Manetualain eila'o-limalopen tui kota Babel hehea heni na
18
Boe ma au ita eila'o-limalope feke' esa onda neme nusatetu-ikutema' a mai. Ana nanuu kuasa ma makaledo na nahaa naan seli losa tao na dae-ina' a makaleledon. 2 Ana nahara nambera nae,“Hea neu so! Hea neu so! Kota Babel hea neu so!
Tu'u neu so! Tu'u neu so! Kota bau-ina' ria tu'u neu so!
Ana dadi nitu ra mamana leleon.
Ana dadi dula-dale tadalu' ara nusa-namon.
Ana dadi basa manupui mana naa popora' ara mamana nabuan.
Ana dadi basa banda tadalu' ara oka nara.a
3 Ana hea neu, nana huu basa lahenda nusa' rai dae-ina' a,
mai rinu mafu' neme ria anggor na.
Ana tu'u neu, nana huu basa leo rai dae-bafo' a,
mai hohoke kota ria lahenda nara.
Mane' reme basa nusa' ara,
mai hohoke rai naa.
Lahenda papalele reme' basa bendar,
mai rase'o losa' ara ramasu'i.
Nana huu kota ria sama leo' ina' fo ri' nahii' asa lole-napu' a katema'.
Nana huu kota ria sama leo' ina' mana sosoa fo ri' nahii' saka mina-malada a katema'.”b
4 Boe ma au amanene selu' haraoe feke' esa naloo neme lalai mai nae,
“Basa Au lahenda Kara emin!
Malai kalua meme naa' mai leo!
Foa ela kota ria leo!
Boso' tao tuka kota ria lahenda nara tadalun,
ela boso' hapu sira huhuku na.c
5 Huu no sira tadalu nara
dodou' naan seli.
Ma sira sala-sikon
natutule' losa lalai.
Besa' ia, Manetualain ta nafarene heni
sira eno masoda tadalun.
Besa' ia, Manetualain sadia
huku si.d
6 De emi muste balas sira tadalu nara,
sama leo' ara tao tadalu' neu' lahenda feke' ara.
Tehuu emi muste balas sira,
losa' lai' dua.
Fai a ulu na ara tipu-dai lahenda,
fo rinu anggor doidoso, neme sira mako-tee lilo pilas na.
Tehuu besa' ia sira muste rinu
anggor doidosa ria, losa lai' dua.e
7 Sira tao ao nara kahere'.
Ma radedema ao nara.
Ara rasoda noi nai lole-napu'.
Ara rahii' noi mina-malada.
Huu ria naa, ara muste hapu susa bau-ina'.
De ara muste rasoda nai doidoso a.
Fai a ulu na ara dedea koao' sama leo' ina' mana sosoa ria rae,
‘Au ia, ina mane'!
Au ta dadi ina-falu!
Au ta dola.
Au ta pake papake keo'.’
8 Ara dedea rae leo' naa losa' Manetualain namanasa no si.
Manetualain nau huku si.
Neu' ko noi nai fai' esa dalen,
ara ramalaa raan seli,
ara dola-ramatani,
ma mate si.
Losa' lahenda tu'u si leo ai-pila' dale' reu.
Ai-pila' a naa heni popora nara.
Huu fo Manetualain mana kuasa bau-ina' a naonda huhuku' ia.
Ma Manetualain marela-masa'a naetu' dedea' ia.f
9 Fai a ulu na mane' ara mai
hohoke kota ria lahenda nara,
ma rasoda hapu-dai rai naa.
Neu' ko ara rita masu' neme ai-pila' ria mai,
neu' ko ara bubulu' ai-pila' a naa heni kota ria.
Boe ma ara dola-ramatani ni.
10 Sira ao-ina nara maninis rita lahenda sira doidoso.
Tehuu ara raparani rapadei ada' doo' a.
Ma ara raparani mete noi reme naa' mai.
Ara dedea rae,
‘Adoo! Kasian Babel!
Adoo! Kasian kota bau-ina'!
Huu fo noi jam esa' a dalen, o hapu huhuku'.
Huu fo noi hatemata', o malulutu'.’g
11 Lahenda fo fai a ulu na reme basa mamana' ara mai papalele rai naa, ramanene leo' naa,
boe ma ara dola-ramatani.
Huu fo ta hapu lahenda esa,
asa sira hata nara.h
12 Ta hapu esa asa
sira lilo pilas, lilo fula',
batu makadila', do mutiara nara.
Ta hapu esa asa
sira tema' lenan, tema' sutra,
tema' balanau feke' pilas, do pila barakeo' nara.
Ta hapu esa asa
sira hata nara neme ai-nana maboo meni', gading madudula',
do ai madudula' feke' ara.
Ta hapu esa asa
sira hata nara neme riti, besi, do batu marmar.
13 Ta hapu esa asa
sira ai ma'een, do ai rou ma'ee rupa nara.
Ta hapu esa asa
sira ai-nana maboo menin, do mina maboo meni rupa nara.
Ta hapu esa asa
sira oe anggor, mina saitun,
uu', do hade-gandum.
Ta hapu esa asa
sira sapin, bibi-lopon, do dara nara.
Ta hapu esa asa
sira kareta nara,
do sira ata nara.i
14 Neu' ko lahenda papalele ra rasaledale rae,
‘Adoo Babel!
Adoo kota bau-ina' on!
O hata lole-napum fo ri' lahenda mara rahii' raan seli,
ta'a so.
Mopo basa si so, de ara to'a- taa,
raan seli.’
15 Fai a ulu na lahenda papalele sira ramasu'i, nana huu kota fo ri' sama leo' ina' mana sosoa ria.
Tehuu besa' ia rasaledale ta etu-basan.
Ara bii' raan seli,
rita kota ria lahenda nara doidoso.
Sira ao-ina nara maninis raan seli,
rita sira huhuku na.
Tehuu ara raparani mete noi reme doo' a mai.
Ara raparani rapadei ada' naa'.
16 Ara dedea rae,
‘Adoo! Kasian Babel!
Adoo! Kasian kota bau-ina' on!j
Fai a ulu na o lahenda mara pake kakao-papake balanau' pilas ma pila barakeo',
neme tema' mabeli a.
Fai a ulu na o lahenda mara papake ao nara reni' lilo pilas, mutiara,
ma batu makadila' mabeli.
17 Tehuu noi jam esa' a dalen,
o hata mara ta'a so.
Noi hatemata',
o su'i-bete mara mopo si!’
Fai a ulu na kapatein ara ma mataroos ara
sa'e ofa' reu-mai rai kota ria.
Tehuu besa' ia, ara nafu rahani' doo' a.
Ma besa' ia, ara raparani mete noi reme doo' a mai.k
18 Ara ranilu masu' fo kalua neme ai-pila' ria mai.
Ara bubulu ai-pila' a naa heni ni.
Ara rasaledale rae,
‘Adoo kasian! Ta hapu kota feke'
bau-ina' sama leo' Babel so'.
Adoo kasian! Ta hapu kota feke',
malole na sama leo' ria so'.’l
19 Ara huru afu kari neu' laka nara,
nana huu dale nara susa.
Ara dola-ramatani,
nana huu dale nara ralulutu'.
Ara dedea rae,
‘Adoo! Kasian Babel!
Adoo! Kasian kota bau-ina' on!
Ami sa'e ofa' meu-mai meni hata fee o,
de ami mamasu'i.
Ami fua meni o hata-nuum,
losa' ami boe masoda nai lole-napu' a.
Tehuu noi jam esa' a dalen,
basa sira mopo' asa.
Noi hatemata',
basa sira ralulutu'.’m
20 Boe ma haraoe' ria dedea tamba nae,
‘Emi fo ri' leo nai nusatetu-ikutema'!
Ta parluu emi dale hedi.
Manetualain lahendan emin!
Ta parluu emi susa.
Manetualain lahenda nadedenu Nara!
Ela leo' bea na emi mamaho'o-matadale.
Manetualain mana nesi mata Nara!
Ela leo' bea na emi mamaho'o.
Fai a ulu na Babel tao nasususa' emi,
kota ria ese-rumu emi,
Tehuu besa' ia Manetualain balas emi doidosom.
Tehuu besa' ia, Manetualain balas kota ria tadalu na.’”n
21 Boe ma au ita eila'o-limalope bara'ai ina' esa nai nusatetu-ikutema' a. Ana so'u na batu esa bau lahenda a, de tu'u batu ria leo tasi' dale' neu. Ana nafada nae,
“Neu' ko ara ralulutu' Babel leo naa' boe.
Neu' ko ara tao ramopo kota bau-ina' ria leo naa' boe.o
22 Ta hapu lahenda,
namina' hata malii' nai kota ria.
Ta hapu lahenda,
namanene sasandu, gitaar, suling,
ma saki a lii na nai kota ria.
Ta hapu tukan,
noi ria nonoi na.
Ta hapu lahenda,
napau hade nai kota ria.p
23 Ta hapu lahenda,
dede dedede' nai kota ria.
Ta hapu lahenda,
tao feta kakabi' nai naa.
Fai a ulu na kota ria mana se'o do mana asa nara,
ramasu'i raan seli.
Fai a ulu na Babel lahenda papalele nara,
rasoda nai lole-napu'.
Tehuu ara pake kuasa maiu',
fo tipu-dai lahenda rai dae-ina'.
Ara pake malela' siura-tokonoo',
fo rapuputa' lahenda dae-bafo' a.q
24 Babel hapu huhuku mabera ia,
nana huu ana naisa Manetualain mana nesi mata Nara.
Kota bau-ina' ria nalulutu',
nana huu ana ese-rumu Manetualain lahenda Nara.
Ara raisa Manetualain lahendan ruma rai mamana feke'.
Tehuu Babel muste lepa-nasaa katema' sala' sira.
Kota bau-ina' ria muste lepa na natataa' ria.”r