Deo Muri pedara nga Noh
9
Ta wie mèngi ke Noh nga ana noo he ri Deo Muri, nga pali, “B'èb'a kehanga we muu d'ai ae, mij'e petobe riko ne rai-wawa d'ee. 2 D'ai hine hari-hari b'ada èdu, dolila nga nadu'u he do meda'u ri muu. Do j'èma ri muu ta ato roo. 3 Ie ma ri muu ta nga'a ne hed'ai b'ada nahii hari-hari, hela'u lema mita nga'a ne nga'a hab'a he. Harièle do nahed'e, ta wie pa muu ri Yaa.4 Tapulara ie d'o ri muu ta nga'a hed'ai do era nga raa ne ko, rowi ne hengaa b'ada ne do era pa raa nee. 5-6 Tao ri Yaa dèu rai-wawa pedutu hia nga wewo Yaa. Rowi do minahère, ie d'o ta pemade dèu rai-wawa. Ki nga era dèu ki ad'o b'ada, do pemade dèu, do j'èma ta pemade lema roo. Nad'ee lii pereda do dèka ti Yaa. 7 Do j'èma muu ta b'èb'a kehanga pelowe, ta petobe wari rai-wawa d'ee.”
8 Ta petue rike ri Deo Muri ne lii pedai Noo, 9 “Awe nad'ee d'èi Yaa ta pedara nga muu, lohe la kolo-loro muu. 10 Lii pedara do nad'ee do lèka lema pa hari-hari do muri-mada, ie ta b'ada peluja, b'ada èdu, nga dolila he. Hiku ne do too, hari-hari ne do mèhu èni hela'u-la'u nga muu ngati d'ara kapa nee. 11 Ne lii pedara Yaa do na ène, minahed'e: Moe d'oke ri Yaa èi waa lale dahi rii, ta pemade hari-hari do muri-mada, nga ta pemae teb'o tèi ne rai-wawa d'ee.
12-13 Tèke ri Yaa ne heroo Yaa pa liru ta jad'i telia do ta pehengee ne lii pedara Yaa dod'o pehèpo nga muu, nga hari-hari do muri-mada, lema nga rai-wawa d'ee. 14-17 Ki era merèmu pa liru, moko ta era ne heroo, noo hine do ta pehengee Yaa pa lii pedara: ad'o ke èi waa ne ta pemae teb'o tèi harièle do muri-mada. Nga minahère, ne lii pedara Yaa ad'o do ta ele, do petèke ke nga muu, nga hari-hari do muri namada.”
Noh do mawo
18 Ana ri Noh he do mèhu èni ngati d'ara kapa ne, Sem, Yafet, nga Ham. (Ham ne, ama ri Kana'an). 19 Kolo-loro hari-hari dèu pa rai-wawa d'ee dèka ngati do tèlu dèu ana Noh he.
20 Noh d'ee, mone hab'a d'oka. Noo ke do petari rai ne tao d'oka ago. 21 Pa d'ara he wari, ta nginu ke noo ne èi ago ne tade mawo apa. D'ai ta ma'e ke ri noo ne b'ara pa wue noo, j'e b'èj'i noo manga kula pa d'ara leo noo. 22 D'ai ne ngède ri Ham ne ama noo ta do ihi wue, ta perai ke noo mèhu èni, j'e laa pika pa a'a noo Sem nga Yafet. 23 Ta èbe ke ri roo d'ue heb'èla hig'i, j'e lèg'e perète pa kolo gunu roo. Èla minahère, ta kako ke roo ware kej'unga maho la d'ara leo ne, j'e herimo ne ama roo. Nga mihère, ngède d'o ri roo ne ama roo ta do manga kula. D'ai ta mèhu èni ke roo.
24 D'ai ta ie ne mawo Noh, ta toi ke ri noo ne do tao ri ana noo mone ari ne. 25 Ta lii ke noo, “Heh! Ama ri Kana'an! Wie èu ri Yaa lii mengao! Èu hine do ta jad'i na ènu pa a'a èu he!
26 Kolo lii ie-ae tuu MURI! Mij'e wie ri Noo mèngi tuu Sem!
Tapulara j'ane we Kana'an ta dèu kako kèd'i pa Sem.
27 Hane ta wie ri Deo Muri petaba bèla rai unu Yafet:
J'e ne kolo-loro noo do muri-mada penau-penad'e nga kolo-loro Sem.
Tapulara j'ane Kana'an ta mone kako kèd'i unu Yafet.”