Banda ma'aa' a kalua neme tasi' dale' mai
13
Boe ma au ita banda ma'aa' esa kalua neme tasi' dale' mai. Ana nanuu laka' hitu ma susura' sanahulu. Ana pake silaka mane' bei esa' nai susura nara. Nai laka' sira mana dui' dedea' namumulu-namamae' Manetualain.a 2 Banda ma'aa' ria ao na, sama leo' meoasu. Ei nara, sama leo' baruang a ei nara. Ma bafa na, sama leo' singa bafa na. Meke naga a fee haak na neu' banda ma'aa' ria, fo natuu' nai kadera mana pareta ma pake katema' ria kuasa nara.b 3 Nai banda ma'aa' ria lakan esa hapu bisu pii bau-ina', nonoo' parnaa tati ni losa' hisadei na maten, tehuu ta dadi mate ni. Basa lahenda rai dae-ina' a rita banda ma'aa' ria kahere na, boe ma ara heran, de ara tuka ni. 4 Ara hada-horomata neu' meke naga ria, ma radedema ni sama leo' Manetualain, nana huu meke naga a fee banda ma'aa' ria kuasa. Lahenda sira io banda ma'aa' ria rae, “Ria kahere' naan seli! Ta hapu esa naseki ni boe'!”5 Manetualain fee banda ma'aa' ria lela' fo dedea koao' ma nadadae Manetualain. Ana hapu isin pareta, losa teu' telu seseri' (bula' haa hulu dua). 6 Huu ria naa, ana dedea namumulu-namamae' Manetualain. Ma ana dedea namumulu-namamae' Manetualain lahendan fo ri' leo rai nusatetu-ikutema'.c 7 Manetualain feen isin fo natati soa' Manetualain lahenda Nara losa' naseki si. Ana hapu kuasa fo pareta lahenda reme' basa leo ra, nusa' ara, ma basa dedea' nai dae-ina' a.d 8 Huu ria naa, basa lahenda rai dae-ina' a soko banda ma'aa' ria. Sira nana si' lahenda fo nade nara ta mana dui' nai Bibi-lopo Ana' ria Susura Na dale'. Fai a ulu na, lahenda raisa Bibi-lopo Ana' ria, tehuu Manetualain fee Ni nasoda selu'. Tepo' fo Manetualain bei ta adu dae-bafo' a, Ana dui' mema' basa lahenda kamahere' ara nade nara rai susura' ria dale' nae, sira neu' ko hapu soda matetu' mana basa taa'.e
9 “Nenene matalolole!
10 Kalu Manetualain naetu' nae, lahenda esa muste hopu raan,
neu' ko hopu raan.
Kalu Manetualain naetu' nae, lahenda esa muste raisan reni' tafa',
neu' ko raisan reni' tafa'.”f
De Manetualain lahenda Nara boso' heo', huu fo ria dadi lela' ela ara tuka ma ramahere raroo Ni!
Banda ma'aa' kalua neme dae-ina' a mai
11 Boe ma au ita banda ma'aa feke', kalua neme dae-ina' a mai. Ana nanuu susura' dua, sama leo' bibi-lopo a susura nara. Ma haraoe na, sama leo' meke naga a haraoe na. 12 Ana dadi mana nesi mata soa-neu' ria malaka na, ri' banda ma'aa' masososa' fo maulu na ara tati ni de hisadei na maten. Ana sipo kuasa neme ria malaka na fo naseti lahenda rai dae-ina' a ela soko ria malaka na. 13 Ana tao tanda heran kahere' dodou', losa' ana bisa naonda ai-pila' neme lalai mai, nai lahenda dodou' matan. 14 No ria naa, banda ma'aa' kadua a, pake malaka na kuasan fo napuputa' lahenda rai dae-ina' a. Ana pareta lahenda ra tao patung esa, sama leo' ria malaka na rupa-lolen, ela ara do'o-tabe ria malakan, fo ri' fai a ulu na ara tatin de hisadeina mate ni. 15 Manetualain fee banda mapuputa' ria isin, ela ana fuu ani hahae' neu' patung ria fo nasoda. No ria naa, patung ria bisa dedea ma pareta raisa lahenda fo ta soko ni.
16 Banda mapuputa' ria naseti basa lahenda fo ri' sipo' e'ee-dedede' nai sira lima ona nara, do nai dedei nara. Basa lahenda ra, aana-bauina', kamasu'i, hata taa', ata do ta ata, basa si muste sipo' e'ee-dedede' ria. 17 Kalu ta'a, sona ara ta bisa se'o-asa hata esa boe'. Nai e'ee-dedede' ria, mana dui' banda ma'aa masososa' a nade na, ma nomer na.
18 Nai ia muste pake dudu'a-aafi'! Lahenda malela' ara, bisa bubulu' nomer ria sosoa na. Nomer ia natudu lahenda esa ri', “nee, nee, nee (6,6,6)”.g