Noh nga kolo-loro ri Yafet
10
Ta èla pe èi waa lale dahi, ta nara kolo-loro ke ana rowi Noh he. Nad'ee ke ne kolo-loro ngati Sem, Yafet, nga Ham.2-5 Kolo-loro Yafet he, era Gomer, Magog, Madai, Yawan, Tubal, Mesek, nga Tiras. Miha-miha nga lii rai roo, udu roo, nga worai roo miha.
Kolo-loro ri Gomer era Askenas, Rifat nga Togarma.
Kolo-loro ri Yawan, Elisa, Tarsis, dèu do Kitim he, nga Dodanima do pee pa ngidi dahi.
Kolo-loro ri Ham
6 Kolo-loro Ham he, Kus, Misraim, Put, nga Kana'an.b
7 Kolo-loro Kus he, Seba, Hawila, Sabta, Raema nga Sabteka.
Kolo-loro unu Raema, Syeba nga Dedan.
8 Ana womone ri Kus ngara ta Nimrod. Noo nee, kètu muhu petari rai do d'ai jago. 9 Ne jago noo do dèka ngati MURI, tade jad'i noo ta mone pehob'o b'ada do rihi i'a. Hiku tuu ta era lii perèja dèu, “Ie èu ta jad'i mone pehob'o b'ada do i'a hela'u mii Nimrod, j'e ne i'a noo do nara ngati MURI.” 10 Uru j'ara ne rai noo j'ari ngati Babel, Erek Akad, nga Kalne. Harièle roo do era pa Sinear.c 11 Ngati ène, juu ne pereda ri noo Asyur. Èla pe na ène, pekèd'e ri noo d'ara rae Niniwe, Rehobot-Ir, Kala, 12 nga Resen, do era pa Niniwe nga pa telora rae Kala. Harièle do napone, rai do worena.
13 Kolo-loro ri Misraim he, dèu do Ludim, Anamim, Lehabim, Naftuhim, 14 Patrusim, Kasluhim, nga Kaftorim. Do Kasluhim he, ama-èpu ri dèu do Filistin.
15 Ana mone a'a unu Kana'an ne Sidon. Kana'an le do jad'i ta ama-èpu ngati dèu do Het he, 16 Yebusi, Amori, Girgasi, 17 Hiwi, Arki, Sini, 18 Arwadi, Semari, nga Hamati he. Kolo-loro ri Kana'an he do menyèb'a d'ai j'èu
19 tade wata worai unu roo j'ari rai ti Sidon lohe la Gerar, tade d'ai la Gasa. Ngati na ène ju laa Sodom, Gomora, Adma, nga Seboim, tade d'ai la Lasa.
20 Harièle roo do napuhère, kolo-loro ri Ham. Miha-miha nga lii rai roo, udu roo, nga rai roo miha.
Kolo-loro ri Sem
21 Sem a'a ri Yafet, jad'i ta ama-èpu ri do Eber he.d
22 Kolo-loro ri Sem he, Elam, Asyur, Arpaksad, Lud, nga Aram.
23 Kolo-loro ri Aram he, dèu do Us, Hul, Geter nga Mas he.e
24 Ana ri Arpaksad, Sela. Ana ri Sela, Eber.
25 Eber nara do d'ue dèu ana womone. Do mone a'a, pehune ne ngara ta ne Pelek (do ne ihi noo ta ‘peb'agi’), rowi awe do napone, ne dèu nahed'e do peb'agi pemenyèla pa rai-wawa. Ne ari ri noo ne ngara ta Yoktan.
26 Kolo-loro ri Yoktan he, Almodad, Selef, Hasar-Mawet, Yera, 27 Hadoram, Usal, Dikla, 28 Obal, Abimael, Syeba, 29 Ofir, Hawila, nga Yobab. Harièle roo do nahed'ee, kolo-loro ri Yoktan.
30 Ne era pee roo he, j'ari rai ti Mesa, lohe d'ai la Sefar, he èhi era do lede-b'ojo pa heb'èka bara dimu.
31 Harièle roo he, kolo-loro ri Sem. Miha-miha nga lii rai roo, nga udu roo, nga rai roo miha.
32 Harièle do napone, kolo-loro unu Noh, miha-miha nga udu roo. Ta èla pe èi waa lale dahi, roo ke hed'e do pemenyèb'a ta petobe rai-wawa.