Eila'o-limalope neme nusatetu-ikutema' a ma susura aana mana lulu'
10
Boe ma au ita Manetualain eila'o-limalope kaheren esa, onda neme nusatetu-ikutema' a mai. Oa' a poti na ao-ina na. Elus a eo na laka na. Mata-idun rahaa sama leo' ledo, ma ei nara pila sama leo' ai-pila'. 2 Ana homu susura aana mana lulu' esa mana buka'. Ana napadei' ei ona na nai tasi' a, ei ii na nai mada' lain. 3 Ana nahara nambera-ina, sama leo' singa a ao. Ana nahara basa, boe ma tatas a natata natututi' lai' hitu. 4 Tatas a natata basa, boe ma au nau dui' sira dedea na. Tehuu au amanene haraoe' esa neme nusatetu-ikutema' a mai nae, “O boso' mafada lahenda, tatas kahitu' sira dedea nara! Ta bole dui' hata-hata esa boe'.”5 Boe ma eila'o-limalope' fo ri' napadei' ei' esa nai tasi' a ma ei' esa nai mada' lain so'u lima ona na leo lalai neu, 6 soo-supa nae, “Au soo-supa pake Manetualain nade Na, nana huu Ria masoda' losa doo na neu! Ria adu naa lalai ma dae-ina' a no basa oe-isin. Nenene matalolole! Ita tahani fai a, mamai na nanenea' so. 7 Huu fo kalu Manetualain eila'o-limalopen kahitu a fuu ria saki na, neu' ko Manetualain tao tuka Ria naetun fo fai ulu na lahenda bei ta bubulu'. Tehuu Ana nafada naetun ria neu' mana nesi matan fo ri' ralalau' Ana. De nenene matalolole, huu fo Au dedea Ki ia, tebe.”a
8 Boe ma haraoe' fo ri' au amanenen neme lalai a, dedea selu' no au nae, “Yohanis, o muu leo eila'o-limalope fo ri' napadei' ei' esa nai tasi' a, ma ei' esa nai mada' lain. Hai ma susura aana mana lulu' fo ri' mana buka' nai ria lima na.”
9 Au leo eila'o-limalope ria uu, hule susura aana' ria. Boe ma ana nafada au nae, “Hai maan fo mua leo! Nai o bafa ma mameda maan ma'ee' sama leo' fani oe', tehuu nai o tei ma mameda maan mali' a.”
10 Ana dedea nae leo' naa, boe ma au sipo a susura aana' ria neme lima na mai, de au ua ni. Nai au bafa ka ameda aan ma'ee' sama leo' fani oe'. Tehuu au odo henin, boe ma au ameda aan mali' a nai au tei ka.b
11 Boe ma haraoe' ria nadenu au nae, “O muste muu selu', ela mafada mema' hata fo Manetualain nau taon nai dae-ina' a. Mafada la'e-neu' hata fo saka' dadi neu' basa mane' ara rai dae-ina' a, lahenda reme basa leo ra, nusa' ara ma basa dedea' ara.”