Bibi-lopo Ana' a no Ria lahendan rifun natun esa haa hulu haa
14
Boe ma au boti' laka ka, kekeneu te, au ita Bibi-lopo Ana' ria napadei nai lete ana' esa lain, nade lete Sion. Ana napadei sama-sama no lahenda rifun natun esa haa hulu haa. Nai sira dedei nara mana dui' Bibi-lopo Ana' ria no Papa Na nade Nara.a 2 Au amanene haraoe' esa neme lalai mai. Lii na, bau-ina' a sama leo' oe mana rirido', ma narulu sama leo' tatas. Tehuu haraoe' ria malole na seli, sama leo' lahenda dodou' kuti sasandu. 3 Boe ma au ita lahenda rifun kaesa' natun kahaa hulu haa' sira, rapadei rasare ra Manetualain ma banda kahere' sira haa, ro ketua kadua hulu haa' fo ri' eo ra Manetualain kadera mana pareta Na. Lahenda kadodou-ina' sira soda sosoda' bebeu' esa. Noi sira mesa' asa ralela' sosoda' ria, tehuu lahenda feke' ara ta'a. Sira malole ro Manetualain, nana huu Manetualain pake Ria Ana Na daa Na fo soi-tefa si. 4 Sira masoda na lalao-lalafu', sama leo' ana tou muri-ana' a bei ta parnaa suku no ina'. Ara tuka rahere Bibi-lopo Ana' ria bea' neu a, huu fo Manetualain soi-tefa si pake Ana Na daa Na, ela ara dadi reu' Ria nuu-enan. Huu ria naa, sira sama leo' pule ulu' fo lahenda reni neme oka-tine nara mai fee Manetualain no Bibi-lopo Ana' ria. 5 Sira ta dedea rapuputa', nana huu dale nara lalao-lalafu'.bEila'o-limalope telu reme nusatetu-ikutema' a reni haraoe'
6 Boe ma au ita Manetualain eila'o-limalopen esa nai nusatetu-ikutema' a bali. Ana laa namemeto' nai lalai, ela tui-beka Manetualain Tutui Malolen la'o naroo. Ana laa rule-feo nafada basa lahenda rai dae-ina' a, reme basa leo ra, nusa' ara ma basa dedea' ara. 7 Ana nahara nambera-ina nae,
“Emi muste hada-horomata Manetualain!
Emi muste madedema Ria nade marela-masa'an!
Nana huu losa ledo-fain,
fo Manetualain parisa' basa lahenda ra nonoi-tataon.
Io-oa Ni!
Madedema nade Na!
Nana huu Ria adu lalai ma dae-ina'.
Ma Ria pareta, de tasi' a ma oe mata' ara basan dadi.”
8 Dedea basa nae leo' naa, boe ma au ita eila'o-limalope feke' esa nai nusatetu-ikutema' a tuka ni. Ana nafada nae, “Nalulutu' so! Kota Babel kahere' a, nalulutu' so! Kota tadalu' ria, refa henin nai dae' so. Fai a ulu na, kota ria sama leo' ina mana sosoa a naseti basa lahenda nusa' rai dae-ina' a rinu mafu' ma tuka ria mana hohoke na. Tehuu besa' ia kota ria nameda naa Manetualain nasa-boliin!”c
9 Boe ma au ita eila'o-limalope feke' nai nusatetu-ikutema' a tuka eila'o-limalope kadua. Ana nahara nambera-ina nae, “Besa-besa! Basa lahenda fo soko banda ma'aa' ria no patung na, do sipo' ria e'ee-dededen nai dedei nara, do nai lima nara, neu' ko rameda raa Manetualain nasa-boliin. 10 Neu' ko Manetualain po'a Ria nasa-boliin neu' asa, sama leo' Ana fee si rinu anggor oe laka mali'. Neu' ko Ana tu'u heni si leo ai-pila' balerang mana mate taa' a reu. Ria eila'o-limalope nara rai nusatetu-ikutema' a ma Bibi-lopo Ana' a, rita hihii-nanau' ria.d 11 E'etu dedea na, basa lahenda fo soko banda ria no patung na, do sipo ria e'ee-dededen, neu' ko ara hapu eese-rurumu' mana basa taa'. Masu' a neme sira doidoson mai, kalua hatu-leledon ta namaetun.”e
12-13 De basa sira maksud na nae, Manetualain lahenda nara muste nenene ratalolole Ria pareta Na, ramahere raroo Yesus ma boso' heo'.
Au amanene haraoe' esa neme lalai mai nafada au nae, “Yohanis! O muste dui' leo ia': mulai besa' ia, kalu lahenda fo ramahere Ramatua Yesus a mate si, raua-ranale raan seli.”
Manetualain Dula-dale Malalao-malalafu Na nataa nae, “Tebe! Neu' ko ara raua-ranale matetu'! Huu fo ara hapu doidoso nai dae-bafo' a, tehuu tuka rahere Manetualain. De neu' ko Manetualain balas sira sosota na, ma ara ta doidoso nai nusatetu-ikutema' a.”
Manetualain huhuku Na nai dae-ina' a sama leo' etu-oru pake sabit
14 Boe ma au boti' laka ka. Kekeneu te, au ita oa fula' esa nahaa ma lahenda esa natuu' nai oa' ria lain. Lahenda ria nonoo' Lahenda Dae-bafo' Tetea'. Ana pake silaka juara lilo pilas, ma homu sabit matande esa.f
15 Boe ma au ita eila'o-limalope feke' esa nai nusatetu-ikutema' a, ana kalua neme Manetualain Uma Mamaso Na mai. Ana nahara nafada Lahenda fo nai oa' a nae, “Pake sabit ria, fo etu-oru leo! Huu fo ledo-fai nabubua dae-ina' a buna-boan, losa so.”g 16 Lahenda fo natuu' nai oa' a, etu-oru neni' Ria sabit Na, ma nabubua na dae-ina' a buna-boan.
17 Boe ma eila'o-limalope feke' esa, kalua neme Uma Mamaso' nai nusatetu-ikutema' a. Ana homu sabit matande esa fo saka' seu ai boa'.
18 Eila'o-limalope feke' esa, kalua neme mamana hohotu ai-nana maboo meni', nai Uma Mamaso' nai nusatetu-ikutema'. Eila'o-limalope ia nonoi-laka na, ri' nanea ai-pila' nai mamana hohotu ai-nana maboo meni'. Ana nadenu eila'o-limalope fo ri' homu sabit nae, “Pake o sabit ma fo etu ai boa' nai dae-ina' a leo! Huu fo nai naa, ai anggor boa nara ramalatu so.” 19 Eila'o-limalope ria lalae' sabit na leo dae-ina' a neu, fo kero ai anggor kii nara. Ana tao anggor boa' ara leo baak hehee' anggor dale' reu. Boe ma ara aai si ela hai ra oe na. Aai anggor boa' nai baak dale', nana ri' Manetualain nasa-boliin. 20 Baak hehee' ria nai kota dea'. Fai fo ara aai anggor boa' ara, daa dodou' faa dea' mai. Daa ria faa sama leo' lee esa, nanaru na kilo natun telu ma dedema na meter esa seseri'.h i