Dèka do tèlu dèu laa peabu nga Abraham
18
Pa d'ara he wari, Abraham era do pee peumu nga kepue aj'u do mone ae he pa Mamre. Ta dèka ke MURI laa pengèdi èni pa noo pa nène. Ne lii ped'iri ne mihed'e: Lod'o nène d'ai pana lod'o hiku Abraham do mejèd'i ta kale ngèlu pa hed'apa naleo ne. 2 D'ai ta pekèd'i kètu Abraham ta ngèdi ke ri noo do tèlu dèu do titu pa nii. Ta mèriai ke noo laa mata roo. Ta lèku rutuu ke noo, 3 j'e lii, “Ama he! Mai kowe maa hare ma naleo yaa hudi he. Ta nginu èi loko wue he lema we nga d'o. 4 Pengaha keloe kowe ama pa d'a'i raimawo. Do ta ègu ma naa he èi loko nèb'o ta lonye j'èla ama he. 5 Do ta pemoko ma yaa nga'a wie ama he nèb'o, mij'e nara ta rui j'e kako teruu. Rowi yaa do d'èi ta ruba nga ama he.”D'ai ta b'ale ke ri roo, “Owe. Makasi banya, ama oo. Ta hare ke j'ii.”
6 Ta perai ke Abraham laa èmu ne j'e pika pa Sara, “Mèrièi ko! Laa ègo terigu do woie ne he karo, j'e tao ko ta roti.”a
7 D'ai ta perai ke noo laa nga hapi noo he, j'e pij'e ri noo he ngi'u ne ana hapi do keb'èb'u. Èla ta mihère ta lii ke noo pa dèu j'èga noo ta lore ne hapi ne j'e hoge ne ihi ne. 8 D'ai ri ta kako ke Abraham laa ègu èi huhu, keju, nga hed'ai do èla ta hoge ne, j'e ègu ri noo wie dèu do dèka he. Pa d'ara ta nga'a roo, ta titu ke noo pa raimawo na'aj'u he j'e ruba nga roo.
9 D'ai ta keb'ali ke roo, “Abraham! Nèi pa mii ihi èmu èu Sara?”
Ta b'ale ke ri noo, “Pa d'ara èmu ne.”
10 D'ai ta lii ke he dèu ngati roo, “Ki pe'ere he tèu hed'ape d'ee, do ta dèka ri Yaa. Awe nène, ihi èmu èu Sara do èla ke ta metana he dèu ana womone.” Pa d'ara ta lii mihère roo do d'èno ma ri Sara ngati kej'unga kelae nee.
11 Awe nène, do d'ai weka tèra ke Abraham nga Sara j'e Sara lema do pengaha ke ne nara dora'i. 12 Ta rèngi ne lii pedai roo minahère, ta mari pa d'ara ke Sara. J'e pereke ri noo, “Ina ee! Do weka apa mihed'e ke yaa, j'e ihi èmu yaa do keloe leke. Minamii rike j'ii rii ne d'èi ta mii dèu do itu ta banga èmu he, j'e kale ana ri ko?”
13 Ta keb'ali ke MURI pa Abraham, “Ta ngaa j'e Sara hiku mari ne? Ne pereke ri noo nengaa ne do lii Yaa d'ee, ad'o do medae ta jad'i, ri do weka ke noo wod'o? 14 Yaa d'ee MURI! B'ule d'o dod'o nara ta tao ri Yaa! Hengee pe woie! Kiri dèka Yaa hine ma d'ee tèu hed'ape d'ee, do èla ke Sara ta metana he dèu ana womone.”
15 Ta rènge mi nahère ta meda'u ke Sara. D'ai ta pehile ke ri noo, “Mari d'o j'e yaa b'oke!”
Tapulara ta lii ke Muri, “Do mari tèra ma èu ngine ne.”
Abraham hèku ta ome Muri ta b'ole wolo ne do Sodom he
16 D'ai ta pekèd'i ke ne dèu dèka do tèlu dèu he ta la rai Sodom. Ta laa pengèdu ke roo ri Abraham lohe la telora ruj'ara. Ngati nène, nara ri roo ta heleo rai Sodom. 17 Ta lii ke MURI pa d'ara pengee, “Rihi ie ta peke ko ri Yaa pa Abraham ta do ta pemae ri Yaa ne rai Sodom. 18 Rowi ne kolo-loro roo hine do ta juu ae, j'e do ta jad'i dèu rai do rui. Noo do ta jad'i mèngi tuu hari-hari udu pa rai-wawa do nad'ee hine. 19 Do èla ke ri Yaa ta pij'e noo, mij'e peaj'a ne ana-oha noo nga dèu do had'e he, ta pedute teruu ne rujara MURI, j'e muri-mada nga mola ngee mola d'ara. Kinga tao ri roo mihère, do ta tao ri Yaa pejad'i ne lii pedara Yaa nga Abraham.”
20 D'ai ta pika ke MURI pa Abraham, “Mihed'e! Do rèngi ke Yaa ae dèu do peguu j'ara dèu ngati rai Sodom nga Gomora. Ne woapa had'a roo do rihi keliwa ke. 21 Ri minahère ke hiku puru Yaa ta maa pereha miha, ta nengaa ne do rènge ri Yaa ne do petuu we ad'o. Kiri do ad'o, do ta toi ma ri Yaa hine.”
22 Do pa d'ara nga pedai lii ko MURI nga Abraham, ne dèu dèka do d'ue dèu he ta kako teruu ke roo laa rai Sodom. 23 Ta laa peumu èni ke Abraham nga Muri, j'e ome, “Minamii, Ama? D'èi ta pemade ri Ama ne dèu do woie nga dèu do woapa had'a hela'u-la'u wod'o? 24 Kiri era do lèmi nguru dèu do woie pa rai nène, do ta pemae koma ri Ama ne dèu nahère hari-hari wod'o? We gae ta dod'o pemae ri Ama ne rai nène ri do era roo. 25 B'ole pemae ri Ama roo mihère! Mid'o mad'e le ne dèu do woie he, taga ri ta laa pemae ne do woapa had'a he ri Ama. Ama do jad'i ta Mone Hèpo Kewèlu pa liru nga rai-wawa. J'e do toi ri Ama ma miha nène ta do mejèni heb'èka.”
26 Ta b'ale ke ri MURI, “Wole d'o ri Yaa rai Sodom, kinga nara Yaa do lèmi nguru dèu do woie.”
27 D'ai ta lii rike Abraham, “Ama, ami huba, ki do nara riko yaa ta pedai lii rii hudi. Yaa d'ee, dèu do b'od'o dod'o tada nengaa-ngaa. 28 Kiri dod'o d'ai he ta do lèmi nguru dèu tapulara era do èpa nguru lèmi he we, minamii? Kinga kura do lèmi dèu we, gae ko ma ri Ama ta pemae ne rai nène wod'o?”
Ta b'ale ke ri Muri, “Kiri nara do èpa nguru lèmi do woie Yaa pa nène, pemae d'o ri Yaa rai napone.”
29 Ta ome rike ri Abraham, “Kiri do èpa nguru hewe ta Ama, minamii?”
Ta b'ale ke ri Noo, “Kiri nara do èpa nguru, wolo d'o roo ri Yaa.
30 Ta ome rike teruu, ri Abraham, “B'ole b'ani b'oke Ama, kiri unu-pala he ta era do tèlu nguru dèu hewe do woie ta, minamii?”
Ta b'ale ke ri Noo, “Kiri do tèlu nguru dèu ne nara Yaa, tuu d'o roo ri Yaa ta wolo.”
31 D'ai ta tawe rike ri Abraham, “B'ole b'ani woke Ama kiri keb'ali ri yaa hud'i. Kiri nara do d'ue nguru dèu hewe minamii?”
Ta b'ale rike ri Noo, “Kiri nara do d'ue nguru dèu wolo d'oke ri Yaa pemae ne rai nène.”
32 D'ai ta pengahe ke ri Abraham ne lii pedai noo nga pali, “Ama! Pedai lii he wari rike yaa, tapulara b'ole b'ani nga yaa oo! Kiri nara do henguru dèu hewe ta, minamii?”
Ta b'ale ke ri Noo, “Kiri nara do henguru dèu do woie Yaa pa nène, pemae d'o ri Yaa ne rai nène.”
33 Ta èla pe pedai lii minahère, ta kako teruu heke MURI, d'ai Abraham b'ale laa èmu.