Lee fo ri' oe na neni soda', ma ai huu' mana neni soda'
22
Boe ma eila'o-limalope ria natudu au lee esa, fo ri' oe na neni soda'. Oe ria makaneneun sama leo' kaca, faa neme Manetualain no Bibi-lopo Ana' a kadera mana pareta Na mai.a 2 Ana faa leo okafoo ina fo ri' nai kota ria talada. Nai lee ria suun duas, mori ai huu' mana neni soda' esa. Ai huu' ria teu' esa, sona naboa lai' sanahulu dua, bula' esa lai' esa. Doo na bisa dadi modo-aidoo fo ramodo reni' lahenda nusa' rai dae-ina' a.b 3 Tehuu basa-basan fo parnaa Manetualain tipa-tola' ma kutuk asa, re'es ana kota ria. Nai naa noi Manetualain ma Bibi-lopo Ana' a ratuu' pareta rai Sira kadera mana pareta Na, ma Sira atan fo ri' do'o-tabe Si.c4 Sira basa bisa rita Manetualain mata-idun. Ma Manetualain nade Na mana dui' nai sira dedei nara. 5 Hatu' ta nai naa. De Manetualain lahenda Nara ta parluu ledo, do dedede', huu fo Manetualain tao na kota ria makaleledon. Neu' ko ara pareta nai naa losa doo na neu.d
Ramatua Yesus nate'e hehelu Na
6 Boe ma eila'o-limalope ria nafada au nae, “Basa-basan fo ri' au afada o, nana tebe. Basa lahenda bisa ramahere au dedea ka. Fai a ulu na Manetualain pake Dula-dale Na fo nafada Ria Hara-dasin neu' mana nesi mata nara. Tehuu besa' ia, Ana pake eila'o-limalopen nai nusatetu-ikutema' a, fo nafada ana nara la'e-neu' basa hihii-nanau' fo ta doo' a so' te, muste dadi.”
7 Yesus dedea nae, “Mafarerene'! Ta doo' a so' te, Au mai. Nai susura' ia, mana dui' basa-basan la'e-neu' hata fo neu' ko dadi. Basa lahenda fo tuka susura' ia isi-liin, neu' ko raua-ranale raan seli.”
8 Au, Yohanis dui' susura' ia. Au amanene ma ita basa hihii-nanau' ia ra. Au amanene basa, boe ma au sunda' undulaka ka uu' eila'o-limalope ria ei dae na fo do'o-tabe ni. Huu fo ria ri' natudu au basa hihii-nanau' ia ra. 9 Tehuu ana nafada au nae, “O boso' tao leo naa'! O muste do'o-tabe noi neu' Manetualain. Boso' do'o-tabe au. Huu fo au boe, Manetualain atan sama leo' o, mo toranoom fo ri' dadi Ria mana nesi matan, ma basa lahenda feke' fo ara tao tuka hata mana dui' nai susura' ia dale'.
10 O boso' mafuni susura' ia isi-liin neu' lahenda feke'. Ta doo' a so' te, basa hata fo ri' mana dui' nai susura' ia dale', tantu dadi.
11 Basa lahenda fo tao makekeo-makakanu', sona,
pesi si reme' naa, ela ara tao raroo makekeo-makakanu'.
Tehuu basa-basan fo rasoda lalao-lalafu',
ara muste rasoda lalao-lalafu' raroo.
Basa lahenda fo tao tadalu',
neme' naa ela ara tao tadalu' raroo.
Tehuu basa-basan fo tao malole,
ara muste tao malole raroo.”e
12 Yesus dedea selu' nae, “Mafarerene' matalolole! Ta doo' a so' te, Au mai. Neu' ko Au balas basa lahenda ra tuka sira nonoi-tataon.f
13 Au ia,
Alfa losa Omega.
Au ia,
A losa Z.
Basa-basan reme Au mai,
mulai neme masososa na losa babasan.g
14 Lahenda fo safe makamomoi kakao-papaken, sira raua-ranale.
Huu fo neu' ko ara hapu haak maso' tuka lelesu bafa' a leo kota ria dale' reu.
Lahenda fo rasoda lalao-lalafu', raua-ranale.
Huu fo neu' ko ara hapu isin fo raa ai boa' neme ai huu mana neni soda'.h
15 Tehuu lahenda feke' a, ta bole maso' leo naa' reu.
Ta Manetualain lahendan, sona ta bole leo rai naa.
Si', lahenda fo ta ramahere Manetualain,i
mana hohoke, mana soko,
kanisa lahenda', manaa tei',
ma mana mapuputa'.
Sira basa, ta bole maso' naa' reu.
Sira basa, ada' dea'.
16 Au, Yesus, ri' fee Au eila'o-limalope Ka neme nusatetu-ikutema' a mai, fo nafada basa hihii-nanau' ia ra, ela emi meu mafada Au hehelu Ka neu' jama'at kahitu' ara.
Au, mane' Daud tititi-nonosin.
Au, Mane' mana homu pareta.
Au makaledo Ka nahaa naan seli,
sama leo' ruu maiko'.
Au makaledo Ka tande na seli,
sama leo' ruu' dulupila'.”j
17 Manetualain Dula-dale Na naloo nae, “Leo ia' mai!”
Baroit ina' a boe naloo nae, “Mai leo!”
Ela basa-basan fo ri' ramanene rae, “Mai leo!”
Ela basa mana mamada-metihedu' ara, mai rinu leo!
Ela basa-basan nau rinu oe mana neni soda',
mai aso leo!
Lahenda bole aso pardeo
oe ria.
Lahenda bole rinu oe ria
ta tifa-bae.”k
Yohanis hehelu mate'e na
18 Au, Yohanis, afarerene' fee basa lahenda fo neu' ko ramanene hata fo Manetualain natudu mema' neu' au nai susura' ia, leo ia': kalu lahenda tamba ubea' neu' susura' ia, neu' ko Manetualain huku tamba ni neni' soe kahitu' fo ri' Ana po'a si leo dae-ina' a mai. 19 Ma kalu lahenda nakura' ubea' neme' susura' ia mai, neu' ko Manetualain hai fali' ria haak na, ela ana boso' maso' leo kota malalao-malalafu' ria neu, ma ana boso' naa ai boa' fo ri' tao naa lahenda nasoda naroo.l
20 Yesus natudu basa hihii-nanau' ia ra. Ana helu nae, “Tebe! Ta doo' a so' te, Au mai.”
Ramatua Yesus, mai leo!
21 Au hule Ramatua Yesus natudu dale malole Na neu' Ria lahenda Nara katema'. Amin!
Neme au,
Yohanis