane we ne lii jaji Muri pa Abraham ta tuu pa èu, nga kolo-loro èu. Mij'e unu ri èu ne worai do èla pejaje ri Muri pa Abraham.”b 5 Ta èla pe lii minahère, ta gole ke Yakob ri Isak la Padan Aram, la èmu makemone noo Laban nga ba'i noo Betuel.Esau banga èmu nga ana wobèni ri Isma'el
6 Ta rèngi Esau, ta do Isak èla ke pe wie mèngi pa Yakob, nga lara pa noo ta b'ole banga èmu nga ana wobèni do Kana'an. Rèngi lema noo ta do ama noo do lii pa ari noo, ta laa banga èmu nga ana wobèni ri makemone noo pa Padan Aram. 7 D'ai ta rènge ri Yakob ne lii pereda ina-ama noo, ta pekèd'i ke noo la Padan Aram.
8 Toi lema ri Esau ta dod'o d'èi ama noo nga ihi èmu noo do Kana'an he. 9 Hiku kako noo laa nga mae noo Isma'el, d'ai ta banga èmu rike noo nga ana ri Isma'el do ngara ta Mahalat. Mahalat ne, bèni ari ri Nebayot.
Lai nii Yakob pa Betel
10 D'ai ta kako ke Yakob j'e hane Beer Syeba, d'èi ta kako la Haran. 11 D'ai ta jèna lod'o, d'ai ke noo la he èhi era, ta bèj'i ke noo pa nène. Pa awe d'èi ta bèj'i noo, ta ègu ke noo he wue wowadu j'e tao ta nèlu.
12 Mèd'a nène ta nii ke noo. Ngède ri noo he èhi taga do titu pa worai j'e ne huu ne lohe la liru. D'ai ne dèu pejuu Deo Muri he ngati sorga do ha'e-puru pa taga nène. 13 Pa d'ara lai nii nène, ngède ri Yakob MURI do titu pa hebèka noo j'e lii, “Yaa d'ee MURI, do Deo Muri ri èpu mone èu Abraham nga ama èu Isak. Do ta wie ri Yaa pa èu hine worai nad'ee nga pa kolo-loro èu. 14 J'e kolo-loro èu he hine ne ae roo mii lawo worai. J'e roo hine do menyèla la mii-mii pa hari-hari era. Ngati kolo-loro èu hari-hari udu nga kerogo pa rai-wawa hine, do ta nara mèngi.c 15 Hengee pe'ie! La mii we èu ne kako, do ta era ma Yaa hela'u-la'u nga èu j'e jage èu. Do ta ègo èu ri Yaa peb'ale ma rai nad'ee hine. J'ane d'o èu ri Yaa miha. Nga lema hine do ta pejad'i ri Yaa hari-hari ne do jaje ri Yaa pa èu.”
16 Ta merèi Yakob ngati bèj'i ne, ta lii ke noo, “Itu ta toi kowe ri yaa ta MURI do era lema pa d'ee!” 17 Meda'u noo, ta pereke ke ri noo, “We! Ta koro rèu we yaa pa era nad'ee. Do too ke pa era nad'ee ta èmu ri Deo Muri! Nad'ee ke hino ne ub'a kelae la sorga.”d
18 Rai j'èmi ae ta kèd'i ke Yakob, d'ai ègo ri noo ne wowadu do pake ri noo ta nèlu ne, j'e petito ta he wue rutada. D'ai ta hale ke ri noo ri èi mènyi pa d'ida wowadu ne, j'e mejura pa Muri. 19 Pehune ri noo ne ngara era do nène ta, Betel, do ihi ne ‘Èmu Muri’. (Do hewari ne, era nène ngara ta Lus).
20 Èla pe nène, ta pehupa ke Yakob, “Kiri do era Deo Muri hela'u-la'u nga yaa, j'e do jage yaa d'ee pa ruj'ara yaa, nga wie yaa nga'a nga b'ara pake, 21 tade b'ale yaa nga helama, MURI do ta jad'i Deo yaa hine. 22 Wowadu do petito ri yaa nad'ee, jad'i ta era wie mejura pa Deo Muri. Nga harièle do wie ri Muri pa yaa, do ta peb'ale ri yaa henguru parahee ngati hari-hari hine.”