Eila'o-limalope hitu rai nusatetu-ikutema' a reni soe bau-ina' hitu neu' dae-ina' a
15
Boe ma au ita hihii-nanau' kahere' esa nai lalai, losa' au heran aan seli. Eila'o-limalope hitu rai nusatetu-ikutema' a, esa' ko homu' kuasan fo fee soe bau-ina' neu' dae-ina' a. Soe ia ra hitu, nana soe mate'e oe'. Kalu basa sira dadi, sosoa na nae, Manetualain dale Na masufun, de Ana ta namanasa no lahenda dae-bafo' a so'.2 Au ita tasi' a pila sama leo' kaca a mana epo' ai-pila'. Au ita lahenda dodou' rapadei' rai tasi' ria suu na. Sira nana, lahenda fo ta tuka banda ma'aa' ria, ta soko neu' patung na ma ta sipo' ria ee-dededen. Basa si homu hata malii' sama leo' sasandu fo ri' ara sipo neme Manetualain mai. 3 Ara soda ba'i Musa sosodan esa. Ba'i Musa nana Manetualain ata fai ulun. Lahenda sira boe soda sosoda' esa io-oa Yesus. Fai a ulu na lahenda raisa Ni, sama leo' lahenda hala bibi-lopo ana' nai Manetualain Uma Mamaso Na, fo tao masufu Ria dale Na. Ara soda rae,a
“Ami io-oa Manetualain!
Ami madedema Ria nade Na!
Nana huu Manetualain kuasa Na, bau na seli.
Ma Manetualain marela-masa'an, talalu heran.
Manetualain pareta basa lahenda nusa' rai dae-ina' a.
Manetualain dadi Mane' soa-neu' basa leo ra rai dae-bafo' a.
Basa-basan fo Manetualain adu-tao, bau na seli!
Manetualain nonoi-tataon, malole na seli!
Manetualain eno-dalan, roo-tetu'!
Manetualain masodan roo-tetu'!b
4 Basa lahenda radedema Manetualain nade Na,
basa lahenda io-oa Manetualain dale malole Na.
Nana huu noi Manetualain ri' malalao-malalafu'.
Noi Ria ri' sala' ta'a.
Neu' ko basa lahenda nusa' ara mai do'o-tabe Manetualain.
Neu' ko basa leo ra mai hule makasi neu' Manetualain.
Nana huu basa lahenda rita Manetualain nonoi-tatao malole Na.
Ma basa lahenda bubulu' Manetualain dale roo-tetu Na.”c
5 Lahenda sira soda basa, boe ma au ita Kama Malalao-malalafu' Naan Seli nai Manetualain Uma Mamaso Na nai nusatetu-ikutema' a, tema' mana pepele na mana soi napepela'.d 6 Au ita eila'o-limalope sira hitu rai nusatetu-ikutema' fo ri' reni soe kahitu' sira, kalua reme Manetualain Uma Mamaso Na mai. Ara pake kakao-papake fula makadila' ma rasaa lafa ana' lilo pilas tea'.
7 Boe ma au ita esa neme banda kahere' sira haa, fo ri' rai Manetualain kadera mana paretan boboa na, ana bati bokor lilo pilas hitu fee eila'o-limalope sira hitu. Bokor sira hitu esa-esa' ko mana peda' Manetualain huhuku Na. Ria ri' nasoda naroo losa doo na neu. Ana sadia po'a nasa-boliin leo dae-ina' a neu. 8 Ta doo bea boe' te Uma Mamaso' a henu' no ai masu' a kalua neme Manetualain rela-sa'an ma kuasa Na. Ta hapu lahenda esa bisa maso' leo naa' neu boe'. Eila'o-limalope sira hitu, muste po'a rabasa soe kahitu' ara leo dae-ina' a mai, besa' ko lahenda bisa maso' leo naa' reu.e