Abraham pepote pa duae Abimelek
20
D'ai ta pida ke Abraham ngati Mamre, j'e kako laa rai Negeb pa hèb'èka b'olou, j'e laa pee noo pa telora ri rae Kades nga Syur. Tapulara tui d'o hudi, ta pida rike noo la rae Gerar. 2 Ta pika ke noo pa dèu pa nii he ta Sara d'ee nawèni ri noo. Ri minahère ke Abimelek, duae do Gerar, ta pejuu ke dèu noo he ta laa ame Sara, j'e ègo laa èmu duae. Ri do èla ri noo ta èbe ne ihi èmu ri Abraham, hiku tuu ta pekebaki ke ri MURI hari-hari wobèni do pee pa telora rai Abimelek. 3 Pa d'ara herèmi, ta pengèdi èni ke Deo Muri pa duae pa d'ara lai nii. Ta lii ke Noo, “Umu ke j'e èu ta made, nad'ee! Rowi èu nène ke do ègu ihi èmu dèu.”4-5 Tapulara ta b'ale ke ri Abimelek, “Muri! B'uje ded'o j'e ri yaa ne wobèni nène. J'e hala led'o ma yaa. Lii Abraham maj'e miha ta wobèni do nène ta nawèni noo ma! J'e wobèni nène lema do lii minahère. Hiku pejuu ri yaa ta laa ègo nga mola-mira. Hiku b'ole pehale yaa ri Muri!”
6 Ta b'ale ke ri Muri, “Toi ma ri Yaa ta do woie èu. J'e ri Yaa lema ke do tahe mij'e ta dod'o b'uje dae ri èu ne wobèni do nène. Nga minahère tao led'o ma èu hala penaja nga Yaa. 7 Moe we peb'ale ri èu ne wobèni do napone laa nga ihi èmu noo. Noo ne, mone ub'a unu Yaa. Hiku ami ko èu pa noo ta heb'aj'a wie èu, mij'e dod'o made èu. Tapulara kiri dod'o peb'ale ri èu ne wobèni do napone, hengee pewoie ri èu! Rowi èu nga dèu èu he do ta made hine na.”
8 Rai j'èmi ae do b'èrirai he, ta pedoa ke ri duae hari-hari ne pegawe noo, j'e ped'iri ne lai nii noo. Hiku ta meda'u ke roo hari-hari. 9 Dai ta pedoe ke Abraham ri duae, j'e keb'ali, “Tao hala ngaa he yaa pa èu, hiku pehilaka yaa ri èu nga dèu rai yaa minahed'e? Ie d'o j'e èu ta tao lai do woapa mihed'e. 10 Nengaa j'e do pereke ri èu ne, hiku tao èu mihed'e?”
11 Ta b'ale ke ri Abraham, “Ama duae! Ènye ri yaa muu hari-hari ad'o dèu do tade Deo Muri. Hiku do too ke ta era dèu do d'èi ta pemade yaa j'e ègo ne ihi èmu yaa. 12 Do petuu tèra ma ne do peke ri yaa ta noo d'ee nawèni ri yaa. Rowi j'ii d'ue do heama we tapulara do wala ina. Ri mi nahère ke hiku pe'ègu j'ii d'ue ta ihi èmu. 13 Hiku pa d'ara ta pepuu j'ii ri Deo Muri laa kale muri-mada, ta lii ke yaa pa ihi èmu yaa, ‘Ki kako dii la mii-mii, j'e era dèu do keb'ali ne petuwu dii, j'e ki do haj'a lema èu nga yaa, b'ale j'e ri èu, ta do pe namone nawèni ko dii d'ue.’”
14-16 D'ai ta peb'ale ke Sara ri Abimelek. Ta lii ke noo pa Sara, “Ma'e ri yaa wie namone èu he tèb'a doi melaa pudi, mij'e jad'i ta rutada ta ad'o yaa do tao hala nengaa-ngaa pa èu. Mij'e toi ri hari-hari dèu ta minahère!”
Ta pedai lii ke duae nga Abraham, “Abraham! Rai yaa d'ee do buka bèla wie èu. D'èi ta pee la mii we èu, ie ma.” D'ai wie lema ri noo Abraham hapi nga ki'i he. Wie lema ri noo naènu womone nga wobèni he.
17-18 D'ai pa d'ara ta peb'ale Sara laa nga ihi èmu noo, ta heb'aj'a ke Abraham, mij'e buka b'ale ri Muri ne kad'o roo. Mij'e nara roo ta era nga ana.