3 Manetualain Dula-dale' Na onda neu' au, boe ma eila'o-limalope nai nusatetu-ikutema' a noo au leo mamana lino-nees esa uu. Nai naa au ita ina' esa natuu nai banda ma'aa pilas makadila' esa lain. Banda ria nanuu laka' hitu ma susura' sanahulu. Nai ao-ina na katema', mana dui' dedea namumulu-namamae' Manetualain.^c 4 Ina' ria pake kakao-papake balanau pilas ma pila barakeo'. Ria papake na aon neni' lilo pilas, batu makadila' mabeli ma mutiara. Ana homu mako-tee lilo pilas esa nai lima ona na henu' no anggor. Anggor ria, nana ri' ria hohoke na, basa hihii-nanau' tadalu' ma makekeo-makakanu feke' fo ri' ana tao.^d 5 Nai ria dedei na mana dui' nade' esa, sosoa-raraan bei nino. Dudui' ria nae leo ia':

6 Au mete te ina' ria mafu' naan seli, nana huu ana ninu Manetualain lahenda Nara daa na. Ria sosoa na nae, ana naisa Manetualain lahenda nara, nana huu ara ta hahae rafada lahenda la'e-neu' Yesus.

Au ita leo' naa, boe ma au oi amakokoa' a ma heran aan seli.

7 Tehuu eila'o-limalope ria natane au nae, “Ubea' taon de o moi mamakokoa' a leo' naa? Mai fo au afada o ina' tadalu' ria sosoa-raraan. Leo' naa boe banda ma'aa' laka kahitu' susura kasanahulu' fo ri' ana sa'e ni. 8 Fai a ulu na, banda ma'aa' ria nasoda nai dae-ina' a, tehuu besa' ia ne'es ana so. Tehuu ta doo' a so', te ana kalua neme bolo' doidoso fo ta hapu mate'e na. Tepo' ria, lahenda fo ri' rasoda rai dae-bafo' a, nade nara ta mana dui' nai Bibi-lopo Ana' a Susuran fo ri' Manetualain dui' mema' tepo' fo Ana bei ta adu dae-bafo' a. Neu' ko lahenda sira rita banda ma'aa' ria te roi ramakokoa' a, nana huu ana natafali mai. Tehuu kalu ana fali mai, neu' ko Manetualain tu'u ni leo ai-pila' balerang mana basa taa' a dale' neu.^e

9 Lahenda malela' matetu' a bubulu' hihii-nanau' ia. Banda ma'aa' ria lakan hitu, sosoa na nae lete' hitu. Ina mana sosoa ria natuu' nai lete' sira lain. Ma laka' sira hitu sosoa na nae, mane' hitu. 10 Neme mane' sira hitu, mate lima so. Besa' ia esa homu pareta. Esa bali bei ta mai. Tehuu kalu ana mai, ana pareta noi hatemata'. 11 Besa' ia au afada la'e-neu' banda ma'aa' fo fai a ulu na nasoda, tehuu besa' ia mate ni so. Fai a ulu na ria boe esa neme mane' kahitu sira mai, tehuu neu' ko ana pareta selu' dadi mane' kafalu a. Neu' ko ria boe nalulutu'.

12 Susura' sira sanahulu sosoa na nae mane' sanahulu. Ara bei ta homu pareta. Neu' ko ara sipo kuasa, fo pareta sama-sama ro banda ma'aa' ria, tehuu noi hatemata'.^{f g} 13 Huu fo basa si rala hara' fo fee sira kuasa na leo banda ma'aa' ria neu. 14 Mane' sira neu' ko reu ratati soa' Bibi-lopo Ana' ria. Tehuu neu' ko Bibi-lopo Ana' a no lahenda nara raseki basa si. Lahenda mana tuka Bibi-lopo Ana' ria, si' lahenda fo Ana teka-here ma naloo si ela tuka rahere Ni. Neu' ko ara raseki, nana huu Bibi-lopo Ana' ria kahere' naan seli. Noi Ria ri' Mane' soa-neu' basa mane' ara, ma Malaka soa-neu' basa malaka ra.

15 Ma oe dodou' fo ri' nanenea' ina' mana sosoa ria, si' lahenda reme basa leo ra, nusa' ara, dedea' ara ma basa negara rai dae-ina'. 16 Mane' sira sanahulu ma banda ma'aa' ria, neu' ko ete' ao nara ro ina' mata mamae' taa' ria. Neu' ko ara ralea ra kakao-papaken ma hata nara katema', de foa ela ni po'irao' neu' naa. Ara raa paa na ma hotu heni popora na. 17 Manetualain tao na mane' sira sanahulu rala hara', fo fee sira kuasa na leo banda ma'aa' a neu, losa' ana tao nalulutu' ina' ria. No ria naa, Manetualain hihii-nanaun basa-basan neu' ko dadi.

18 Ina' mana sosoa fo o mita ni a, ri' kota bau-ina' fo pareta basa mane' nai dae-ina' a.”