Manetualain mana nesi mata kaheren dua
11
Boe ma ara fee au ai uuku' esa, nanaru na sama leo' tete'e. Manetualain pareta au nae, “Yohanis, foa leo kota Yerusalem muu uku Au Uma Mamaso Yahudi Ina Ka no mei tutunu-hohotu na. Ma reke basa lahenda fo hule-haradoi rai naa.a 2 Tehuu boso' uku Uma Mamaso' ria kintal na, huu fo mamana' ria fee henin leo lahenda nusa feke' fo ri' ta ralela' Au. Neu' ko ara mai heheta rakekeo-rakakanu Au kota Ki ria, losa bula' haa hulu dua (ri' fai' rifun esa natun dua nee hulu).b 3 Neu' ko Au adenu lahenda Ki dua rai naa, dadi Au mana nesi mata Kara. Neu' ko ara pake kakao-papake lumata-pinuidu ma rafada au hehelu Ka, losa' fai' rifun esa natun dua nee hulu.”4 Neme fai a ulu na Manetualain mana nesi matan Sakaria, dui' mema' la'e-neu' mana nesi mata kadua' ia ra. Ana pake gambar ai saitun huu' dua ma mamana' fufua dedede' dua rapadei' rai Manetualain fo ri' nanuu haak pareta basa lahenda nai dae-bafo' a mata Na.c 5 Kalu lahenda nau tao rasususa' Manetualain mana nesi matan ia ra dua, neu' ko ai-pila' a kalua neme sira bafa nara mai, fo naa naputu sira musu-noo nara katema'. No ria naa, basa lahenda fo nau tao rasususa' asa, tantu mate si. 6 Tepo' fo dua si dadi Manetualain mana nesi matan nai dae-ina' a, Ana fee si kuasa fo ena uda a. Ana fee si kuasa fo tao oe mata' ara dadi daa, ma kuasa ela reni soe rupa' leo dae-ina' a mai, tuka sira hihii-nanaun.d
7 Kalu rabasa sira ledo-fain fo ri' rafada Manetualain hehelu Na, neu' ko banda ma'aa' esa kalua neme bolo' doidoso fo ta hapu mate'e na. Ana natati soa' dua si, losa' ana naseki ma naisa si.e 8-9 No ria naa, dua si mate rai kota bau-ina' fo fai a ulu na, raisa sira Ramatuan nai ai kake'. Kota ria dadi kota tadalu', sama leo' fai a ulu na Sodom ma Masir. Neu' ko lahenda ra tu'u mana nesi mata sira dua popora nara nai eno', losa' fai' telu seseri'. Boe ma lahenda reme basa leo ra, basa nusa' ara ma basa dedea' ara mai ranilu popora' sira. Ara ta fee isin fo ratoi si,f 10 nana huu ara ramaho'o rita lahenda sira dua mate si. Huu fo dua si tao kaco lahenda nai dae-ina' a dudu'a-aafin. De ara tao feta rame-rame ma esa haitua fee esa hadia.
11 Tehuu basa fai' telu seseri', neu' ko Manetualain fee si ani hahae', ela rasoda selu'. Basa lahenda fo rita si a, ara dere sa'u-sa'u.g 12 Boe ma mana nesi mata sira dua, ramanene haraoe' esa neme lalai mai, nadenu si nae, “Emi dua ae mai leo!” Boe ma dua si hene-ae leo lalai reu ma oa' a poti na si. Musu-noo nara rita leo' naa, boe ma roi ramakokoa'.h 13 Kekeneu te, dae a natakeko naan seli. Kalu ita reke uma fo rai bendar, uma sanahulu, sona hea heni esa. Ma mate lahenda rifun hitu. Lahenda fo ri' ta mate, ara bii raan seli. Tehuu neu' ko sira fee hada-horomata neu' Manetualain, nana huu Ria homu pareta nai nusatetu-ikutema'.i
14 No ria naa, soe kadua a basa so. Tehuu besa-besa! Huu fo soe katelu a saka' mai.
Fuu saki kahitu a — Manetualain ma Yesus Kristus pareta nai dae-ina'
15 Boe ma Manetualain eila'o-limalopen nusatetu-ikutema' kahitu a fuu ria saki na. Kekeneu te, au amanene haraoe' dodou' rahara rame-rame reme nusatetu-ikutema' a rae,
“Besa' ia homu pareta nai dae-ina' a,
noi Manetualain ma Kristus,
Manetualain Lahendan fo ri' Ana teka-here Ni neme fai a ulu na.
Neu' ko Manetualain pareta naroo sama leo' Mane', losa doo na neu.”j
16 Ketua kadua hulu haa' fo ratuu' rai kadera pareta nai Manetualain mata Na, ara ramanene haraoe' sira boe. Ara sunda' undulaka nara losa' mata-idu nara neta dae a, ma io-oa Manetualain, 17 ara soda rae,
“Oo Manetualain!
Ami Ramatua ma!
Ami Manetualain ma!
Manetualain pareta basa-basan.
Manetualain kuasa basa-basan.
Manetualain masoda' neme fai a ulu na.
Manetualain masoda' besa' ia.
Ami hule makasi neu' Manetualain,
nana huu Manetualain pake kuasa bau-ina Na,
fo pareta nai dae-ina'.
18 Tehuu basa lahenda nusa' ara ramanasa,
nana huu ara ta tuka Manetualain.
Tehuu besa' ia, Manetualain namanasa,
nana huu ara ta ralela' Ana.
Besa' ia losa ledo-fain,
Manetualain huku lahenda fo ri' ta tao dale' neu' Ana.
Besa' ia losa ledo-fain,
Manetualain tao nalulutu' lahenda fo ri' tao ralulutu lahenda feke' ara.
Besa' ia losa ledo-fain,
Manetualain parisa' lahenda mana mate' ara dedean.
Besa' ia losa ledo-fain,
Manetualain balas ata nara puse-titin.
Si' Manetualain mana nesi mata Nara,
ma Manetualain lahenda Nara,
aana-bauina', lasi-muri'.
Manetualain balas basa lahenda,
fo ri' fee hada-horomata neu' Manetualain nade Na.”k
19 Baoe ma au ita nai nusatetu-ikutema' a, Manetualain Uma Mamason lelesu na mana soi'. Au ita peti fo fai a ulu na, ara peda Manetualain paretan fo ri' mana dui' nai batu. Ma narela-natata natututi' lii na bau na seli, dae-ina' a natakeko ma uda es batu mabera a tuda neme lalai mai.l