Manetualain nasa-bolii Na mana po'a leo dae-ina' a neu
16
Boe ma au amanene haraoe' bau-ina' esa neme Uma Mamaso' a, pareta eila'o-limalope sira hitu nae, “Meu leo! Hai meni bokor sira fo po'a Manetualain nasa-boliin leo dae-ina' a neu.”2 Eila'o-limalope masososa' a namanene leo' naa, boe ma ana po'a ria bokor na isi na leo dae-ina' a neu. Kekeneu te, soe a la'e basa lahenda fo parnaa sipo banda ma'aa' ria e'ee-dededen, ma lahenda fo soko ria patung na. Ara hapu bisu paes nanoso na seli.a
3 Boe ma eila'o-limalope kadua a po'a ria bokor na isi na leo tasi' a neu. Kekeneu te, tasi oe' a dadi daa, naboo puru sama leo' lahenda mana mate' a ma basa masoda rai tasi' dale', mate katema' asa.
4 Boe ma eila'o-limalope katelu a po'a ria bokor na isi na leo lee ra, ma oe mata' ara neu, de basa oe ra dadi daa.b 5 Au amanene eila'o-limalope esa nai nusatetu-ikutema' fo ri' ana urus basa oe nai dae-ina' a, io-oa Manetualain nae,
“Oo Manetualain!
Manetualain malalao-malalafu'!
Manetualain sala' ta'a!
Manetualain masoda' neme masososa na,
ma Manetualain masoda' losa doo na neu.
Manetualain naetu' dedea' no matetu'.
Manetualain nateta' huhuku' sona naraa.
6 Lahenda ra ratiti-ranosi' heni
Manetualain lahenda Nara daa na.
Lahenda ra raisa
Manetualain mana nesi mata Nara.
Huu ria naa, Manetualain naseti si rinu daa.
Manetualain balas neni' huhuku' natetu-naraa.”
7 Boe ma au amanene haraoe' esa neme mei tutunu-hohotu' a, nataa nae,
“Tebe! Manetualain mana kuasa bau-ina'.
Tebe! Manetualain marela-masa'a.
Manetualain naetu' dedea' no matetu'.
Manetualain nateta' huhuku' sona naraa.”
8 Boe ma eila'o-limalope kahaa a po'a bokor na isi na leo ledo a neu. Kekeneu te, ledo a nahaa na seli, losa' putu lahenda dae-bafo' ara. 9 Lahenda dae-bafo' fo ri' putu si, ara kutuk Manetualain nade Na, nana huu Ana nadenu fo fee si soe ria. Leo mae leo' naa, tehuu ta hapu lahenda esa saledale-tu'etei na, natafali leo Manetualain neu fo io-oa Ni.
10 Basa de eila'o-limalope kalima a po'a ria bokor na isi na leo banda ma'aa' ria kadera pareta na neu. Kekeneu te, ma'iu ina' a poti na basa lahenda fo soko neu' banda ma'aa' ria, losa' ara rakemu' nisi nara, ela bisa ranenete nai doidoso a.c 11 Ara kutuk Manetualain nai nusatetu-ikutema' a, nana huu bisu nara ranoso raan seli. Leo mae leo' naa, tehuu ta hapu esa edi' ai na neme tatao tadalu' a mai, fo natafali tuka Manetualain.
12 Boe ma eila'o-limalope kanee a po'a ria bokor na isi na leo lee bau-ina' Efrat neu, de lee ria meti oe na. Ara tao eno' nesi' na, fee mane' ara ma soldadu fo reme dulu mai.d 13 Ma au ita nitu makaresi' telu, rupa nara sama leo' kedeama. Esa kalua neme meke naga ria bafa na mai. Esa kalua neme banda ma'aa' ria bafa na mai. Ma esa bali kalua neme meke naga ria mana nesi mata mapuputa' na bafa na mai. 14 Nitu sira telu, ranuu kuasa tao tanda heran rupa'. Ara mai rala hara' ro basa mane' nai dae-bafo' a, fo fai' esa sona reu ratati soa' Manetualain mana kuasa bau-ina'. Tehuu rahelu' ra ledo-fai a, nana ri' Manetualain ledo-fain fo Ana naetu naan, ela naseki Ria musu-noo Nara katema'.
15-16 Mamana' fo ri' neu' ko rabua ela ratati ao, dedea Ibrani nae, Armagedon.
Yesus Kristus dedea nae, “Mafarerene' matalolole! Kekeneu te, Au mai sama leo' na'o, de lahenda ta bubulu'. Ua-nale bau-ina' neu' lahenda fo ranea ma pake bua-loas. Kalu Au mai, ana ta mae', nana huu lahenda ta rita ni po'irao'.”e
17 Basa de eila'o-limalope kahitu a po'a ria bokor na isi na leo ani a neu. Boe ma Manetualain dedea nambera-ina neme kadera mana paretan fo nai Uma Mamaso' a nae, “Basa so! Au nasa-bolii Ka po'a heni katema' asa so!”
18 Boe ma narela-natata natututi' lii na bau na seli, ma dae a natakeko naan seli. Dae natakeko leo naa' a, bei ta parnaa dadi nai dae-ina' a.f 19 Tepo' ria Manetualain ta nafarene heni kota Babel tadalu na. Ana tao na dae natakeko naan seli, losa' kota bau-ina' ria hea batin neu' telu. Ana tao leo naa', ela lahenda Babel ara rameda rita Ria nasa-boliin. Kota feke' rai dae-bafo' a hea heni si boe.g 20 Tepo' ria pulu ra tena heni si ma mopo basa lete' ara.h 21 Uda es batu kaba'u-ina ra tuda reme lalai mai, rapanu'i ra lahenda dae-bafo' a. Es batu sira, ruma bebera nara kilo haa hulu.i Huu no uda es ria tao na lahenda dae-bafo' a doidoso, de ara kutuk Manetualain.j