Dèu rai-wawa wae d'o ta ped'èno nga lii Deo Muri
3
Ngati hari-hari b'ada pa rai-wawa do tao rowi Muri, dob'oho ke ne do rihi i'a pote èpi. Pa d'ara he wari, era ke dob'oho do keb'ali pa wobèni ne, “Tèra wod'o? Do era ne pewata ri Deo ta, ‘Ie d'o muu ta nga'a ne wue ngati na aj'u-na aj'u do era pa d'oka nad'ee, wod'o?’” 2-3 Ta b'ale ke ri wobèni ne, “Ad'o! Ie ma j'ii ta nga'a! Tapulara do era he kepue na'aj'u pa telora d'oka d'ee, do lara ri Deo, ta dod'o ie ri j'ii ta nga'e. Lii Noo ie d'o j'ii ta nga'a, lema ie d'o ta b'uje ne wue noo, rowi do ta made j'ii hine.”
4 Tapulara ta b'ale ke ri dob'oho ne, “Ad'o do petuu napone! Made d'o muu! 5 Ne pewata ri Deo minahère, rowi do toi ri Noo kiri nga'e ri muu ne woaj'u ne, do ta mèu d'ara muu hela'u nga Noo. J'e toi nengaa do ie, lema nengaa do woapa.”
6 D'ai, ta ngède ri wobèni ne ta do d'ai gaga ne na'aj'u do napone, j'e ne wue noo mii do d'ai ena he. Ta pengee ke ri noo, “Kiri nga'e ri yaa ne woaj'u do nad'ee, tatu ke yaa ta mèu d'ara.” Dai ta pue ke ri noo ne woaj'u ne, j'e nga'e ri noo. Moko ta èbe ke ri noo laa wie ihi èmu noo, d'ai ta nga'a he lema ke ne ihi èmu noo. 7 Ta èla pe nga'a, itu toi ke rowi roo, ta do manga kula roo d'ue. Moko ta kètu rèu aj'u ke roo ta henèb'i ne mekae roo.
8 Ta mèd'a lod'o, ta rènge ke ri roo MURI era do kako pa d'oka do napone. D'ai ta laa pehuni èni ke roo pa kej'unga na'aj'u, mita dod'o ngèdi roo ri MURI. 9 Tapulara ta pedoe ke ne womone ne ri MURI, “Wo, Adam! Nèi pa mii ke èu?”
10 Ta b'ale ke ri womone do napone, “Rènge ma ri yaa ne lii pedoa Muri pa d'ee. Tapulara ta mekae d'ara yaa, rowi nee do ihi wue yaa. Hiku perai yaa maa pewuni èni.”
11 Ta lii ke Muri, “Naduu ke do pika pa èu ta do manga kula èu? Minamii? Èla ke j'e ri èu hino ta nga'e ne wo aj'u do pewata ri yaa ne, wod'o?”
12 Ta b'ale ke ri noo, “Wobèni do wie ri Muri ta peihianga nga yaa nad'ee, noo do wie ne woaj'u ne hiku nga'e ri yaa!”
13 Moko ta lii lema MURI pa wobèni ne, “Ta ngaa ke hiku tao èu minahère?”
Moko ta b'ale ke ri wobèni nee, “Ta pelue ri dob'oho ne yaa! Hiku tuu ta nga'e ri yaa ne woaj'u nène.”
Mengao roo ri Deo Muri
14 Èla minahère, ta mengao ke ri MURI ne dob'oho ne,
“Rowi wuiai èu, wole èu ri Yaa. Ngati telora hari-hari b'ada, tituwata èu miha do lèka ri lii mengao do nad'ee. J'ari awe do nad'ee tade made èu, do ta rod'o ri kabu heke èu, j'e nga'a èu pa worai we. 15 Do tao ri Yaa ta petaki muhu loro èu nga wobèni do nad'ee. J'e ne kolo-loro muu d'ue he, minahère lema. Kolo-loro èu hine do ta hib'e ne wodèto dèu. Tapulara he dèu ngati kolo-loro noo hine do ta rèje pemae ne kètu èu.”
16 Èla minahère, ta peke ke ri Deo Muri pa wobèni nène,
“Do ta petabe ri Yaa ne hedui pa awe ta melole èu hine, j'e taba ne noho pa awe ta metana ana èu. Maji lema ta minahère, tapulara do ta dub'u loro ne lua d'èi èu nga ihi èmu èu. Lema noo do pemane èu.”
17 D'ai ta peke leke ri Muri pa womone napone,
“Pedute d'o ri èu ne lii tèka Yaa, tapulara ped'ute ne lua d'èi ihi èmu èu, tade nga'e ri èu ne woaj'u do pewata ri Yaa ne. Hiku èu lema do lèka ri ruwolo. Lema worai do lèka ri ruwolo. J'ari rai ti lod'o do nad'ee tade made èu, do j'èma èu ta j'èga la'a rui hab'a ko'o rai, j'e nara èu ta nga'a. Nga j'èga minahère, j'e'itu nara èu muri-mada. 18 Ta hab'a lema èu heworèwu-heworèwu na'aj'u, tapulara ne do hèu ngati worai nène na'aj'u do dudu he we. 19 D'ai do j'èma èu ta j'èga la'a rui, j'e'itu nara èu nga'a ti worai ne. Do j'èma ta j'èga tade huti ne èi kebèhu minahère èu tade made. Tao èu ri Yaa ngati worai. Hiku kiri d'ai èu ta made, do ta b'ale wari èu ta worai.”
20 Èla minahère, ta pehune ngara ke ri Adam ihi èmu noo ta, ‘Hawa’ (Ne ihi noo do napone, ‘do muri-mada’), Rowi noo d'ee, ina ri hari-hari dèu do muri-mada.a
21 D'ai ta tao ke MURI b'ara pake ngati kuri b'ada, j'e wie roo d'ue ta pake.
Hud'i pemèhu èni Adam nga Hawa ri Deo Muri
22 D'ai ta lii ke MURI, “Awe nad'ee toi ke ri dèu he namii do woie, nga namii do woapa, hela'u mii Dii. B'ole d'ai ri roo ta nga'e ne wue aj'u ngati aj'u do wie muri-mada do peloro ne.” 23 D'ai ta hud'i pemèhu ke roo ri Noo ngati d'ara d'oka pa Eden, mij'e kako roo laa era do wala, j'e muri-mada nga hab'a ko'o rai, mita muri-mada ngati nga'a hab'a roo. 24 Ta èla pe hud'i minahère, ta lii ke Muri pa dèu pejuu Noo do nga ru'èla ngati sorga,b laa jage ne d'oka do napone ti heb'èka bara dimu. Roo do nga èmi hemala do kewio la mii-mii, nga weo kelala mii ai he. Lii Muri ta henèb'e ne ruj'ara maho, rowi wae d'o Noo ta era dèu do laa pue ne wue aj'u do ta wie roo muri-mada do peloro nee.