1-2 Pa awe Deo ta tao dèu rai-wawa, tao ri Noo ne petonga roo hela'u nga hia wewo Noo. Tao ri Noo roo, womone nga wobèni. D'ai ta pehune ke ri Noo roo ta, “dèu rai-wawa”, j'e wie ri Noo ne mèngi tuu roo.

3 Awe pa pemuri he ngahu tèlu nguru b'ue tèu Adam, ta nara ke noo he dèu ana womone, ne petonga noo hela'u we nga ama ne. D'ai ta pehune ngara ke ri noo ana do napone ta Set. 4 Èla minahère, muri-mada ko Adam aru ngahu b'ue tèu, j'e nara riko noo ana womone nga wobèni. 5 Made noo pa pemuri noo heo ngahu tèlu nguru b'ue tèu ke.

6 D'ai pa awe Set ta pemuri he ngahu lèmi b'ue tèu, ta nara he dèu ana womone ke noo ngara ta Enos. 7 D'ai do muri-mada ko Set tade aru ngahu pidu b'ue tèu, j'e nara riko noo ana womone nga wobèni. 8 Made noo pa awe pemuri heo ngahu he nguru d'ue b'ue tèu ke.

9 Awe ta pemuri heo nguru b'ue tèu Enos, nara noo he dèu ana womone, ngara noo Kenan. 10 Èla ta minahère, do muri-mada ko Enos aru ngahu henguru lèmi b'ue tèu, nga nara riko noo ana womone nga wobèni. 11 Made noo pa pemuri heo ngahu lèmi b'ue tèu ke.

12 Awe Kenan pemuri pidu nguru b'ue tèu, nara noo he dèu ana womone, ngara noo Mahalalel. 13 Èla pe na ène, Kenan do muri-mada ko aru ngahu èpa nguru b'ue tèu, nga nara riko noo ana womone nga wobèni. 14 Made noo pa pemuri heo ngahu henguru b'ue tèu ke.

15 Awe pa pemuri èna nguru lèmi b'ue tèu Mahalalel, nara noo he dèu ana womone, ngara ta Yared. 16 Èla pe na ène, Mahalalel do muri-mada ko aru ngahu tèlu nguru b'ue tèu, nga nara riko noo ana womone nga wobèni. 17 Made noo awe pa pemuri aru ngahu heo nguru lèmi b'ue tèu ke.

18 Awe pa pemuri hengahu èna nguru d'ue b'ue tèu Yared, nara noo he dèu ana womone, ngara noo Henok. 19 Èla pe na ène, Yared do muri-mada ko aru ngahu b'ue tèu, nga nara riko noo ana womone nga wobèni. 20 Made noo pa pemuri heo ngahu èna nguru d'ue b'ue tèu ke.

21 Awe Henok pemuri èna nguru lèmi b'ue tèu, nara ke noo he dèu ana womone, ngara noo Metusalak. 22 Èla pe na ène, Henok muri-mada nga he wue ade pa Deo Muri tade tèlu ngahu b'ue tèu wari, j'e nara riko noo ana womone nga wobèni. 23-24 Muri-mada noo titu nga he wue ade pa Deo Muri. D'ai pa awe pemuri noo ta tèlu ngahu èna nguru lèmi b'ue tèu, ta ele heke noo, rowi do èla pe d'ede pe ha'e noo ri Deo Muri.

25 Awe pa pemuri hengahu aru nguru pidu b'ue tèu Metusalak, nara ke noo he dèu ana womone, ngara noo Lamek. 26 Èla pe na ène, Metusalak do muri-mada ko pidu ngahu aru nguru d'ue b'ue tèu, nga nara riko noo ana womone nga wobèni. 27 Made noo awe pa pemuri heo ngahu èna nguru heo b'ue tèu ke.

28 Awe pa pemuri hengahu aru nguru d'ue b'ue tèu Lamek, nara noo he dèu ana womone. 29 Ta pehune ngara ke ri Lamek ne ana do napone ta, Noh (do mègi ta hela'u nga èhi lii, ne ihi noo ta wie ‘hale d'ara’), rowi ane noo, “Ne ana do nad'ee hine do ta wie hale d'ara, pemengèlu ne d'ara dii ngati j'èga la'a rui pa worai do èla pelèka ta mengao ri Deo Muri d'ee.” 30 Èla mihère, Lamek do muri-mada ko lèmi ngahu heo nguru lèmi b'ue tèu, nga nara ri ko noo ana womone nga wobèni. 31 Made noo pa pemuri noo ta pidu ngahu pidu nguru pidu b'ue tèu.