5-6 Pa awe do muri-mada ko Abraham, do peb'agi ke ri noo wie ana-oha ri Hagar nga Ketura he, he dèu-he dèu nga puhaka roo. D'ai ta lii ke noo pa roo, ta laa pee la heb'èka bara dimu ri Kana'an, mij'e pej'èu èni roo ngati ana noo Isak. Tapulara ne puhaka noo harièle, do wie pa Isak.

7-8 Made Abraham pa awe pemuri noo hengahu pidu nguru lèmi b'ue tèu. 9-10 D'ai ta pedane ke noo ri ana noo Isak nga Isma'el pa lie Makpela do peumu nga Mamre. Do hewari ne, wèle ri Abraham d'oka nène ngati dèu do Het, ngati Efron do ana ri Sohar ne. Uru do èla lema ke ta pedane ri roo Sara pa lie nène. 11 Ta èla pe made Abraham, ta wie mèngi ke pa Isak ri Deo Muri tade muri-mada noo nga tuu ngee-mengèlu d'ara. Awe nène, Isak do pee peumu nga èi mada, do ngara ta Lahai Roi.

12 Nad'ee ne lii ped'iri j'ara Isma'el. Noo ana ri Abraham nga ihi èmu noo do ngèru do ngara ta Hagar. Hagar ne, naènu ri Sara do ngati Mesiir. 13-16 Ana ri Isma'el do henguru d'ue dèu ana womone. Nahed'e ne ngara ana noo he ne pelere rai ngati do mone a'a lohe la do mone ari: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, nga Kedma. Ne naiki nahère, jad'i ta ama-èpu ri do henguru d'ue udu-rai, miha-miha nga rai roo miha. Pehune ngara ri roo ne rai nahère pedutu nga ngara ama-èpu roo miha-miha.

17 Made Isma'el pa pemuri noo hengahu tèlu nguru pidu b'ue tèu. 18 Tapulara ne kolo-loro noo he, do pemuhu he dèu nga he dèu. D'ai pee roo pemenyèla rai ngati Hawila lohe la Syur, do pewata nga rai Mesiir lohe la Asyur.^a

19 Nad'ee lii ped'iri j'ara lua Isak ana ri Abraham. 20 Pa awe Isak ta banga èmu nga Ribka, ne pemuri noo èpa nguru b'ue tèu. Ama ri Ribka Betuel. Nga namone ri noo, ngara ta Laban. Roo he, do Aram ngati Padan Aram.^b

21 B'ule d'o Ribka nga ana. Ri minahère ke hiku tuu ta heb'aj'a Isak pa MURI, mij'e ami pa Noo ta buka ne pai-ana Ribka. Rènge ri MURI ne lii heb'aj'a noo, ta era nga ana ke Ribka. 22 D'ai ne pedèka noo do tèni ae ana do kedue. Tapulara ne naiki he mèri nga peluru we pa d'èlu ina roo. Ta keb'ali ke Ribka pa d'ara pengee noo, “Ta ngaa mèra naiki nahed'e d'ue hino?” D'ai ta keb'ali ke noo pa MURI’

23 Ta b'ale ke ri MURI,

24 Ta da'i pa awe ne, ta metana ke Ribka d'ue dèu ana womone do kedue. 25 Ana do mone a'a do mea, j'e ne hari hengi'u noo do rèu. Ri minahère ke hiku pehune ngara noo ri roo ta Esau (do ègi ta hela'u nga lii do hewala ne do ihi ne ‘do rèu’).

26 Èla pe nène, j'e'itu mèhu èni ne ari noo. Tapulara noo era do ème ne wodèto a'a noo. Ri minahère hiku wie ngara noo ri roo ta Yakob (do ègi ta hela'u nga lii do hewala ne do ihi ne ‘wodèto’). Pa d'ara ta metana roo d'ue, pemuri Isak do èna nguru b'ue tèu.

27 D'ai ta kepai ne naiki do d'ue dèu he, Esau jad'i ta do rihi i'a pehob'o b'ada. Noo do tima ta pee pa ro'a j'ami. Tapulara Yakob ne do wotèmu hewe, j'e noo do tima ta pee pa èmu hewe. 28 Isak do rihi d'èi ta nga'a hed'ai b'ada ngati ro'a j'ami. Ri minahère ke hiku do rihi haj'a noo nga Esau. Tapulara Ribka d'ai haj'a nga Yakob.

29 He wari, pa d'ara nga hogo èi kua keb'ui Yakob, Esau ta b'ale kowe ngati kelèti b'ada. D'ai keloe noo nga menganga hetenga made. 30 Ta lii ke noo pa Yakob, “Ari ee! Wie kowe ne èi kua do mea pa èru èu ne hudi he, mij'e ihe ko ne d'èlu yaa! Rowi ne do rihi menganga ke yaa.” (Ri minahère ke hiku pedoe noo ri roo ta, Edom, ne lii ne do ègi ta hela'u nga li do hewala, do ihi ne ‘mea’.)

31 D'ai ta b'ale ke ri Yakob, “Owe a'a. Tapulara wie kowe pa yaa ri a'a ne higa mone a'a do unu a'a ne!”^c

32 Ta b'ale ke ri Esau, “Hane la'a èu ne higa mone a'a nee! Ègo we ri èu. Mèka d'oke yaa ri menganga. Hure we mèriai ne èi kua ne, j'e ègo ma d'ee, do ta nga'a ke yaa.”

33 Tapulara ta lii rike Yakob rii, “Mata ko a'a ee! Hupa kowe a'a, ta do wie ke pa yaa ri a'a ne higa ne.” Ta hupa ke Esau minahère. 34 D'ai ta hure ke ri Yakob wie noo ne èi kua keb'ui ne, nga roti. Ta èla Esau pe nga'a-nginu, ta kèd'i ke noo j'e lènga.

Nga minahère, ta wie parahee hewe ri Esau ne higa noo ta mone a'a ne.