Abram nga Lot ne petala
13
Èla minahère, ta kako ke Abram j'ane rai Mesiir, j'e b'ale laa rai Negeb. Èbe rowi noo ihi èmu noo nga hari-hari unu-oha noo. Ana ta ari ri noo, ngara ta Lot do pedutu hela'u lema nga roo. 2 Ne Abram ne, do kaja kete'e. Ne b'ada peluja noo nga melaa lara-melaa pudi unu noo do rihi ae.3 Ngati Negeb noo do pepida-pida era j'e b'ale laa telora rae Betel nga rae Ai. Do hewari nee do ngèdi ma noo ta pee pa ène. 4 J'e noo lema do èla ta petitu meja tunu menahu. D'ai j'e wie huu mejura ri noo tuu MURI pa ène.
5 Lot do pedutu hela'u nga Abram ne do ae lema ne b'ada peluja noo, nga dèu j'èga unu noo lema do ae. 6-7 Tapulara era do napone rihi d'o ne bèla tuu Abram nga Lot, nga hari-hari unu-oha roo ta muri-mada hela'u-la'u pa ène. D'ai ne mone b'ata b'ada unu Abram nga Lot he j'ari ke ta pehala, rowi pelèma d'oke ne b'ada roo ri j'u'u pa era do napone. (Awe do napone, do Kana'an nga do Feris do pee ko pa ène.)
8 D'ai ta lii ke Abram pa ana ari noo, “Lot, ee! Dii hed'e do petuèhu, b'ole d'ai dii d'ue ta d'o pewoie he dèu nga he dèu, rowi ne dèu j'èga unu dii he pe nga pehala loro. 9 Minahed'e, rihi woie dii d'ue ta petala we. Era nad'ee do d'ai bèla. Hiku kinga pij'e ri èu ta ègo ne rai pa heb'èka keriu, ègo ri yaa pa heb'èka ked'anga. Tapulara kinga pij'e ri èu ta ègo ne rai pa heb'èka ked'anga, ègo ri yaa pa heb'èka keriu.”
10 D'ai ta heleo pehero ke ri Lot. Ta ngède ke ri noo hanga loko Yarden ta do rihi ae èi lohe la rae Soar. Ne mengèru merede era do napone hela'u mii d'oka unu MURI, lema mii rai Mesiir. (Awe do napone, pemae teb'o tèi ded'o ri MURI ne rai Sodom nga Gomora. Hiku do woie ko ne worai pa nii.) 11 Hiku ta pij'e ke ri Lot ne harièle worai pa kejob'o loko Yarden. D'ai ta petala ke roo d'ue. Kako Lot laa heb'èka bara dimu. 12 Tapulara Abram pee ma pa rai Kana'an. D'ai ta kako ke Lot laa pee pa rae-rae do pe'umu nga rai Sodom pa kejob'o Yarden. 13 Tapulara do Sodom he do rihi woapa had'a. Wae d'o roo ta ped'èno nga lii MURI.
14 Ta èla Lot nga Abram ta petala, ta lii ke MURI pa Abram, “Abram! Hèko ko ri èu ta hed'èhi pekewero j'e heleo ko ri èu harièle ne era nahii ngati era titu èu napone. Heleo pe'ie-ie la hed'apa-kej'unga keriu-ked'anga. 15 Harièle ne rai do ngède ri èu napone, do ta wie ri Yaa pa èu hine nga pa kolo-loro èu, do jad'i ta unu-oha muu peloro tade pedèka. 16 Do ta wie ri Yaa ne kolo-loro èu ta peae mii wolahalae pa tèbi dahi, tade dod'o nara ri dèu ta reke ne ae kolo-loro èu. 17 Kako we èu pehero rai nad'ee pedute bèla nga medera. Rowi harièle do napone, do ta wie ri Yaa pa èu hine.”
18 D'ai ta pida ke Abram he j'e laa pee kej'ari pa era do pe'umu nga aj'u-aj'u do mone ae pa Mamre, pe'umu nga rae Hebron. D'ai ta tao meja tunu menahu ke noo j'e wie huu mejura tuu MURI pa ène.