Mana soda ra soda rai nusatetu-ikutema' a
19
Eila'o-limalope ria dedea nae leo' naa, boe ma au amanene haraoe bau-ina' nonoo' leo mana soda ra, soda rai nusatetu-ikutema' a. Ara soda rae,“Haleluya! Haleluya!
Ita io-oa ita Manetualain na,
nana huu Ria marela-masa'a.
Haleluya! Haleluya!
Ita io-oa ita Manetualain na,
nana huu Ria mana kuasa bau-ina'.
Manetualain po'i-tata na ita,
teme sala-siko a.
Manetualain tao nabeu ita,
teme ita masoda peko-paki na.
2 Ita io-oa Manetualain,
nana huu Ana naetu' dedea' no roo-tetu'.
Ita io-oa Manetualain,
nana huu Ana nateta' huhuku' sona beibebera'.
Manetualain fee huhuku' neu' ina' mana sosoa ria,
nana huu ana fufudi-lele'o lahenda rai dae-bafo' a,
ela ro ni hohoke,
ma tuka ria tadalu na.
Manetualain balas ina' ria tadalu na,
nana huu ana naisa
Manetualain ata Nara.”a
3 Ara soda sosoda feke' nai nusatetu-ikutema' a bali rae,
“Haleluya! Io-oa Manetualain!
Haleluya! Madedema Ria nade Na!
Nana huu ai-pila' fo ri' naa heni ina' ria popora na,
masu na ae naroo ta pake hahae'.
Ma ai-pila' fo ri' naa heni kota bau-ina' ria,
masu na ae naroo ta etu-basan.”b
4 Boe ma ketua kadua hulu haa' sira ro banda kahere' kahaa' ara sunda' undulaka nara, do'o-tabe rasare leo Manetualain kadera mana pareta Na reu. Ara hada-horomata Ni rae,
“Tebe! Mai ita io-oa Manetualain!
Haleluya! Mai ita tadedema Ria nade Na!”
Bibi-lopo Ana' a feta kakabi Na
5 Boe ma au amanene haraoe' esa neme kadera mana pareta ria bali nae,
“Manetualain ata Nara!
Manetualain ana Nara!
Mai ita tadedema Manetualain nade Na.
Aana-bauina' basan io-oa Ni.”c
6 Boe ma au amanene nonoo' leo lahenda dodou' dedea-rao nara. Sira haraoe nara lii na bau-ina' a sama leo' oe mana rirido', ma narulu sama leo' natata natututi'. Ara dedea rae,
“Haleluya! Ami io-oa Manetualain.
Haleluya! Ami madedema nade Na.
Nana huu Ria mana kuasa bau-ina'.
Ma Ria pareta basa-basan.d
7 Besa' ia, ita tamaho'o.
Besa' ia, ita tamaho'o-tatadale.
Ita io-oa Ni,
nana huu Bibi-lopo Ana' a fai kakabi Na losa so.
Ita tadedema nade Na,
nana huu Bibi-lopo Ana' a baroit Na sadia so.
8 Manetualain fee ni pake kakao-papake kakabi' neme tema' balanau'.
Manetualain fee ni kakao-papake fula makadila'.”
(Kakao-papake fula makadila' ria, ri' Manetualain lahenda Nara nonoi-tatao malolen.)
9 Boe ma eila'o-limalope ria nafada au nae, “Yohanis! O muste dui' leo ia':
‘Basa lahenda fo ri' hapu naloo' leo Bibi-lopo Ana' a feta kakabi Na mai, neu' ko raua-ranale matetu'!’”
Eila'o-limalope ria dedea naroo nae, “Manetualain Hara-dasin, mema' tebe!”e
10 Boe ma au sunda' undulaka ka do'o-tabe eila'o-limalope ria. Tehuu ana nafada au nae, “O boso' do'o-tabe au! Huu fo au boe Manetualain atan sama leo' o mo toranoom fo ri' rafada lahenda la'e-neu' Yesus. Mana nesi mata fo rafada Manetualain hehelu-barataan, basa-basan ratudu la'e-neu' Yesus ela lahenda ra do'o-tabe Ni. Huu fo Manetualain Dula-dale Na hihii-nanaun leo naa'. De boso' do'o-tabe au, tehuu do'o-tabe noi neu' Manetualain!”
Ramatua Yesus mai sa'e dara fula'
11 Boe ma au boti' laka ka te au ita nusatetu-ikutema' a mana soi'. Kekeneu te, au ita dara fula' esa kalua mai. Lahenda fo ri' sa'e nai dara ria lain, nade, “Lahenda ta Nafarene heni Hehelu Na” ma “Lahenda Roo-tetu'”. Fai fo Ana naetu' dedea', Ana naetu' tuka matetu na. Kalu Ana neu natati, Ana neu no dale roo-tetu'.f 12 Ria mata na nahaa sama leo' ai-pila'. Ana pake silaka mane' dodou' nai laka Na. Ria nade na mana dui' nai ao-ina na, tehuu noi Ria ri' bubulu' nade' ria sosoa na.g 13 Ria kakao-papaken, mana maboro' nai daa. Lahenda hule Ni rae, “Manetualain Hara-dasin”. 14 Au ita soldadu reme nusatetu-ikutema' a ara sa'e dara fula' mai tuka Ni. Basa si pake kakao-papake balanau' fula makadila'. 15 Tafa' matande esa kalua neme Ria bafa Na mai. Ana pake tafa' ria, fo natati soa' basa lahenda nusa' rai dae-ina', losa' Ana naseki si. Ana dadi sira Mane na. Ana pareta si neni' tete'e besi, losa' rameda rita Manetualain mana kuasa a nasa-boliin, sama leo' lahenda aai rasosopu' anggor ela hee ra oe na.h
16 Nai Lahenda ria kakao-papaken, ma nai Ria puu Na, mana dui' nae leo ia':
Mane' soa-neu' basa mane' ara.
Ramatua' soa-neu' basa ramatua' ara.
Ramatua Yesus naseki banda ma'aa' no soldadu nara
17 Boe ma au ita eila'o-limalope esa nai nusatetu-ikutema' a, napadei nai ledo a. Ana naloo basa manupui' mana naa popora' fo ri' laa ramemeto' rai lalai nae, “Emi basa mai' ia mabua, fo mia Manetualain feta bau-ina Na! 18 Emi bole mia basa lahenda mana mate' ara popora nara: si' mane' ara, malaka musu ra ma soldadu ra. Emi bole mia dara ra ro soldadu fo ri' sa'e dara sira, popora nara. Emi bole mia ata, do ta ata, lahenda aana', do lahenda bau-ina' popora nara. Eetu dedea na, emi bole mia sira basa popora nara.”i
19 Boe ma au ita banda ma'aa' fo fai a ulu na kalua neme tasi' a mai. Ana dedea-rao' no basa mane' rai dae-ina' a ro soldadu nara, fo ratati soa' Lahenda mana sa'e dara fula' ria, sama-sama no Ria soldadu nara rai nusatetu-ikutema' a. 20 Tehuu Lahenda mana sa'e dara fula' ria, hopu na banda ma'aa' a no mana nesi mata mapuputa na. Mana nesi mata ria, ri' fai a ulu na tao tanda heran rupa', fo napuputa' lahenda ela sipo' banda ma'aa' ria e'ee-dededen, ma soko ria patung na. Tehuu besa' ia, Lahenda mana sa'e dara fula' ria, tu'u heni banda ma'aa' ria no mana nesi mata na leo tasi ai-pila' balerang mana basa taa' a dale' neu.j 21 Lahenda mana sa'e dara ria, naisa soldadu feke' sira, neni' Ria tafan fo ri' kalua neme bafa Na mai. Boe ma manupui mana naa popora' ara raa heni katema' popora' sira.