J'ari ke worai ta kemangu
8
Tapulara bèlo d'o ri Deo Muri Noh he nga harièle b'ada do pa kapa nee. Moko ta wie ke ri Noo ngèlu ta peti'u mita puru ne èi waa nee. 2 Henèb'e ri Noo harièle mada wètu pa rai-wawa, nga pengahe ne èj'i ngati liru. 3 Moko ta pegalu ke ne èi ne teruu. Èla pe hengahu lèmi nguru lod'o, rihi d'oke ne d'ida èi nee. 4 Pa ta wèru pidu rihi henguru pidu lod'o, ta pejèd'e ke ne kapa nee pa he wue lede do d'ida, ne ngara nee Ararat. 5 Puru teruu ne èi ne tade lod'o petari wèru henguru, j'ari ke ta ngède ne kolo lede-kolo b'ojo he. 6 Rihi èpa nguru lod'o, ta boka ke ri Noh he èhi ne ub'a j'enela kapa ne. 7 D'ai ta gole ke ri noo he ngi'u ne dolila gaga. Ne dolila nène ta lila teruu ke noo b'ula-b'ale tade mèti tèra ne èi waa nee. B'ale wari d'o ke noo laa kapa. 8 D'ai ta gole rike rii Noh he ngi'u koro j'awa, ta kale toi ta do mèti tèra ke ne èi nee we ad'o. 9 Tapulara ri do herimo ko hari-hari ne rai-wawa ri èi, ri mihère ke nara d'o era koro j'awa ne ta kèji. Hiku ta b'ale ke noo laa kapa. Ta j'ula ai ke Noh ta hème ne koro ne pemaho la d'ara kapa.
10 Mate ri Noh pidu lod'o wari, j'e gole wari ri noo ne koro j'awa ne. 11 Ta mèd'a ne lod'o, ta dèka wari ke ne koro ne la nga Noh, nga ègu ri noo he helai rèu saitun do itu ta pèko ri noo. Moko ta toi tèra ke ri Noh ta do puru tèra ke ne èi. 12 Mate wari ri noo pidu lod'o j'e gole kej'ari ri noo koro j'awa nee. Ta do he rahi nad'ee, b'ale d'oke ne koro j'awa nee.
13 Pa awe ta pemuri èna ngahu he wue tèu Noh, lèka pa lod'o petari wèru èhi, do mèti tèra-tèra ke ne èi. Ta boka ke ri Noh ne j'enela kapa ne, j'e heleo ri noo pekewero, do kemangu ke rai kololede. 14 Tade wèru d'ue, lod'o d'ue nguru pidu, do kemangu tèra-tèra ke worai pa kololede.
15 D'ai ta lii ke Deo Muri pa Noh, 16 “Noh ee! Puru we muu hari-hari ti d'ara kapa d'ee. 17 Pemèhu hari-hari ne b'ada he! Ne b'ada peluja, b'ada èdu, b'ada do rod'o ri kabu, nga dolila he. Hani roo hari-hari ta peb'èb'a, j'e petobe ne rai-wawa do nad'ee.”
18-19 Èla pe nène Noh nga ihi èmu noo, ana noo he, nga ana matu noo he hari èle mèhu èni ke ti d'ara kapa nee. Mèhu èni leke ne b'ada he hari-hari, miha-miha nga kejie noo.
Noh wie b'ara tunu menahu tuu Muri
20 Moko Noh ta peb'aja wowadu ke ta tao meja ta wie tunu menahu tuu MURI. Ngati hari-hari b'ada do ie ta tao b'ara j'ula he, èbe ri Noh he ngi'u-ngi'u. D'ai ta lore ke ri noo j'e tunu roo pa d'ida meja nee, ta b'ara tunu menahu tuu MURI. 21 D'ai ta hengue ri MURI ne wèu mèngi b'ara tunu menahu nee, ta mengèlu ke ne d'ara Noo. Moko ta pengee ke ri Noo,
“J'ari rai ti awe nad'ee, mengao d'oke ri Yaa ne rai-wawa do nad'ee rowi woapa had'a dèu rai-wawa. Maji le roo ta toi lai do woapa hewe rai ti naiki, tapulara tao d'oke ri Yaa pemae teb'o tèi harièle ne do muri-mada, mii do èla petao ri Yaa ne. 22 Helama nga era ko rai-wawa do nad'ee, awe do kako mii patima, pedutu nga do peato. Era awe kuj'a nga awe g'ètu, awe meringi rai nga awe pana, awe wèru wadu nga awe èj'i lai, èni lod'o nga mèd'a.”