Woapa dèu rai-wawa
6
Awe nène, juu ta ae we dèu rai-wawa. D'ai do muri-mada menyèla kebali ke roo pa rai-wawa do nad'ee. Era lema roo nga ana-ana wobèni. 2 Ne ana womone ri Muri hea ta ngèdi ke ne ana wobèni ri dèu rai-wawa he ta do bèni ie-bèni nged'e. Ta laa banga èmu ke roo nga wobèni-wobèni do d'èi ri roo. 3 Ta lii ke MURI, “B'enya ke j'e Yaa nga wuiai dèu rai-wawa do kenyawu-nyela. Ne Hengaa Yaa ne do Pemuri roo he, wae d'oke ta pepee roo ta muri teruu.b Do j'èma roo ta made. Hiku muri roo hape la hengahu d'ue nguru b'ue tèu hewe hine.”4 Awe nène, nga awe do pelere he, do era ke dèu raksasa he pa rai-wawa.c Awe ta banga èmu ana womone ri Muri he nga ana wobèni ri dèu rai-wawa he, ta era nga ana ke roo dèu do rui do kedii he, mii kètu-kètu pemuhu, do era pa lii ped'iri rai uru he.
5 Awe do napone, heleo ri MURI do rihi keliwa tèra ke ne woapa had'a dèu rai-wawa. Ne do era pa d'ara roo titu-wata ke ta pengee lai do apa we. 6 Ta menyaha ke MURI ri èla ta tao roo ta pepee pa rai-wawa d'ee. Tao pepèd'a ade pengee Noo we. 7 Ri mihère ke hiku ta lii ke Noo, “Nga mihère, do ta pemae teb'o tèi ri Yaa dèu rai-wawa hine, do èla petao ri Yaa pa rai-wawa d'ee. Dolila-dolila nga b'ada do had'e he, do ta pemae lema ri Yaa hari-hari. Rowi d'ai menyaha Yaa ne èla pe tao roo.” 8 Tapulara titu-wata ta Noh we, do pemengèlu ne d'ara MURI.
Lii ped'iri j'ara lua Noh
9-10 Minahed'e ne lii ped'iri j'ara lua Noh: Ana womone ri noo do tèlu dèu, Sem, Yafet nga Ham. Muri-namada Noh d'ee do nga mola-mira dod'o tao lai do woapa. Awe na ène tituwata noo we ne do ie. Noo d'ee do muri-mada pe'umu nga Deo Muri.
11-12 Tapulara heleo ri Deo Muri ta do harièle dèu do had'e he do tao apa-kerewe. Pa mii-mii we, ne ruj'ara muri-namada roo do kenyawu-nyela we. Heleo ri Deo Muri ne dèu pa rai-wawa ne, wata ke tatao apa we. 13 Moko ta lii ke Deo Muri pa Noh, “Pa mii-mii, ne do ngède ri Yaa wata apa ked'aha j'èga deu rai-wawa we. Hiku èla ke ri Yaa pehèpo, do ta pemae teb'o tèi pe'èle ri Yaa rai-wawa d'ee nga harièle ihi pa d'ara noo. 14 Hiku minahed'e, Noh! Awe do nad'ee tao ri èu he wue ne kapa do worena ngati aj'u do rui. Pa d'ara kapa do napone, tao ri èu nga kama-kama. J'e d'ame ne kapa ne ri tee mij'e dod'o maho ri èi. 15 Kapa na ène, tao ri èu ne medera ne hengahu tèlu nguru tèlu mete; ne bèla noo d'ue nguru d'ue mete, nga d'ida noo henguru tèlu mete. 16 Pahe ri rèu pelila ne kapa ne. Tapulara perihe ri èu era hetenga mete he ngati d'ida ngidi kapa ne. Peb'age ri èu ne kapa nee petèlu b'aja. J'e tao he wue ne ub'a kelae ne pa keraha kapa nee.
17 Henge pe'ie-ie! Do ta pepure ri Yaa èi waa lale dahi ta pemade hari-hari do muri-mada pa rai-wawa d'ee, tade ta dod'o era le he èhi he ne do hiha. 18 Tapulara d'èi ta pedara Yaa nga èu. D'ai maho èu hine laa d'ara kapa ne nga ihi èmu èu, nga ana èu, lema nga ana matu èu he.
19-20 Ngati hari-hari b'ada he, ègu j'e ri èu hemawo-hemawo, j'e pemaho laa d'ara kapa ne, mij'e ie roo ta muri-mada hela'u-la'u nga èu. Mii b'ada peluja, dolila-dolila, nga b'ada do rod'o ri kabu he, mij'e ie roo harièle ta muri-mada. 21 Do j'èma ri èu ta èba maho laa d'ara kapa ne harièle worèwu b'ara nga'a tuu muu, nga ta wie ne b'ada he.”
22 D'ai ta tao ke ri Noh pedutu nga hari-hari do pereda ri Deo Muri.