Yohanis nita lalai ma dae-ina' bebeu'
21
Boe ma au ita lalai bebeu' ma dae-ina' bebeu', huu fo lalai paraa' ma dae-ina' paraa' a mopo si so. Tasi' a boe ne'es ana so.a 2 Ma au ita Manetualain kota malalao-malalafu Na, ri' Yerusalem Bebeu' onda neme nusatetu-ikutema' a mai. Kota ria mana sadia' sama leo' baroit ina' a sipo' sao na.b 3 Au amanene haraoe bau-ina' esa neme kadera mana pareta ria nae,“Mete matalolole!
Mulai neme besa' ia, Manetualain Uma Na nai lahenda dae-bafo' a talada.
Mulai fai' ia, Manetualain leo-la'o sama-sama no Ria lahenda Nara.
Huu fo Ana dadi sira Manetualain na.
Ma sira dadi Ria ana Nara.
Neu' ko Ana no si la'o naroo.
Ma Ana sama-sama no si losa doo na neu.c
4 Neu' ko Ana hari namada luu nara,
de ara ta dola-ramatani.
Nana huu nai naa ta hapu hedi-raus.
Ma nai naa ta hapu mamates.
Basa mana tao susa neme fai a ulu na mai a, ta'a so'.
Basa mana tao doidoso neme fai a ulu na mai a, sapu-lalo so.”d
5 Boe ma Ria fo ri' natuu' nai kadera mana pareta ria dedea nae, “Mete matalolole, huu fo Au tao a basa-basan dadi bebeu' so.” Ana dedea no au bali nae, “Dui' leo! Basa lahenda ra bisa ramahere Au Hara-dasi Ki, huu fo basa ia ra, mema' tebe!”
6 Ana nafada au bali nae,
“Basa-basan fo ri' Au helu neme fai a ulu na dadi so.
Huu fo Au,
Alfa losa Omega.
Ma Au,
A losa Z.
Basa-basan reme Au mai,
mulai neme masososa na losa babasan.
Basa lahenda mana mamada-metihedu',
neu' ko Au fee si rinu pardeo,
neme oe mata' fo neni masoda', ela lahenda rasoda roo-tetu'.e
7 Basa lahenda fo ri' tuka rahere Au losa' mate,
neu' ko ara sipo basa ua-nale'.
Neu' ko Au dadi sira Manetualain na,
ma sira dadi Au ana Kara.f
8 Tehuu neu' ko lahenda ruma nana tu'u,
leo tasi ai-pila' balerang mana basa taa' a dale' reu.
Leo-leo' lahenda mana bii-mamata'u,
lahenda fo hiru rasadea Yesus,
lahenda makekeo-makakanu',
lahenda mana hohoke,
kanisa lahenda',
manasoko-manataku,
manaa tei',
ma mapuputa' ara.
Neu' ko tu'u sira basa leo tasi ai-pila' dale' reu,
fo ri' lahenda rae, ‘mamana mamates kadua.’”
Yohanis nita kota Yerusalem bebeu'
9 Boe ma au ita esa neme eila'o-limalope kahitu' mana homu bokor fo ri' henu' no Manetualain nasa-boliin. Ana leo au mai ma dedea nae, “Mai' ia dei! Huu fo au saka' fee o mita baroit ina', fo ri' Bibi-lopo Ana' a sao na.”
10 Manetualain Dula-dale Na onda neu' au, boe ma eila'o-limalope esa nai nusatetu-ikutema' a noo au leo lete madema ina esa uu. Nai naa ana natudu au kota Yerusalem, Manetualain kota malalao-malalafu Na onda neme nusatetu-ikutema' a mai.g 11 Kota ria malole na seli! Makaledo' a nahaa sama leo' batu intan makadila' kalua neme Manetualain marela-masa'a Na mai. Losa' kota ria katema' ana makaleledon. 12 Tembok bau-ina madema esa rule kota ria, ma nanuu lelesu bafa' sanahulu dua. Eila'o-limalope sanahulu dua rai nusatetu-ikutema' a ranea lelesu sira. Nai lelesu bafa' sira sanahulu dua, mana dui' leo Israel kasanahulu dua' ara naden.h 13 Lelesu bafa' telu rasare dulu', telu rasare muri', telu rasare ii' ma telu bali rasare ona'.i 14 Tembok ria rapadei' ana nai batu buku' bau-ina' sanahulu dua lain. Nai batu sira esa-esa mana dui' nade' neme Bibi-lopo Ana' a lahenda nadedenu kasanahulu duan fo ri' ralalau' Ana nai dae-bafo'.
15 Eila'o-limalope fo ri' dedea no au, ana homu tete'e uuku' lilo pilas esa, fo saka' uku kota ria lelesu bafa nara ma tembok na.j 16 Ana uku naulu' kota ria tembok na fo ri' bukun haa. Nanaru na, loloa na ma dedema na basan sama, ri' kilo rifun dua natun dua dua hulu.k 17 Boe ma ana uku tembok ria aate na, meter nee hulu lima, tuka lahenda dae-bafo' a uuku na.l 18 Ara tao tembok ria neme batu makadila', nade yaspis. Ma basa-basan fo rai kota ria dale', ara tao neme lilo pilas isi' makarela sama leo' kaca.
19 Batu buku' sira sanahulu dua, paroong asa reni' batu makadila' rupa' mabeli. Masososa' a pake batu yaspis nahaa rupa' modo'. Kadua a pake batu nilam, nahaa rupa' modo' barakeo'. Katelu a pake batu mirah, nahaa rupa' pilas. Kahaa a pake batu samrud, nahaa rupa' modo'. 20 Kalima a pake batu unam, nahaa rupa' soklat-fula'. Kanee a pake batu sardius, nahaa rupa' pilas. Kahitu a pake batu ratna cempaka, nahaa rupa' lilo tetei'. Kafalu a pake batu beril, nahaa rupa' modo' barakeo'. Kasio a pake batu krisolit, nahaa rupa' uni'. Kasanahulu a pake batu krisopras, nahaa rupa' momodo'. Kasanahulu esa a pake batu lasuardi, nahaa rupa' modo' barakeo'. Ma kasanahulu dua a pake batu kecubung, nahaa rupa' pilas barakeo'. 21 Ma lelesu bafa' kasanahulu dua' sira, tao si reme mutiara deke' sanahulu dua. Lelesu esa sona tao ni neme mutiara deke' esa. Ma kota ria okafoo na, ara taon neme lilo isi' makadila' sama leo' kaca.m
22 Tehuu au ta ita uma mamaso' nai kota ria. Nana huu Manetualain mana kuasa bau-ina' ma Bibi-lopo Ana' a rai naa la'o naroo. Huu ria naa, lahenda ra do'o-tabe Si. 23 Kota ria ta parluu ledo ma bula' ela makaledo' a, nana huu Manetualain rela-sa'an nahaa nai naa. Ma Bibi-lopo Ana' ria, dadi sama leo' dedede' a pila.n 24 Neu' ko lahenda reme basa nusa' rai dae-bafo' a mai la'o-la'o rai makaledo' ria. Mane' rai dae-ina' a reni sira hata-heto nara leo naa' reu.o 25 Hatu' ta nai naa. Huu ria naa, ta parluu ena kota ria lelesu nara so'. 26 Neu' ko ara reni basa hata malole ma basa hada-horomata neme basa negara rai dae-ina' a, leo kota ria dale' reu.p 27 Tehuu basa tadalu' ara, leo-leo': mana soko, mana hohoke ma mapuputa' ara, ta bole maso' leo naa' reu. Bole maso' a, nana noi lahenda fo nade nara mana dui' nai Bibi-lopo Ana' a susuran, dudui nade' lahenda fo ri' rasoda ro Manetualain la'o naroo.q