Hagar nga ana noo Isma'el
16
1-3 Awe do napone, do b'ale ke Abram rai ti Mesiir, j'e do pee ko henguru b'ue tèu pa Kana'an. Ihi èmu noo Sarai nara ded'o ana. Sarai do nga naènu wobèni do Mesiir, ne ngara noo Hagar.Pa d'ara he wari, ta lii ke Sarai pa Abram, “Ama ee! Èla ke ri MURI pe henèb'e ne pai ana yaa. Ne do rihi ie ama laa bèj'i hela'u nga naènu yaa Hagar, mij'e nara noo ta ngèdi ana tuu yaa.”
Ta pedute ke ri Abram ne lii ihi èmu noo. Moko ta wie ke ri Sarai Hagar jad'i ta ihi èmu do ngèru ri Abram. 4 Dai ta laa bèj'i hela'u ke Abram nga Hagar, moko ta melole ke wobèni do napone. Tapulara ta toi ri Hagar ta do melole ke noo, ta wuèni ke noo, j'e d'o pekeb'ue Sarai ri noo.
5 Moko ta lii ke Sarai pa Abram, “Wie ri yaa ne naènu do napone ta jad'i ihi èmu èu do ngèru. Tapulara ta toi ri wobèni do napone ta do tèni ae ke noo, pekeb'ue d'o ke yaa rowi noo. Napone hari-hari hala èu! Hane we pehèpo ri MURI ne kewèlu dii d'ue. Mij'e toi ri èu!”
6 Moko ta b'ale ke ri Abram, “Minahed'e! Èu d'ee ihi èmu yaa do uru. B'ale ma noo ihi èmu do ked'ue hewe. Hiku èu do nga higa pa noo. Nengaa we do d'èi ta tao èu pa noo, e'e ri èu hewe!” D'ai ta tao lai-lai do hedui ke Sarai pehed'apa nga Hagar tade kèd'i j'e perai noo.
7 Perai noo lohe laa pad'a lahalae. Moko ta dèka ke na juu MURI ngati sorga peabu nga noo pe'umu nga mada wètu pa ruj'ara laa Sur. 8 Dai ta lii ke noo, “Wo Hagar naènu ri Sarai! Ta ngaa ke èu hiku era pa d'ee? Ngati mii ke èu, j'e ta ju laa mii?”
Moko ta b'ale ke ri Hagar, “Yaa perai ta j'ane ne muri bèni yaa.”
9 Moko ta ube ke noo ri na juu MURI, “Minahed'e! Rihi ie èu ta b'ale nga muri bèni èu. Tao minamii noo pa èu, hème we. 10 B'ole meda'u èu. Do ta tao ri yaa ne kolo-loro èu pe d'ai ae, lohe ta dod'o nara ta reke roo ri dèu. 11 Awe nad'ee èu ne do melole. Tui d'oke, ta metana èu he dèu ana womone. Pehune ri èu ne ngara noo ta, Isma'el (do miga ta hela'u nga lii do hewala ne ihi noo, ‘rènge ri Muri’), rowi do rènge ke ri MURI ne lii tangi èu. 12 Tapulara d'ai ta kepai naiki do napone, ne muri-mada noo do j'èu ngati tuèhu noo he. Rowi noo hela'u mii jara èdu do d'o d'èno nga lii pedai dèu. Naduu we, do ta lawe ri noo. Nga hari-hari dèu do ta lawe b'ale noo.”
13 Èla pe rèngi minahère, ta lii ke Hagar pa d'ara pengee noo, “Èla ke ri yaa pe ngède MURI, ne do heleo nga menege yaa.” Moko ta pehèle ke ri noo Muri nga ngara “Muri do heleo nga menege yaa.” 14 Ri minahère ke hiku pehune ri dèu ne mada wètu do napone, Beer Lahai Roi, ne ihi noo, “Mada wètu ngati Noo do muri, do heleo nga menege yaa.” Ne era noo pa telora rae Kades nga rae Beret. Ne mada wètu na ène, ne koma hape ma d'ara awe nad'ee.