Deo Muri ta pedara nga Abram
15
Èla mihère, ta pengèdi èni ke MURI pa Abram. D'ai ta lii ke Noo, “Abram! B'ole lob'o èu ta meda'u. Yaa ke ne do lao heti'e èu ngati ihi lawa-ihi muhu èu. Nga do ta wie ri Yaa ne mèngi do ae tuu èu.”2-3 Tapulara ta lii ke Abram, “Deo Muri yaa ee. Maji lema ta wie do ae yaa ri Muri, b'ule d'o ta tuu nengaa-ngaa. Rowi ad'o yaa do era nga ana do ta wie yaa kolo-loro. J'e tuu nengaa ke ne nara unu-oha do d'ai ae nahed'ee? Era ke ta tuu naènu yaa hewe, Eliasar do ngati Damsik ne do nara harièle.”
4 Tapulara ta b'ale ke ri MURI, “Ad'o minahère! Ana èu ma miha hine do ta hème ne puhaka napuhère, ad'o naènu èu.”
5 D'ai ta èbe ke ri Noo Abram pe mèhu èni, j'e lii Noo, “Heleo ko ri èu la liru nid'e. Hèko ko ri èu ta heleo ne mada moto he. Nara ri èu ta reke we ad'o? Ne kolo-loro èu hine hela'u ne ae mii moto do na hid'e!”
6 Moko ta ketèra ke Abram pa lii pedai MURI. D'ai ta pale ke noo ri MURI ta he dèu do mola ngee-mola d'ara, rowi lua mèno kaho Abram pa Noo.
7 Ta pali rike MURI, “Yaa ke ne MURI. Yaa ke do èla pe ègo èu mèhu èni ngati rae Ur pa rai dèu do Kasdim he. Nga Yaa ke ne do wie rai nad'ee tu ta unu-oha èu.”
8 Tapulara ta keb'ali rike Abram, “Ta minamii ke nad'ee MURI? Minamii ne nara ta toi ri yaa, ta do rai nad'ee hine do jad'i ta unu-oha yaa?”
9 Ta b'ale ke ri Noo, “Minahed'e! Mai dii maa tao èhi lai, ta maa pedara pa do èla pe pali ri Yaa ngine ne. Laa ègo ko ri èu maa d'ee dènge ne b'ada tuu Yaa: he ngi'u nahapi muèni, he ngi'u naki'i hawu muèni, nga he ngi'u naki'i j'awa mone. Nahère hari-hari do pemuri tèlu b'ue tèu. Èba lema rowi èu he ngi'u koro iki nga he ngi'u koro j'awa.”
10 Ta kako ke Abram laa ègu ne b'ada napone harièle. D'ai ta kehèb'a ke ri noo pe d'ue b'èka ne hapi ne, ki'i hawu, nga ki'i j'awa. J'e pej'ara ri noo pa worai ne hed'ai he penaja heb'èka nga heb'èka, pe d'ue j'ara. Tapulara ne dolila he kehèb'a d'o ri noo. 11 D'ai ta dèka ke ne dolila do nga'a b'ada made he d'èi ta laa nga'a ne hed'ai he. Tapulara ta b'èga pej'èu ke roo ri Abram.
12 Pa d'ara jèna lod'o, ta bèj'i luu ke Abram. Ta nii ke noo, ta era ke noo do kelib'o ri kerèba guru rai tade meda'u hetenga made noo.
13-15 Moko ta peke ke ri Deo pa noo,
“Abram! Èu do ta muri-mada tade weka ru'u rai, j'e made nga ketèna, j'e pedane èu ri roo nga woie.
Tapulara ne kolo-loro èu he hine, do jad'i ta dèu dèka pa rai dèu do hewala.
Ne dèu rai ngati rai do napone hine do ta tao roo jad'i ta ènu, j'e nèpi pehedui, tade èpa ngahu b'ue tèu.
Tapulara do ta wole ri Yaa ne rai do nène hine.
Èla mihère ta ègu ri Yaa pe mèhu èni ne kolo-loro èu ngati ène, nga èba ne puhaka roo hari-hari.a
16 Do ta peato maa ri Yaa mij'e ne kolo-loro èu do kelèmi he ta b'ale wari ma d'ee hine.
Ne rai nad'ee, ne do pee ri do Amori he ko. Dèu nahee do woapa had'a, tapulara rihi ded'o ne mejèni.
Ki d'ai hine ne ana-èpu èu he ta b'ale ma d'ee, do ta pake roo ri Yaa ta wole pemae ne dèu do Amori he. Rowi awe do napone, do rihi tèra ke ne keliwa ne woapa had'a roo.”
17 D'ai ta mèd'a, keb'èdi ta era ke he wue rao ti worai èru do hèb'u nga obo do weo lake d'ai telora heda'i do d'ue j'ara he. 18 Awe do nène, ta pedara ke MURI nga Abram. Ta pika ke Noo, “Jaji Yaa, do ta wie ri Yaa rai nad'ee pa kolo-loro èu hine, j'ari ngati loko Mesiir,b lohe la loko Efrat, 19 nga rai dèu do Keni, Kenas, Kadmon, 20 Het, Feris, Refaim, 21 Amori, Kana'an, Girgasi, nga Yebus.”