Meke naga a natati soa' ina' a no ana na
12
Boe ma kekeneu te au ita tanda kahere' esa toda nai lalai, bei ta parnaa lahenda dae-bafo' a rita ni: ina' esa, ao-ina na ledo a poti naan. Ana molo ei na nai bula' a. Ana pake silaka mane', nanuu ruu' sanahulu dua. 2 Ana nairu ma dola, huu fo tei na nanoso saka' boki.3 Kekeneu te, au ita tanda kahere' feke' esa toda nai lalai bali. Meke naga pilas bau-ina' esa, nanuu laka' hitu ma susura' sanahulu. Ana pake silaka mane' hitu rai laka nara.a 4 Ana pake iko na, fo kakai namopo babati' esa neme basa ruu' fo rai lalai. Ela noi babati' dua. Ana tu'u heni ruu' sira leo dae-ina' a mai. Boe ma neu napadei nasare na ina' ria nahani losa' ana boki, huu fo ana nau odo na tuti' ana' ria.b 5 Ina' ria boki na Ana tou' esa. Tehuu Manetualain eila'o-limalopen esa neme nusatetu-ikutema' a mai nalea na Ana' ria, de noon leo Manetualain neu, ela Ana' ria pareta sama-sama no Manetualain nai nusatetu-ikutema'. Huu fo Ana' ria, neu' ko pareta basa lahenda nusa' nai dae-ina' a neni' kuasa bau-ina'.c 6 Tehuu ina' ria nalai leo mamana lino-nees fo ri' Manetualain sadia mema' fee ni. Neu' ko ara urus ana nai naa, losa' teu' telu seseri' (ri' fai' rifun esa natun dua nee hulu).
Mikael natati soa' meke naga a nai nusatetu-ikutema'
7 Boe ma natati bau-ina' a dadi nai nusatetu-ikutema'. Manetualain eila'o-limalope nara ro sira malaka musun Mikael ratati soa' meke naga ria no ana mana tuka dea nara.d 8 Mikael asa raseki meke naga ria no ana mana tuka dea nara. Ara horo meke naga ria no ana mana tuka dea nara, ta bole leo rai nusatetu-ikutema' a. 9 Huu ria naa, ara usi heni si reme nusatetu-ikutema' a tu'u si leo dae-ina' a mai. Meke naga ria, ri' nitu ra malaka na, fo rae, ‘Iblis’. Neme masososa na, ana napuputa' lahenda dae-bafo' ara fo tao sala'.e
10 Boe ma au amanene haraoe' esa nahara nambera neme lalai mai nae,
“Fai a ulu na, meke naga ria napadei nahere nai Manetualain mata Na.
Ria soa popode' maa na tu'u sala' fee ita toranoo kamahere nara.
Ana sale si hatu-leledon.
Tehuu besa' ia, tu'u henin neme nusatetu-ikutema' a mai so.
De besa' ia basa-basan namano'u-namadai.
Besa' ia losa ledo-fain, fo Manetualain po'i-tata lahenda dae-bafo' a.
Besa' ia Manetualain pareta neni' Ria kuasa bau-ina Na.
Ma Ana so'u Kristus,
Lahenda fo ri' Ana teka-here Ni, ela dadi Mane' fee basa lahenda nusa' ara.f
11 Ita toranoo kamahere nara raseki meke naga, fo ri' fai a ulu na ana tu'u fee si sala',
nana huu Bibi-lopo Ana' a daa Na faa, ela sae-safe sira sala-sikon.
Ara raseki ni,
nana huu ara raparani rafada lahenda la'e-neu' Bibi-lopo Ana' a dale malole Na soa-neu' asa.
Leo mae lahenda ramanasa fo nau raisa si,
ara ta heo' fa.
12 De basa-basan fo rasoda rai nusatetu-ikutema' a, muste ramaho'o!
Tehuu basa-basan fo rasoda rai dae-ina' a muste ranea,
nana huu emi saka' hapu soe.
Nitu ra malaka na onda leo emi mai.
Ana namanasa naan seli,
nana huu bubulu' nae, ria ledo-fai tatao tadalu na, saka' basan!”
Meke naga a nasaka' ina' ria nai dae-ina'
13 Meke naga a bubulu' nae, tu'u heni ria leo dae-ina' a mai, boe ma ana saka ina' fo ri' boki na Ana' ria, ela tao nasususa' ana. 14 Tehuu ara fee ina' ria dila' dua, sama leo' parupua a dila nara, ela ana laa neu funi' nai mamana lino-nees, doo' a neme meke naga ria mai. Nai naa ara urus ana losa teu' telu seseri'.g 15 Meke naga ria nita leo' naa, boe ma ana nasapura oe dea' mai sama leo' faa a, ela lepa neni ina' ria. 16 Tehuu dae-ina' a tulu-fali ina' ria ma dae a natakaa, de odo na basa oe fo kalua neme meke naga a bafa na, ela oe ria boso' losa ina' a. 17 Meke naga a namanasa naan seli neu' ina' ria. De ana kalua natati soa' ina' ria ana feke nara, si' lahenda fo rasoda tuka Manetualain pareta Na ma manaku rae, sira nana Yesus lahenda Nara. 18 Boe ma meke naga ria neu napadei nai tasi' a suu na ma heku nisin.