Èi waa lale dahi
7
Èla minahère, ta lii ke MURI pa Noh, “Heleo ri Yaa la mii-mii, tapulara wata èu we do mola ngee-mola d'ara. Rowi do minahère, maho we èu nga ana-oha èu he laa d'ara kapa ne. 2-3 Ngati hari-hari worèwu b'ada do ie ri muu ta nga'a, nga do ie ta b'ara j'ula tuu Yaa, ègu ri èu pidu-pidu mawo laa d'ara kapa ne. Ngati hari-hari worèwu dolila lema ne èbe pidu-pidu mawo. Tapulara ngati b'ada do had'e he, wata ke èbe hemawo-hemawo hewe. Nga mihère, ne b'ada nga dolila he nara ta b'èb'a, j'e era loro roo.4 Hengee pe'ie-ie, oo! Dae pidu lod'o ke, do ta pepure ke ri Yaa ne èj'i ae dod'o pengaha tade èpa nguru lod'o èpa nguru rèmi. Nga mihère, ta pemade ri Yaa harièle do muri-mada pa kololede do èla ta tao ri Yaa he.”
5 Ta tao ke ri Noh pedutu nga hari-hari do pereda ri MURI. 6 Awe ta dèka ne èi waa ne, pemuri Noh èna ngahu b'ue tèu. 7 Moko Noh nga ihi èmu noo, nga ana noo he, nga ana matu noo he, maho laa d'ara kapa ne, mij'e helama ngati èi waa lale dahi ne. 8-9 Pedutu nga lii pereda MURI ne, ta èba ke ri Noh maho laa d'ara kapa hari-hari worèwu, dolila nga b'ada do hewala he, èhi-èhi nga nataki noo, ie ngati do ie ta nga'a ri dèu, lema nga dod'o ie ta nga'a ri dèu. 10 D'ai ta pidu lod'o, ta d'ute ke ne èi waa j'e jari ta herimo rai-wawa nee.
11 D'ai pa awe pemuri Noh ta èna ngahu b'ue tèu, rihi d'ue wèru nga he nguru pidu lod'o, ne dèka ne èi waa ne! Awe do napone, mii do boka èni ne kelae liru, j'e hegèb'e puru ne èi nee. J'e hari-hari mada wètu do pa d'a'i worai he, ta mehèka ke j'e pehebèdo èi la tele. 12 D'ai ne èj'i ne puru nga d'o pengaha mèd'a nga èni lod'o, tade èpa nguru lod'o.
13 Tapulara lod'o do napone, Noh, ihi èmu noo, hari do tèlu ne ana noo Sem, Yafet, nga Ham nga ana matu noo he harièle maho laa d'ara kapa. 14 Maho roo hela'u-la'u nga b'ada he, ie ta b'ada peluja, b'ada èdu, b'ada do rod'o ri kabu, dolila-dolila, nga b'ada do hewala do nga ruèla he. 15-16 Hemawo-hemawo ngati hari-hari do muri-mada maho laa d'ara kapa hela'u-la'u nga Noh, he minamii do pereda ri Deo Muri pa noo.
D'ai ta èla roo pemaho hari èle, ta helote ke ri MURI ne kelae kapa ne.
17-19 Èj'i ae do puru loro tade èpa nguru lod'o, j'e ne èi waa ne juu ta ha'e we tade leb'u ne kapa nee. Juu ta ha'e we ne èi ne tade herimu ne lede-b'ojo do d'ida. 20 Ne èi ne ha'e nga dod'o pengahe, tade pidu mete ne d'ida noo ngati kolo lede.