Pedoe Abram ri Deo Muri
12
Awe do napone, MURI do pedai lii ke nga Abram, “Abram! Mèhu èni we èu hane ne ana-oha èu he, èmu ama èu, nga rae kowa èu. Kako ko èu la he èhi era do ta pej'uj'e ma ri Yaa hine pa èu.2 Do ta wie ri Yaa ne mèngi hine tuu èu.
J'e ne kolo-loro èu hine juu ta ae,
do ta jad'i rai do ketutu, lema ne ngara èu ne do tade ri dèu.
D'ai hine èu do ta jad'i mèngi tuu dèu do hewala.
3 Do ta wie ri Yaa mèngi tuu dèu do wie mèngi pa èu hine.
Tapulara do ta mengao ri Yaa ne dèu do mengao èu.
D'èno pe'ie-ie!
Rowi hari-hari udu pa rai-wawa d'ee hine do ta nara mèngi, rowi èu.”
4-5 Awe do napone, pemuri Abram pidu nguru lèmi b'ue tèu. Èbe ri noo ihi èmu noo Sarai, Lot do ana ta ari ri noo, hari-hari ne unu-oha noo, nga harièle ne dèu j'èga noo do nara pa rai Haran. Ta kako ke Abram he hane rai Haran, j'e kako laa pee pa era do lii MURI ne pa noo. Hiku ta kako heke roo teruu, tade d'ai la èhi era, ne ngara Kana'an.
6 Ta d'ai la ène, kako ke Abram pekewero rai do napone, tade d'ai pe'umu nga he wue rae, ne ngara Sikem. Moko ta pee ke roo pe'umu nga he kepue na'aj'u do mone ae pa More. 7 Pa ène, ta pengèdi èni ke MURI pa Abram. Lii Noo, “Do ta wie ri Yaa hine pa kolo-loro èu ne rai na d'ee.” Moko ta petitu ke ri Abram d'ee meja wowadu tuu ta tunu menahu pa MURI, do èla pe pengèdi èni ne ngi'u Noo pa nène.
8 Èla mihère, ta pida ke Abram he ju laa lede pa heb'èka b'olou, j'e pee roo hemelila pa telora rae Betel nga Ai. Pa ène ta petitu ke ri noo ne meja ta tunu menahu pa MURI do wie huu mejura ri noo. 9 Èla pe na ène, ta pida era pee ke noo, tade d'ai la rai Negeb pa heb'èka b'olou ti Kana'an.
Abram kako laa rai Mesiir
10 Pa d'ara he-awe, era wèru menganga d'èlu dod'o mèke ke pa rai Kana'an. Ri mihère ke hiku Abram he do kako rihi j'èu ri ko juu laa b'olou, tade d'ai la rai Mesiir. Ta pee ke roo hemelila pa nii. 11 Ta d'ai roo ta maho la rai Mesiir, ta lii ke noo pa ihi èmu noo, “Sarai. Èu d'ee do rihi bèni ie. 12 J'e ki nga ngède èu ri do Mesiir he ta do dai bèni ie mihed'e, b'ara tatu ke j'e yaa ta pemade ri roo, rowi yaa d'ee ihi èmu èu. Nga minahère, nara ta ègo èu ri roo. 13 Hiku do rihi ie ta peke ri èu pa roo ta do yaa d'ee ta namone ri èu. Nga minahère, pemade d'oke yaa ri roo, tapulara ta woie ke roo nga yaa hine rowi èu.”
14 Moko, ta d'ai Abram he la Mesiir, ta ngède ri dèu he ne wobèni napone do rihi bèni ie. 15 D'ai ta ngède noo ri pegawe duae Mesiir, ta waje ke ne bèni ie wobèni na ène pa hed'apa duae. D'ai ta èbe ke ri roo ne wobèni na ène la èmu duae. 16 Ta ie lii ke duae penaja nga Abram, rowi Sarai. Moko ta wie parahee ke b'ada ri duae tuu Abram, ie ta: ki'i hawu, ki'i j'awa, hapi, keledai, nga onta. J'e wie lema ri noo parahee ènu womone nga wobèni.
17 Tapulara ri do èla ke duae ta ègu ihi èmu dèu la d'ara èmu noo, hiku ta wole ke noo ri MURI nga ihi d'ara èmu noo he ri hekera'a ruwolo. 18 Ta pedoe ke Abram ri duae j'e keb'ale pa noo, “Abram! Èla petao minamii èu penaja nga yaa? Ta ngaa j'e èu ta d'o pika, ne wobèni do napone, ta do ihi èmu èu? 19 Tapulara ma peke ri èu, ta noo d'ee nawèni ri èu! Dae hudi kej'e ta ègo noo ri yaa ta ihi èmu yaa! Nad'ee ihi èmu èu. Èbe we noo, j'e kèd'i ngati hed'apa yaa!” 20 D'ai ta pereda ke ri duae ne pegawe noo he, ta hud'i pemèhu èni ke Abram, ihi èmu noo, nga hari-hari unu-oha roo ngati rae do napone.