3-4 Ta pelii ke roo, “Wo naa! Tuèhu-tuèhu ee! Mai ko dii maa pekèd'e he wue d'ara rai do worena. Tao dii wowadu mea, j'e tune ri dii tade adu, j'e ra'e ri dii ne wowadu mea he j'e pekepère ri tee. Èla pe napone, j'e petitu dii he wue menara do d'ida, ne huu ne do tade d'ai la liru, mij'e ie dii ta era nga ngara. J'e jad'i dii ta he wue rai do worena dod'o nara ta petala-pehèg'i.”

5 D'ai ta puru ke MURI laa hèko ta heleo ne rai nga menara do pekèd'e ri roo ne. 6 Ta lii ke Noo, “Harièle dèu rai-wawa do nahed'e, he èhi rai we, nga he èhi ne lii rai. Nengaa ne do tao rowi roo awe do nad'ee, he èhi lai petari. B'èri rai-nèli, ki heuj'u roo lii hari-hari jad'i ta èhi mii awe do nad'ee, nara roo ta tao nengaa we. 7 Rihi ie Dii ta puru laa pekenyawu-nyela ne lii pedai roo, mij'e dod'o petada roo lii he dèu nga he dèu.”

8 Moko ta puru ke Muri laa pekenyawu-nyela ne lii rai roo. Nga minahère, tao ri Noo dèu rai-wawa he pemenyèb'a la hari-hari kebih'u pa rai-wawa. Moko roo tuu d'oke ta pekèd'e ne rai nee. 9 Mihère ke ne pehune ngara rowi roo ne rai do napone ta, Babel, (do mègi ta hela'u nga lii ne ihi noo ‘do peb'ingu’), rowi MURI do pekenyawu ne lii pedai roo j'e wie pe menyèb'a roo la mii-mii pa rai-wawa.

10 Nad'ee ke kolo-loro Sem he. Ta èla pe d'ue b'ue tèu ne èi waa lale dahi, paa ta pemuri hengahu b'ue tèu Sem, nara ke noo he dèu ana womone, ne ngara ne Arpaksad. 11 Èla pe na ène, muri-mada ko ma noo helama lèmi ngahu b'ue tèu, nga nara riko ma noo ana womone nga ana wobèni.

12 Awe ta pemuri tèlu nguru lèmi b'ue tèu Arpaksad, nara noo he dèu ana womone, ne ngara ta Sela. 13 Èla pe na ène, Arpaksad do muri-mada ko èpa ngahu tèlu b'ue tèu, nga nara riko ma noo ana womone nga wobèni.

14 Awe Sela pa pemuri tèlu nguru b'ue tèu, nara noo he dèu ana womone, ne ngara ta Eber. 15 Èla pe na ène, Sela do muri-mada ko èpa ngahu tèlu b'ue tèu, nga nara riko noo ana womone nga wobèni.

16 Pa awe ta pemuri tèlu nguru èpa b'ue tèu Eber, ta nara ke noo he dèu ana womone ne ngara ta Pelek. 17 Èla pe na ène, Eber do muri-mada ko èpa ngahu tèlu nguru b'ue tèu, nga nara riko ma noo ana womone nga wobèni.

18 Pa awe ta pemuri tèlu nguru b'ue tèu Pelek, nara noo he dèu ana womone, ne ngara ta Rehu. 19 Èla pe na ène, Pelek do muri-mada ko d'ue ngahu heo b'ue tèu, nga nara riko noo ana womone nga wobèni.

20 Pa awe ta pemuri tèlu nguru d'ue b'ue tèu Rehu, nara noo he dèu ana womone, ne ngara ta Seruk. 21 Èla pe na ène, Rehu do muri-mada ko d'ue ngahu pidu b'ue tèu, nga nara riko noo ana womone nga wobèni.

22 Awe ta pemuri tèlu nguru b'ue tèu Seruk, nara noo he dèu ana womone, ne ngara ta Nahor. 23 Èla pe na ène, Seruk do muri-mada ko d'ue ngahu b'ue tèu, nga nara riko noo ana womone nga wobèni.

24 Pa awe ta pemuri d'ue nguru heo b'ue tèu Nahor, nara noo he dèu ana womone, ne ngara ta Tera. 25 Èla pe na ène, Nahor do muri-mada ko hengahu he nguru heo b'ue tèu, nga nara riko noo ana womone nga wobèni.

26 Pa awe ta pemuri pidu nguru rihi b'ue tèu Tera, ta nara ke noo do tèlu dèu ana womone, ne ngara ta Abram, Nahor, nga Haran.

27 Kolo-loro ri Tera he, minahed'e: ana ri Tera he, Abram, Nahor, nga Haran. Haran ngèdi ana he dèu ana womone ngara ta Lot. 28 Made Haran pa rai liha noo, ne ngara ta Ur, pa rai unu do Kasdim. Awe ta made noo, era ko do muri-mada ama noo Tera. 29 Ta banga èmu ke Abram nga Sarai. Nahor banga èmu nga ana wobèni ri Haran, ne ngara ta Milka. Ta nara ke Haran ana womone, ne ngara ta Yiska. 30 Tapulara Sarai do kebaki, nara d'o ta ngèdi ana.

31 He wari, ta èbe ke ri Tera ne ana noo Abram, nga ihi èmu noo Sarai, nga èpu noo Lot, j'e kako roo mèhu èni hane rae Ur. Awe na ène, d'èi roo ta kako laa rai Kana'an. Tapulara ta d'ai la rai Haran, ta pee he ke roo pa nène. 32 Pa ène ke ne era made Tera pa awe pemuri noo ta d'ue ngahu lèmi b'ue tèu.