Ara heke meke naga a pake rante losa teu' rifun esa
20
Boe ma au ita eila'o-limalope esa onda neme lalai mai. Ana homu rante bau-ina' esa, ma homu bolo' doidoso fo ta hapu mate'e na koe na. 2 Ana hopu na meke naga, nitu ra malaka na, ri' hulen rae, “Iblis”. Ria ri' napuputa' lahenda dae-bafo' a neme fai a ulu na mai. Eila'o-limalope ria heke na meke naga a pake rante, fo enan nai bolo' ria dale' losa teu' rifun esa.a 3 Eila'o-limalope ria rua meke naga a leo bolo' doidoso ria dale' neu. Ana segel naisa' bolo' a bafa na, fo ena meke ria neu' naa, losa teu' rifun esa. No ria naa, meke ria ta bisa napuputa' lahenda nusa' rai dae-ina' a losa teu' rifun esa. Basa ria, besa' ko po'i ni, tehuu noi hatemata'.4 Boe ma au ita kadera mana pareta dodou-ina', ma lahenda ratuu' rai lain. Manetualain so'u si dadi mana ee dedea'. Sira nana lahenda fo fai a ulu na tui-beka fee lahenda la'e-neu' Yesus Tutui Malole Na, ma Manetualain Hara-dasin, losa' lahenda raisa si. Sira ta soko banda ma'aa' ria no patung na. Sira boe ta sipo banda ma'aa' ria e'ee-dededen, nai sira dedein do lima nara. Raisa si, tehuu Manetualain fee si rasoda selu', ela ara pareta sama-sama ro Kristus losa teu' rifun esa.b 5-6 No ria naa, ara dadi lahenda masososa' fo ri' Manetualain fee si rasoda selu'. De raua-ranale matetu', huu fo sira dadi Manetualain lahendan. Sira ta nana tu'u leo mamana doidoso ria reu, de ta rameda rita mamates kadua a. Sira dadi sama leo' malaka agama fo ri' ralalau' Manetualain ma Kristus. Ma sira pareta sama-sama ro Kristus losa teu' rifun esa.
Tehuu lahenda mana mate feke' ara, muste rahani losa teu' rifun esa, besa' ko Manetualain fee si rasoda selu'.
Ara tu'u nitu ra malaka na leo tasi ai-pila' dale' neu
7 Neu' ko basa teu rifun kaesa' ria te, Manetualain nadenu po'i meke naga a neme bolo doidoso ria mai. 8 Ana napuputa' lahenda nusa' reme basa mamana' nai dae-bafo' a, ri' hule rae, Gog ma Magog. Neu' ko ana nabubua naa lahenda nara fo reu ratati. Sira dedesi na, sama leo' soroae' nai tasi' a suu na.c 9 Gog ma Magog soldadu nara, baris losa dae-ina' a bukun haas. Ara eo ra Manetualain kota susue Na ma lahenda nara. Tehuu Manetualain naonda ai-pila' neme lalai mai, de naa heni katema' soldadu sira. 10 Boe ma Manetualain lahenda nara homu ra nitu ra malakan, fo ri' Iblis, manatipu-manadai lahenda'. Ara tu'u ni leo tasi ai-pila' balerang mana basa taa' a dale' neu. Neu' ko ena ni nai naa sama-sama no banda ma'aa' a, ma mana nesi mata mapuputa na. Nai naa, ara hapu eese-rurumu' ma doidoso raroo hatu-leledon losa doo na neu.
Manetualain naetu' basa lahenda ra dedean
11 Boe ma au ita kadera mana pareta fula' bau-ina' esa. Manetualain natuu' nai kadera ria lain. Kekeneu te, dae-ina' a no lalai mopo' asa, huu fo ara ta ranenete rala Manetualain kuasa Na ma rela-sa'an.
12 Ma au ita lahenda mana mate' ara, aana-bauina' rapadei rasare ra kadera mana pareta ria. Eila'o-limalope rai nusatetu-ikutema' a, buka susura' fo ri' mana dui' lahenda dae-bafo' a nonoi-tataon katema'. Ara buka susura feke' esa bali, ri' susura' fo mana dui' nade' neme lahenda fo neu' ko rasoda ro Manetualain losa doo na neu. Ana naetu' lahenda mana mate' ara dedean tuka sira esa-esa' ko nonoi-tataon, sama leo' mana dui' nai susura' sira dale'.d 13 Basa lahenda mana mate' ara mai rapadei rasare ra kadera mana pareta ria. Sira si', basa lahenda fo mate si rai mada' lain, do rai tasi' a. Manetualain naetu' sira esa-esa' ko dedean, tuka nonoi-tatao nara. 14 Boe ma Manetualain tu'u Mamates a leo tasi ai-pila' mana basa taa' a dale' neu. Ana tu'u Mamana' Lahenda Mana Mate' a leo tasi ai-pila' ria neu boe. Huu fo tasi ai-pila' ria, nana mamana' mamates kadua. 15 Lahenda fo nade nara ta mana dui' nai susura' ria dale', sira boe tu'u si leo tasi ai-pila' mana basa taa' ria dale' reu. Huu fo susura' ria dui' noi nade' neme lahenda fo ri' hapu soda' mana basa taa'.