Laa rabe b'ale Lot ri Abram ngati era muhu
14
Awe do napone, era ke do èpa dèu duae do pekupu. Roo he: Amrafel duae rai Sinear. Ariok duae rai Elasar. Kedarlaomer duae rai Elam. Nga Tideal duae rai Goyim. 2 Awe na ène lema era lèmi dèu duae do hewala do pekupu. Roo he: Bera duae rai Sodom. Birsa duae rai Gomora. Sinab duae rai Adema. Semeber duae rai Seboim. Nga duae rai Bela (do rai Soar ne). D'ai ne do èpa dèu duae he ta laa pemuhu ke nga do lèmi dèu duae do had'e he. 3 Do lèmi dèu duae he ta peteni ke nga horod'ad'u unu roo pa kejob'o Sidim, (awe nad'ee do pale ri roo ta Laut Mati).4 Ne kepue pemuhu ne minahed'e: uru he ne do lèmi dèu duae he i'a d'o pekèd'i kètu pa duae Kedarlaomer tade henguru d'ue b'ue tèu. Tapulara d'ai pa tèu do henguru tèlu, ta kèd'i ke roo pelawa nga noo.
5 Awe ta maho la tèu do henguru èpa, d'ai duae Kedarlaomer nga ihianga noo do tèlu dèu duae he ta dèka ke nga horod'ad'u unu noo. D'ai ta pemuhu ke roo pej'ère do pèri b'ue rai. Pej'èra ri roo: do Refaim pa rai Asterot-Karnaim, do Susim pa rai Ham, do Emim pa rai Sawe-Kiryataim, 6 nga dèu do Hori pa lede Seir lohe la era do keb'èla ae pa ngidi El Paran. 7 J'e b'ale wari roo la En Mispat (do awe nad'ee ne ngara noo ta Kades). Èla minahère, pemae ri roo rai dèu do Amalek, nga dèu do Amori do pee pa telora rai Haseson-Tamar.
8-9 D'ai ne do lèmi dèu duae he, ta pemoko ke ne horod'ad'u unu roo pa kejob'o Sidim, j'e pemuhu roo nga do èpa dèu duae he. 10 Pa kej'obo do napone, do era kejèlo tee do ae. Pa d'ara pemuhu he roo, horod'ad'u unu duae Sodom nga duae Gomora, kèd'i ke j'e perai. Had'e ngati telora roo bui maho la d'ara kejèlo tee ne. Had'e perai laa kolo lede. 11 Hiku ne èpa duae do nara he, kako ke laa raba hari-hari unu-oha nga b'ara nga'a ngati Sodom nga Gomora. Ta èla mihère j'e'itu ta b'ale roo.
12 Tapulara ana ari ri Abram, Lot nèi do pee pa Sodom. Moko ne do èpa dèu duae he ta kèpe ke Lot he j'e èbe ri roo, nga raba hari-hari ne unu-oha roo.
13 Tapulara era he dèu do nara ta golo èni. Ta perai ke noo laa pika pa Abram, dèu do Ibrani. Awe do napone, era he dèu do Amori, ne ngara ta Mamre. Abram do pee pe'umu nga aj'u do mone ae do peumu nga Mamre he. Tuèhu ri Mamre Eskol nga Aner. Roo do napone, do peihianga nga Abram. 14 D'ai ta rèngi ri Abram ne lii ta do èle ta kèpe ri dèu ne ana ari noo, ta pekupu ke ri noo ne dèu j'èga noo do i'a pemuhu he. Hari-hari roo era do tèlu ngahu henguru aru dèu. Moko ta kako ke roo laa peraga ne do èpa dèu duae he tade d'ai la rae Dan do j'èu la heb'èka b'od'ae.
15 Pa ène, peb'agi ke ri Abram ne dèu unu noo he ta do pèri kejie. D'ai ta mèd'a, ta kako ke roo laa muhu nga dèu do nahère. Tapulara era do perai. D'ai ta peraga ke roo teruu rowi Abram he, tade d'ai la rae Hoba, pa heb'èka b'od'ae rae Damsik. 16 Moko ta èbe peb'ale ke Lot ri Abram, nga dèu unu noo he, hari-hari unu-oha roo, nga dèu do had'e he lema.
Melkisedek pe'abu nga Abram. Jad'i noo ta duae nga kètu agama ngati Deo Muri lema
17 Pa d'ara ta b'ale Abram ngati pej'èra ne do èpa dèu duae he, d'ai ta dèka ke duae Sodom la mata Abram pa kejob'o Sawe (do tima ta pale ri dèu ta Kejob'o Duae). 18 Awe do napone Melkisedek do jad'i ta duae pa rai Salem.a Noo lema jad'i kètu agama ngati Deo Muri do Rihi D'ida. Dèka noo nga ègu roti nga èi ago wie Abram. 19-20 D'ai ta pedai lii ke noo j'e wie mèngi tu Abram, “Hane we Deo Muri do Rihi Did'a do pe'era liru nga rai-wawa ta wie mèngi pa èu. Pekelode ne ngara Deo Muri rowi do èla ta wie lua nara èu ngati muhu èu he.”
Èla mihère ta petale ke ri Abram wie Melkisedek henguru parahee ngati hari-hari do raba b'ale ri noo he.
21 Èla mihère duae Sodom ta peru'u èni ke pa Abram, nga lii, “Ama Abram. Unu-oha do èla peraba ri ama he ngati ihi muhu yaa he, hani we ta unu ama hari-hari. Tapulara ne do ta ami b'ale ri yaa titu-wata ke ne dèu yaa he we.”
22 Tapulara ta b'ale ke ri Abram, “Hupa yaa pa hed'apa Deo Muri do Rihi Ketutu, do pe'era liru nga rai-wawa, 23 èba d'o ri yaa èhi he ngati unu-oha èu. Maji lema ta he kewudi lua wèngu, èbe d'o ri yaa. Nga mihère, nara d'o èu ta lii ta, ‘Abram ne kaja rowi yaa.’ 24 Ad'o yaa do paraluu nengaa-ngaa. Tituwata nengaa do èla pe pake ri dèu yaa he, reke we ta do èla ke. Nga hani we ne ihianga yaa do tèlu dèu nahed'e, Aner, Eskol, nga Mamre, ta ègu ne unu-pala roo.”